Jeremias 39:1-18

  • Inkagba na Jerusalem (1-10)

    • Batik si Zedekias insan narel (4-7)

  • Naprotektaan si Jeremias (11-14)

  • Makaliktar a mabilay si Ebed-melec (15-18)

39  Diad komasiam a taon na uley nen Arin Zedekias na Juda, diad komasamplon bulan, linmad Jerusalem si Arin Nabucodonosor* na Babilonia tan say interon armada to, tan kinubkob da itan.+  Diad koma-11 a taon na uley nen Zedekias, diad komasiam ya agew na komapat a bulan, abungaw day padir na syudad.+  Tan linmoob tan yinmurong ed Pegley a Puerta so amin a prinsipe na ari na Babilonia,+ salanti, sikara di Nergal-sarezer a Samgar, Nebo-sarsekim a Rabsaris,* Nergal-sarezer a Rabmag* tan amin ni ran prinsipe na ari na Babilonia.  Sanen anengneng ira nen Arin Zedekias na Juda tan saray amin a sundalo, binmatik ira+ a papaway ed syudad diad labi, tan dinmalan irad hardin na ari, diad puerta ed nanleetan na duaran padir, tan nantultuloy iran amaarap ed Araba.+  Balet inusilan ira na armada na saray Caldeo, tan nabotan day Zedekias diad saray patar a desierto na Jerico.+ Sikatoy inerel da tan inyakar da ed si Arin Nabucodonosor* na Babilonia, diad Ribla+ ed dalin na Hamat,+ pian sikatoy sentensiaan to diman.  Impapatey na ari na Babilonia diad Ribla iray lalakin ananak nen Zedekias legan a sankanengneng to ra, tan impapatey na ari na Babilonia so amin a gagalangen a totoo ed Juda.+  Tan binulag toy Zedekias, insan to binalor na saray gansan gulonggulong pian awiten tod Babilonia.+  Tan pinoolan na saray Caldeo so abung* na ari tan saray kaabungan na totoo,+ tan inggeba da ray padir na Jerusalem.+  Tan si Nebuzaradan+ a pangulo na saray guardia et inawit to ray totoon atilak ed syudad, saray dinmapag la ed sikato, tan siopaman ya atilak, tan inyakar to rad Babilonia. 10  Balet intilak nen Nebuzaradan a pangulo na saray guardia so arum a sankapobrian a totoo ed dalin na Juda, salanti, saramay andian a balot. Diad saman ya agew et inikdan to met ira na kaubasan tan saray uma a kimeyan da.*+ 11  Natan et oniay ingganggan nen Arin Nabucodonosor* na Babilonia ed si Nebuzaradan a pangulo na saray guardia nipaakar ed si Jeremias: 12  “Alam si Jeremias tan bantayan mo; agmo sasakitan, tan iter mod sikato so antokaman a kerewen to.”+ 13  Kanian nambaki si Nebuzaradan a pangulo na saray guardia, si Nebusazban a Rabsaris,* tan si Nergal-sarezer a Rabmag,* tan amin a manunaan a lalaki na ari na Babilonia 14  tan impaipaway day Jeremias ed Sular na Guardia+ tan inyawat dad si Gedalias+ ya anak nen Ahikam+ ya anak nen Safan,+ pian awiten tod abung to. Kanian sikatoy nanayam a kaiba iray totoo. 15  Sanen akapriso si Jeremias ed Sular na Guardia,+ oniay mensahe nen Jehova a sinmabi ed sikato: 16  “La ka, tan ibagam ed si Ebed-melec+ ya Etiope, ‘Oniay inkuan nen Jehova na saray armada, say Dios na Israel: “Sumpalen ko iray salitak ed sayan syudad diad pangiyakar koy kadederal, aliwan kamaongan, tan diad satan ya agew et nanengneng mo itan a nagawa.”’ 17  “‘Balet isalba ta kad satan ya agew,’ so imbaga nen Jehova, ‘tan agka niyawat ed saray totoon tatakotan mo.’ 18  “‘Ta iliktar ta ka, tan agka ompatey ed espada. Nakayarian moy bilay mo* bilang samsam,*+ lapud nanmatalek kad siak,’+ so imbaga nen Jehova.”

Paimanod leksab

Literal, “Nabucodorosor,” sananey ya espeling.
Odino unong ed sananey ya inkaapag na angibasiyan a Hebreon teksto, “Nergal-sarezer, Samgar-nebo, Sarsekim, Rabsaris.”
Odino “manunan managmahiko (astrologo).”
Literal, “Nabucodorosor,” sananey ya espeling.
Odino “palasyo.”
Odino posiblin, “tan inobliga to ran mankimey.”
Literal, “Nabucodorosor,” sananey ya espeling.
Odino “manunan opisyal ed palasyo.”
Odino “manunan managmahiko (astrologo).”
Odino “kamarerwam.”
Odino “Makaliktar kan mabilay.”