Jeremias 14:1-22
14 Oniay mensahe nen Jehova a sinmabi ed si Jeremias nipaakar ed kelang:+
2 Nanermen so Juda,+ tan aderal iray puerta to.
Maer-ermen iran linmereg ed dalin,Tan walay pannangis ed Jerusalem.
3 Tan saray kakatawan ditan et imbaki da iray ariripen da* pian mangalay danum.
Linma rad saray abot a pakaromogay danum,* balet anggapoy aromog da.
Pinmawil ira ya anggapoy karga na saray buyog da.
Abaingan tan adismaya ra,Kanian sinakbongan day ulo ra.
4 Linmeletak so dalin,Lapud anggapoy uran,+
Kanian adismaya iray dumaralus tan sinakbongan day ulo ra.
5 Anggan say kapananak ya ulsa ed uma et taynan toy anak to,Lapud anggapoy dika.
6 Nanalagey iray atap ya asno diad saray pukdol ya anggapoy tanem.
Maning-ingas ira a singa saray ason jakal;Kinmapuy lay mata ra lapud anggapoy naromog dan naakan.+
7 Anggano saray kasalanan mi so mantasi sumpad sikami,O Jehova, kiwas ka lapud ngaran mo.+
Lapud aminpigapiga kamin agnanmatoor ed sika,+Tan nankasalanan kami ed sika.
8 O sikan ilalo na Israel, say Manangiliktar to+ diad panaon na gonigon,Akin et nagmaliw kan singa dayo diad dalin,Singa managbiahe a tinmunda pian mamalabas labat na labi?
9 Akin et singa ka sakey a toon abigla,Singa sakey a mabiskeg a toon agto niliktar iray totoo to?
Balet kaiba mi ka, O Jehova,+Tan atawag kami ed ngaran mo.+
Agmo kami papaulyanan.
10 Oniay inkuan nen Jehova nipaakar ed sarayan totoo: “Labalabay day manakar-akar;+ agda pinugeran iray sali ra.+ Kanian ag-aliketan si Jehova ed sikara.+ Nonoten to natan so lingo ra tan dusaen to ra lapud saray kasalanan da.”+
11 Insan oniay imbaga nen Jehova ed siak: “Agmo ipipikasi a walay onsabin maabig ed sarayan totoo.+
12 Sano manaayunal ira, agko dedengelen iray kerew da,+ tan sano mangiyaapay ira na saray interon apay a popoolan tan apay a kakanen, agak naliliketan ed saratan,+ ta paandien ko ra ed panamegley na espada, eras, tan salot.”*+
13 Diad saman et inkuan ko: “O Soberanon Katawan a Jehova! Oniay ibabaga ed sikara na saray propeta, ‘Anggapoy nanengneng yon espada, tan anggapoy onsabin eras ed sikayo, balet iter kod sikayo so tuan kareenan diad sayan pasen.’”+
14 Insan inkuan nen Jehova ed siak: “Katilaan so ipropropesiya na sarayan propeta diad ngaran ko.+ Agko ra imbaki odino ingganggan odino akitongtongan.+ Palson pasingawey tan andi-kakanaan a panagparles, tan panamalikdo na dilin puso ra so ipropropesiya rad sikayo.+
15 Kanian oniay inkuan nen Jehova: ‘Ompatey ed espada tan eras irayan propeta a manpropropesiya ed ngaran ko, anta agko ra imbaki, tan ibabaga ran anggapoy espada odino eras ya onsabi ed sayan dalin.+
16 Tan saray totoo a pangibabagaan day propesiya et magmaliw a bangkay ya ataytayak ed saray karsada na Jerusalem lapud eras tan espada, ya anggapoy mangiponpon ed sikara,+ pati saray kaasawaan da, tan saray ananak dan lalaki tan bibii. Ta ikalbok so kadederal a manepeg ed sikara.’+
17 “Ibagam iyan mensahe ed sikara,‘Onagus komon iray lua manlapud matak diad agew tan labi, tan ag-iratan komon ontunda,+Ta sigpot ya abuyak tan aderal so birhen ya anak a bii na totook,+Tan grabe sugat to.
18 Sano onla ak pian nengnengen ko so uma,Nanengneng ko iramay pinapatey ed espada!+
Tan sano onloob ak ed syudad,Nanengneng ko iray sakisakit lapud eras!+
Ta say propeta tan say saserdote et nanliberliber ed dalin ya agda amta.’”+
19 Kasin sigpot mo lan impulisay so Juda, odino kasin binusol mo* so Sion?+
Akin et sinakitan mo kami, kanian agkami la onabig?+
Iilaloan mi so kareenan, balet anggapoy maabig a sinmabi,Iilaloan mi so panaon na panamaabig, balet walay takot!+
20 Bidbiren mi so inkauges mi, O Jehova,Tan saray lingo na inmuunan atateng mi,Ta nankasalanan kami ed sika.+
21 Lapud ngaran mo et agmo kami ipupulisay;+Agmo mumudmoraen so maglorian tronom.
Nonot mo, tan agmo dederalen so impisipanan mod sikami.+
22 Wala ta ed saray andi-kakanaan ya idolo na saray nasyon so makapangiter na uran,Odino nayarian ta na tawen so mangipelag na uran ed dilin pakayari to?
Agta sika labat, O Jehova a Dios mi, so makagawad saya?+
Tan maniilalo kami ed sika,Ta sika labat so nanggawa ed sarayan amin a bengatla.
