Jeremias 48:1-47
-
Propesiya sumpad Moab (1-47)
48 Parad Moab+ et oniay inkuan nen Jehova na saray armada, say Dios na Israel:
“Pakaskasi so Nebo,+ ta aderal la!
Abaingan so Kiriataim+ tan asakop la.
Abaingan tan abuybuyak so maligen a salimbengan.*+
2 Agda la irayew so Moab.
Implano ra ed Hesbon+ so pakaderal to:
‘Gali, sikatoy deralen tayo bilang sakey a nasyon.’
Mandeen ka met, O Madmen,Ta walay espada ya ontutumbok ed sika.
3 Walay ungol na panakis diad Horonaim,+Ungol na panagderal tan baleg a pakageba.
4 Aderal lay Moab.
Onaakis iray angkelag nin ananak to.
5 Manak-akis ira legan iran ontatatdang diad dalan a paarap ed Luhit.
Tan narerengel day panakis lapud gonigon diad dalan a palasur manlapud Horonaim nisengeg ed agawan kadederal.+
6 Batik kayo, iliktar yoy bilay* yo!
Magmaliw kayon singa sakey a kiew ya enebro ed kalawakan.
7 Lapud nanmatalek kad saray kimey tan kayamanan mo,Nasakop ka met.
Tan nibantak ed arum a dalin si Kemos,+
Pati saray saserdote to tan saray prinsipe to.
8 Onloob ed kada syudad so managderal,Tan anggapoy syudad a makaliktar.+
Naandi so lawak,*Tan sigpot a naderal so plastadon dalin,* unong ya imbaga nen Jehova.
9 Mangiyan kayoy marka ed karsada parad Moab,Ta sikatoy ombatik sano nageray iray pasen to;Tan magmaliw a bengatlan pakataktakotan iray syudad to,Anggapoy anggan sakey a manayam ditan.+
10 Nisamba so siopaman a paspasaray so panusumpal tod ganggan nen Jehova!
Nisamba so siopaman a pupugeran toy espada to ed pamaagus na dala!
11 Maligen iray Moabita manlapu lad inkaugaw da,Singa alak a ginmaer.
Agda asali so nibales ed nanduruman pananginan,Tan agda asali so nibantak ed arum a dalin.
Kanian ag-anguman so taway da,Tan ag-anguman so angob da.
12 “‘Kanian onsabi agew a mangibaki ak na lalaki a mangibalintuag ed sikara,’ so imbaga nen Jehova. ‘Ibalintuag da ra tan ipaikik da ray anginan ed sikara, tan mekmeken da ray angkakabaleg a buyog da.
13 Tan ibaing na saray Moabita si Kemos, a singa nen imbaing na sankaabungan na Israel so Bethel, a nanmatalekan da.+
14 Akin et agaylay tepel yon mangibaga: “Mabibiskeg kamin sundalo ya akaparaan lan miguerra”?’+
15 ‘Aderal lay Moab,Alooban la ray syudad to,+Tan apatey iray sankamaongan a kalangweran a lalaki ra,’+
So imbaga na Ari, a say ngaran to et Jehova na saray armada.+
16 Asingger lan onsabi so kadederal na saray Moabita,Tan maples ya onsasabi so pakaderal da.+
17 Miambegya ed sikara so amin ya akapaliber ed sikara,Amin a makaamta ed ngaran da.
Ibaga yod sikara: ‘Aputer lay mabiskeg a lewet, say marakdakep a baston!’
18 Epas kad maglorian kawalaan mo,Tan yurong ka ed inkapgaan,* O sikan anak a biin manaayam ed Dibon,+Ta sinmabi imay nanderal ed Moab pian milaban ed sika,Tan deralen to ray apadiran a pasen mo.+
19 Alagey kad dalan tan manbantay ka, sikan manaayam ed Aroer.+
Tepetan mo so lakin ontataynan tan biin ontatakas, ‘Antoy agawa?’
20 Abaingan tan ataktakot so Moab.
Ugaog tan akis kayo.
Ipakabat yod Arnon+ ya aderal lay Moab.
21 “Sinmabi lay panangukom ed plastadon dalin,*+ sumpad Holon, Jahaz,+ tan Mefaat;+
22 sumpad Dibon,+ Nebo,+ tan Bet-diblataim;
23 sumpad Kiriataim,+ Bet-gamul, tan Bet-meon;+
24 sumpad Keriot+ tan Bozra; tan sumpad amin a syudad ed dalin na Moab, saramay walad arawi tan walad asingger.
25 ‘Nakal so biskeg* na Moab;Apiley lay taklay to,’ so imbaga nen Jehova.
26 ‘Painum yo anggad nabuek,+ ta sikatoy nampaatagey sumpad si Jehova.+
Linmespak so Moab ed uta to,Tan eelek-elekan na totoo.
27 Agta inelek-elekan moy Israel?+
Kasin sikatoy anengneng a kaiba na saray matakew,Kanian manpeyeng ka tan sikatoy papaugesen mo?
