Bo Bolɛ 49:1-33
49 Zakɔbu flɛli i mma yasua mun naan w’a se be kɛ: “Maan amun kwlaa amun yia naan n kan sa nga bé wá jú amun su blɛ kasiɛn’n nun’n,* i ndɛ n kle amun.
2 Zakɔbu i mma mun, amun yia naan amun sie amun su. Amun tie amun si Izraɛli i nuan ndɛ’n.
3 “Ribɛnin,+ a ti min wa kpɛn.+ A ti min wunmiɛn. Ba klikli ng’ɔ kle kɛ n ti yasua’n yɛle wɔ. Ɔ aɲrunɲan’n nin ɔ wunmiɛn’n be leman wunsu.
4 A kwlá tranman diin. A ti kɛ nzue m’ɔ kpalo kɔ wa kɔ wa’n sa. A su yoman kpa traman ɔ niaan mun. Afin a fuli ɔ si i bɛ’n su.+ Blɛ sɔ’n nun’n, a yoli min bɛ’n i fiɛn. Nanwlɛ, ɔ fuli su sakpa!
5 “Simeɔn nin Levi be ti niaan.+ Be fa be tokofi’n be yo nzaje sa.+
6 Nán maan n fa min wun n mantan be le. Kan be yia lɛ’n, nán maan be bo min dunman lɔ. Afin ya ble mɔ be fali’n ti’n, be kunnin sran.+ Yɛ be ɲinfu be kpɛkpɛli nannin tola’m be jasin ndin’n.
7 Maan be bo ya nga be fali’n i sannzan, afin ya nga be fali’n ti’n be yoli tɛ dan. Maan be bo be awlɛn fufu’n i sannzan, afin be awlɛn tɛ’n ti’n be yoli abɔlɛ dan.+ Maan n fa be naan be bo sanndi Zakɔbu i mɛn’n nun. Yɛ maan n tru be nun Izraɛli mɛn’n nun.+
8 “Zida,+ ɔ liɛ’n, ɔ niaan’m bé yí ɔ ayɛ.+ Á kwlá ɔ kpɔfuɛ mun.*+ Ɔ si i mma’m bé kóto ɔ bo.+
9 Zida ti asɔmɔli gbanflɛn.+ Min wa, saan á dí nnɛn nga a trɛli i’n, kpɛkun á jáso kɔ́. Ɔ lali, ɔ tinngɛli i wun kɛ asɔmɔli sa. ?Wan yɛ ɔ kwla yo maan asɔmɔli kun jaso-ɔ?
10 Famiɛn dilɛ kpɔnman’n su jasoman Zida i osu’n nun.+ Yɛ kpɔnman’n su jasomɛn i ɲrun le.* Ɔ́ ká sɔ lele saan Silo* w’a ba.+ I yɛ sran’m be kwlakwla bé bú i sran-ɔn.+
11 Ɔ minndali i aflunmun’n viɲin ja kun wun. Yɛ ɔ minndali i aflunmun ba’n viɲin kpa kun wun. Duvɛn nun yɛ ɔ́ kpú i tralɛ mun-ɔn. Viɲin mma’n i nzue’n nun yɛ ɔ́ kpú i tralɛ dan’n niɔn.
12 Duvɛn’n ti’n, i ɲinma’n blo kankankan. Yɛ nɔnnɔn’n ti’n, i je’m be fɛn fuaii.
13 “Zabilɔn+ trán jenvie nuan, kan mmeli’m be si lɛ’n.+ I lika’n kɔ́ lele ɔ nin Sidɔn+ bé já awɛ.
14 “Isakaa+ ti aflunmun kun m’ɔ ti kpinndinkpinndin kpa-ɔ. Ɔ la bajɛ nɲɔn nga be o i sin’n be afiɛn.
15 Ɔ́ wún kɛ lika nga be lo wunmiɛn lɛ’n ti kpa, naan lika’n ti klanman. Ɔ́ kɛ́n i wati’n i ase súa trɔ. Yɛ kɛ bé míɛn i kɛ ɔ di junman’n, ɔ́ dí.
16 “Dan+ m’ɔ ti Izraɛli akpasua kun’n, ɔ́ dí i sran’m be jɔlɛ.+
17 Maan Dan yo kɛ wuo m’ɔ o atin nuan’n sa. Maan ɔ yo kɛ ɔnda ng’ɔ le mmɛ m’ɔ o akpɔ nuan’n sa naan ɔ ka nnɛn kpanngɔ’n i ja sin. Maan ɔ yo sɔ naan kɛ sran ng’ɔ ti su’n ɔ́ tɔ́’n, ɔ lɛngɛ i ɲin aanga.+
18 Zoova, ń trán mínndɛ wɔ naan a de e.
19 “Gadi+ liɛ’n, awiefuɛ’m bé wá tɔ́ i su, sanngɛ ɔ́ sín be sin lɔ yɛ ɔ́ tɔ́ be su-ɔ.+
20 “Azɛɛ+ wá ɲán kpanwun* kpanngban kpa. I sa nun yɛ aliɛ nga be kwla fa sie i famiɛn ɲrun’n, ɔ́ fín-ɔn.+
21 “Nɛftali+ ti flete klanman kpa. Ɔ kan ndɛ fɛfɛ mun.+
22 “Zozɛfu+ ti waka m’ɔ su mma’n i sama’n. Waka sɔ’n wo nzue ti kun i nuan. Yɛ i sama’m be fu lele be tra talɛ’n su.
