Jeremias 38:1-28

  • Imbantak ed bobon si Jeremias (1-6)

  • Inliktar nen Ebed-melec si Jeremias (7-13)

  • Kinombinse nen Jeremias si Zedekias ya onsuko (14-28)

38  Nadngel natan nen Sefatias ya anak nen Matan, si Gedalias ya anak nen Pasur, si Jucal+ ya anak nen Selemias, tan si Pasur+ ya anak nen Malkias irayan ibabaga nen Jeremias ed amin a totoo:  “Oniay inkuan nen Jehova, ‘Ompatey ed espada, eras, tan salot* imay mansiansia ed sayan syudad.+ Balet mantultuloy a manbilay imay onsuko* ed saray Caldeo, tan nakayarian to so bilay* to bilang samsam* tan manbilay.’+  Oniay inkuan nen Jehova, ‘Niyawat iyan syudad ed armada na ari na Babilonia, tan sakopen to iya.’”+  Oniay imbaga na saray prinsipe ed ari: “Ipangasim, ipapatey mo iyan too,+ ta papakapuyen to so talek* na saray sundalo ya akera ed sayan syudad, tan amin a totoo, diad pangibabaga tod sarayan salita. Ta sayan too et aliwan kareenan so labay to parad sarayan totoo noagta kadederal.”  Inmebat si Arin Zedekias: “Akauley ki lad sikato, ta anggapoy nagawaan na ari pian amperen kayo.”  Kanian inala ray Jeremias tan imbantak dad bobon nen Malkias ya anak na ari, a satan et walad Sular na Guardia.+ Sikatoy inleksab dad panamegley na lubir. Anggapoy danum na bobon, noagta pitek labat, tan onlelereg lay Jeremias ed pitek.  Abalitaan nen Ebed-melec+ ya Etiope, sakey ya eunoko* a walad abung* na ari, ya inyan dad bobon si Jeremias. Diad saman et manyudyurong so ari diad Puerta na Benjamin,+  kanian pinmaway si Ebed-melec ed abung* na ari tan oniay imbaga tod ari:  “O katawan kon ari, mauges so ginawa na sarayan lalaki ed si propeta Jeremias! Sikatoy impelag dad bobon pian ompatey ed eras, ta anggapo lay akeran tinapay ed sayan syudad.”+ 10  Insan oniay ingganggan na ari ed si Ebed-melec ya Etiope: “Mangitagar kay 30 lalaki a wadia tan agwat yod bobon si propeta Jeremias antis ya ompatey.” 11  Kanian intagar nen Ebed-melec iray lalaki tan linma rad abung* na ari, diad silong na pangiinay kayamanan,+ tan angala ra ditan na pigaran daan a lupot tan daan ya abel, insan impelag da iratan ed panamegley na lubir ed si Jeremias diad bobon. 12  Insan imbaga nen Ebed-melec ya Etiope ed si Jeremias: “Ipangasim, iyan mod saray kilikilim iray lupot tan abel tan lubir.” Ontan so ginawa nen Jeremias, 13  tan inagwat day Jeremias ed panamegley na lubir tan impaway dad bobon. Tan nansiansia si Jeremias diad Sular na Guardia.+ 14  Impatawag nen Arin Zedekias si propeta Jeremias pian onlad sikato diad komatlon lolooban, a walad abung nen Jehova, insan imbaga na ari ed si Jeremias: “Walay tepeten kod sika. Anggapo komoy iyaamot mod siak.” 15  Oniay inkuan nen Jeremias ed si Zedekias: “No ibagak ed sika, seguradon papatey mo ak. Tan no simbawaen ta ka, agmo ak lanlamang dengelen.” 16  Kanian masekreton nansamba si Arin Zedekias ed si Jeremias, ya inkuan to: “Unong a mabilay si Jehova, ya angiter ed sikatayo na sayan bilay,* agta ka papatey, tan agta ka iyawat ed lima na sarayan lalaki a malabay a mamatey ed sika.”* 17  Insan imbaga nen Jeremias ed si Zedekias: “Oniay inkuan nen Jehova, say Dios na saray armada, say Dios na Israel, ‘No onsuko* ka ed saray prinsipe na ari na Babilonia, niliktar so bilay mo* tan agnapoolan iyan syudad, tan niliktar ka tan say sankaabungan mo.+ 18  Balet no agka onsuko* ed saray prinsipe na ari na Babilonia, niyawat iyan syudad ed saray Caldeo, tan poolan da iya,+ tan agka makaliktar.’”+ 19  Insan oniay inkuan nen Arin Zedekias ed si Jeremias: “Natatakot ak ed saray Judio a dinmapag ed saray Caldeo, ta no niyawat ak ed sikara, ompano pairapen da ak.” 20  Balet inkuan nen Jeremias: “Agka niyawat ed sikara. Ipangasim, unor moy salita nen Jehova ya ibabagak ed sika, tan maabig so pansumpalan mo, tan mantultuloy ka* a manbilay. 21  Balet no agmo labay so onsuko,* oniay impaamta nen Jehova ed siak: 22  Amin a bibiin akera ed abung* na ari na Juda et aawiten ed saray prinsipe na ari na Babilonia,+ tan ibabaga ran,‘Pinalikdo ka tan adaeg ka na saray lalaki a nanmatalekan mo.*+ Pinalereg da ed pitek iray salim. Natan et binmeneg tan inmatras ira.’ 23  Tan aawiten da ed saray Caldeo so amin ya asawam tan ananak mo, tan agka makaliktar ed sikara, noagta erelen ka na ari na Babilonia,+ tan napoolan iyan syudad lapud sika.”+ 24  Insan imbaga nen Zedekias ed si Jeremias: “Agmo aabuloyan a naamtaan na anggan siopa irayan bengatla, pian agka ompatey. 25  Tan no naamtaan na saray prinsipe ya akitongtong ak ed sika tan onla rad sika tan ibaga ran, ‘Ipangasim, ibagam ed sikami no antoy imbagam ed ari. Anggapo komoy iyaamot mod sikami, pian agmi ka papatey.+ Tan antoy imbaga na ari ed sika?’ 26  ibagam ed sikara, ‘Kekerewen kod ari ya agto ak la ipawil ed abung nen Jehonatan pian agak ompatey diman.’”+ 27  Agnambayag et linmad si Jeremias so amin a prinsipe tan sikatoy tinepetan da. Imbaga tod sikara so amin a papaibaga na ari. Kanian tinmunda la ran nansalita, ta agda nadngel imay tongtongan na ari tan si Jeremias. 28  Nansiansiay Jeremias diad Sular na Guardia anggad agew ya asakop so Jerusalem;+ sikatoy wadman ni sanen asakop so Jerusalem.+

Paimanod leksab

Odino “sakit.”
Literal, “ompaway.”
Odino “kamarerwa.”
Odino “tan makaliktar a mabilay.”
Literal, “iray lima.”
Odino “opisyal ed palasyo.”
Odino “palasyo.”
Odino “palasyo.”
Odino “palasyo.”
Odino “a nanggawa ed sayan kamarerwa parad sikatayo.”
Odino “a manaanap ed kamarerwam.”
Literal, “ompaway.”
Odino “manbilay ni so kamarerwam.”
Literal, “ompaway.”
Odino “so kamarerwam.”
Literal, “ompaway.”
Odino “palasyo.”
Literal, “saray lalaki na kareenan mo.”