28 Taynan yo ray syudad tan manayam kayod ungib, sikayo ran manaayam ed Moab,Tan magmaliw kayon singa malapati a manuubong ed saray gilig na kelas.’”
29 “Naamtaan mi so inkamapaatagey na Moab—agaylay panagpasirayew to—Say inkalastog to, inkamapaatagey to, inkamapasirayew to, tan inkatangsit na puso to.”+
30 “‘Amtak so sanok to,’ so imbaga nen Jehova,‘Balet anggapoy pansumpalan na saray andi-kakanaan a salita to.
Anggapoy nagawaan na saratan.
31 Kanian manugaog ak lapud Moab,Akisan ko so interon MoabTan mantagleey ak lapud saray totoo ed Kir-heres.+
32 Nangisan ta ka a mas ni nen say pannangis ko parad Jazer,+O sengeg na ubas ed Sibma.+
Binmaliw ed dayat iray mabunan simit mo.
Akasabi ra ed dayat, diad Jazer.
Sinmabi so managderalEd saray prutas mo ed panaoy tiagew tan diad panagburbor moy ubas.+
33 Naandi so panliliket tan gayaga ed tanemay manbubungan kiew
Tan ed dalin na Moab.+Pinatundak lay iyaagus na alak manlapud saray panagpespesan na ubas.
Anggapo lay mangigatin tan oneyag ed liket.
Walay paneyag balet aliwan lapud liket.’”+
34 “‘Walay pannangis ed Hesbon+ ya anggad Eleale.+
Inkasil day boses da ya anggad Jahaz,+Manlapud Zoar ya anggad Horonaim,+ ya anggad Eglat-selisiya,*
Naekatan iray danum na Nimrim.+
35 Paandien kod Moab,’ so imbaga nen Jehova,‘So siopaman a mangiyaapay diad atagey a pasenTan samay manbabagat ed dios to.’
36 Kanian onakis* so pusok lapud Moab, a singa tanol na plauta,*+Tan onakis* so pusok lapud saray totoo ed Kir-heres, a singa tanol na plauta.*
Ta naandi so atipon ton kayamanan.
37 Ta akiskisan so amin ya ulo,+Tan akatlian so amin a balbas.
Asugat-sugat so amin a lima,+Tan walay sakon abel ed saray balangbang da!’”+
38 “‘Diad amin ya atep ed MoabTan ed amin a plaza toEt pannangis labat so narerengel.
Ta dineral koy MoabA singa sakey a buyog ya imbantak,’ so imbaga nen Jehova.
39 ‘Agaylay inkataktakot to! Ugaog kayo!
Batik so Moab lapud kababaingan!
Eelek-elekan na totoo so Moab,Makapataktakot itan ed amin a walad kaliberliber to.’”
40 “Ta oniay inkuan nen Jehova:
‘Singa sakey ya agila a manisibar,+
Ibuskag to ray payak to pian sibaren so Moab.+
41 Nasakop iray baley,Tan nasamsam iray pasen a pansasalimbengan to.
Diad satan ya agew, say puso na saray sundalo na MoabEt magmaliw a singa puso na biin manaanak.’”
42 “‘Tan naandi so Moab bilang sakey a nasyon,+Ta inyatagey toy sarili to sumpad si Jehova.+
43 Walad arapan mo so makapataktakot a bengatla tan say abot tan patit,O sikan manaayam ed Moab,’ so imbaga nen Jehova.
44 ‘Napelag ed abot so siopaman ya ibabatikan toy makapataktakot a bengatla,Tan naerel ed patit so siopaman a makapaway ed abot.’
‘Ta iyakar kod Moab so taon a nadusa ra,’ so imbaga nen Jehova.
45 ‘Diad anino na Hesbon, anggapoy nagawaan na saramay ombabatik.
Ta ompaway so apoy ed Hesbon,Tan say dalang ed dalem nen Sihon.+
Upoten na satan so moling na MoabTan say lapislapis na ulo na saray magulon ananak.’+
46 ‘Pakaskasi ka la, O Moab!
Naandi la ray totoo nen Kemos.+
Ta narel iray ananak mon lalaki,Tan nibantak ed arum a dalin iray ananak mon bibii.+
47 Balet diad kaunoran iran agew et tiponen ko ray inerel a totoo na Moab,’ so imbaga nen Jehova.
‘Dia anampot so mensahe na panangukom parad Moab.’”+
Paimanod leksab
^ Odino “atagey tan maligen a pasen.”
^ Odino “kamarerwa.”
^ Odino “abeban patar.”
^ Odino “atagey a patar.”
^ Odino posiblin, “diad amagan dalin.”
^ Odino “atagey a patar.”
^ Literal, “saklor.”
^ Mapatnag a manutukoy ed sakey a pasen ed nasyon na Moab. Ipapatalos iya na arum bilang, “kabatyan a baka a taloy taon ni labat.”
^ Plauta a totogtogen ed ponpon lapud pantagleey.
^ Odino “ag-ondeen.”
^ Plauta a totogtogen ed ponpon lapud pantagleey.
^ Odino “ag-ondeen.”