23 Sanngɛ ta tofuɛ’m b’a yacimɛn i yalɛ klelɛ le, be toli i wun ta. Yɛ be fali be ɲin cili i.+
24 Sanngɛ i ta liɛ’n kɛli i osu’n nun.+ Wunmiɛn trɛnnin i sa nun titi, yɛ i sa’n blili kpa.+ I sɔ’n fin sran ng’ɔ le wunmiɛn m’ɔ ukali Zakɔbu’n. Ɔ fin bua tafuɛ m’ɔ ti Izraɛli i yɔbuɛ’n.
25 Ɔ si i Ɲanmiɛn’n yɛ ɔ fɛ i* mannin-ɔn. Ɔ́ úka-ɔ. Ɔ nin Sran m’ɔ Kwla Like Kwlaa Yo’n be o nun. Ɲanmiɛn fá nglo lɔ like yrá ɔ su, yɛ ɔ́ fá asiɛ’n i bo lɔ like yrá ɔ su.+ Ɔ́ mán ɔ nnɛn nin ba kpanngban.
26 Muae nga ɔ si bo’n, i kpa liɛ’n trá ninnge kpakpa nga be fin oka mɔ be o lɛ tititi’n be su’n. Yɛ i kpa liɛ’n trá kpɔlɛ mɔ be o lɛ tititi’n be klanman mɔ be ti’n.+ Muae sɔ’n ká Zozɛfu i ti’n su, ɔ́ ká sran mɔ be fɛli i niaan’m be nun’n, i ti afiɛn.+
27 “Bɛnzamɛn+ títí nnɛn’m be nun tititi kɛ blo alua+ wie sa. Ɔ́ dí i nnɛn mun nglɛmun, kpɛkun ɔ́ cɛ́cɛ́ like ng’ɔ ɲɛnnin i’n nun nnɔsua.”+
28 Izraɛli akpasua blu-nin-nɲɔn (12) mun yɛ be o lɛ-ɔ. Kɛ be si bó muae mán be’n, ndɛ ng’ɔ kannin’n yɛ ɔ o lɛ-ɔ. Ɔ boli muae mannin be kunngunngun.*+
29 I sin’n, ɔ seli be kɛ: “N su wa wu.+ Amun sie min min nannan’m be wun lɛ, Efrɔn m’ɔ ti Ɛtifuɛ’n i lika’n nun yɔbuɛ buɛ’n nun.+
30 Yɔbuɛ buɛ sɔ’n wo Kanaan mɛn’n nun. Ɔ o Makpela, Mamre i ɲrun lɛ lika’n nun. Abraamun toli lika sɔ’n Efrɔn m’ɔ ti Ɛtifuɛ’n i sa nun naan ɔ́ fá yó i asieliɛ.
31 Lɛ yɛ be sieli Abraamun nin i yi Sara-ɔ.+ Asa ekun’n, lɛ yɛ be sieli Izaaki+ nin i yi Rebeka-ɔ. Lɛ kusu yɛ n sieli Lea-ɔ.
32 Ɔ toli lika’n nin i nun yɔbuɛ buɛ’n Ɛti i mma’m be sa nun.”+
33 Kɛ Zakɔbu kannin ndɛ sɔ’n kleli i mma mun’n, ɔ fɛli i ja’n sieli i bɛ’n su ekun. Yɛ ɔ kali nun-ɔn. Ɔ wuli kɛ i nannan’m be sa.*+
Ja ngua lɔ ndɛ mun
^ Ebr., “cɛn’m be awieliɛ’n nun’n.”
^ Ebr., “Ɔ sa’n trán ɔ kpɔfuɛ’m be kɔmin’n su.”
^ Annzɛ “i ja’m be afiɛn.”
^ I bo’n yɛ: “I fuɛ’n”, “Sran nga like’n ti i liɛ’n.”
^ Annzɛ “aliɛ.”
^ Yɛle kɛ, Zozɛfu.
^ Ebr., “Sran kun i muae liɛ ng’ɔ nin i fata’n yɛ ɔ bo mɛnnin i-ɔ.”
^ Ebr., “be fɛ i ɔli i fuɛ’m be wun.”
