Yezu na apostolo afamba n’khundu mwa Nkulo wa Kedhroni pakuenda ku Phiri ya Mulivera. Unoyu ukhali ndzidzi wakumaulo, pontho mwezi ukhali wakudzala. Pidabuluka iwo m’munda wa Getsemani, Yezu aapanga: ‘Salani pano, lekani gona.’ Buluka penepo, Yezu afamba pang’ono kuenda m’munda mbagodama. Mwakutsukwala kakamwe, iye aphembera kuna Yahova: ‘Mbapicitike ninga munafunira imwe.’ Natenepa, Yahova atuma anju toera kuwangisa Yezu. Pidabwerera Yezu kuna apostolo ace atatu, aagumana mbakagona. Iye aapanga: ‘Lamukani! Uno nee ndi ndzidzi toera kugona! Uno ndi ndzidzi unafuna kuperekwa ine m’manja mwa anyamalwa anga.’

Mwakukhonda dembuka Yuda afika, mbatsogolera mwinji wa anthu akuti akhali na masupada na pigomba. Iye akhadziwa kuti mbadagumana kupi Yezu thangwi kazinji kene iwo akhaenda pa mbuto ineyi. Yuda akhadapanga anyankhondo kuti mbadadzindikira tani Yezu. Iye afendedzera Yezu cifupi mbalonga: ‘Muli tani Mpfundzisi,’ buluka penepo, iye ampswompswona Yezu. Yezu alonga: ‘Yuda, ukundisandukira na kundimpswompswona?’

Yezu ayang’ana mwinji mbabvundza: “Mbani anasaka imwe?” Iwo atawira: “Yezu wa ku Nazareti.” Buluka penepo, iye aatawira: “Ndine pano,” natenepa anthu atutumuka mbagwa pantsi. Yezu abvundza pontho mwinji: “Mbani anasaka imwe?” Iwo atawira: “Yezu wa ku Nazareti.” Yezu atawira: ‘Ndikukupangani kuti ndine pano. Asiyeni awa aende pyawo.’

Pidadzindikira Pedhru pikhacitika, iye abulusa supada mbagwanda khutu ya Malko, bitcu wa nyantsembe wankulu. Mbwenye Yezu aphata khutu ya mamuna unoyu mbamuwangisa. Buluka penepo, iye apanga Pedhru: ‘Pitisa supada  m’budu mwayo. Ungaphatisira supada pakumenyana, unadzafa na supada.’ Anyankhondo aphata Yezu mbamanga manjace, mu ndzidzi unoyu apostolo athawa. Natenepa mwinji waenda naye kuna nkulu wa anyantsembe anacemerwa Anasi. Anasi acita mibvundzo kuna Yezu mbantumiza kuna Nyantsembe Wankulu Kayifa. Mphapo ninji pidacitika na apostolo?