Jeremias 37:1-21
37 Tan ginmapon manuley si Arin Zedekias+ ya anak nen Josias bilang kasalat nen Conias*+ ya anak nen Jehoiakim, ta sikatoy tinuro nen Arin Nabucodonosor* na Babilonia bilang ari ed dalin na Juda.+
2 Balet sikato tan saray lingkor to tan saray totoo ed dalin et agdinmengel ed saray salita nen Jehova ya imbaga tod panamegley nen propeta Jeremias.
3 Tan imbaki nen Arin Zedekias si Jehucal+ ya anak nen Selemias tan si Sofonias+ ya anak nen Maasias a saserdote ya onlad si propeta Jeremias, pian ibaga ra: “Ipangasim, ipikasi mo kami ed si Jehova a Dios tayo.”
4 Si Jeremias et bulos nin mililimog ed saray totoo, ta sikatoy agda ni impriso.+
5 Natan et pinmaway ed Ehipto so armada na Faraon,+ tan nadngelan iya na saray Caldeo a mangukubkob ed Jerusalem. Kanian inmatras ira manlapud Jerusalem.+
6 Insan oniay mensahe nen Jehova a sinmabi ed si propeta Jeremias:
7 “Inkuan nen Jehova a Dios na Israel, ‘Oniay ibaga yod ari na Juda ya angibaki ed sikayo pian mantepet ed siak: “Say armada na Faraon ya onlan ontulong ed sikayo et ompawil lanlamang ed dalin da ya Ehipto.+
8 Tan ompawil dia iray Caldeo tan milaban irad sayan syudad tan sakopen tan poolan da.”+
9 Oniay inkuan nen Jehova, “Agyo titilaay sarili* yo diad pangibabaga yoy, ‘Agla ompawil iray Caldeo,’ lapud seguradon ompawil ira.
10 Anggano natalo yo so interon armada na saray Caldeo a milalaban ed sikayo tan saray asugatan labat so akera ed sikara, ombangon ni ran siansia ed tolda ra tan poolan da iyan syudad.”’”+
11 Sanen inmatras manlapud Jerusalem so armada na saray Caldeo lapud armada na Faraon,+
12 pinmaway ed Jerusalem si Jeremias pian onlad dalin na Benjamin+ tan alaen to diman so apag to ed saray kabaleyan to.
13 Balet kasabi nen propeta Jeremias ed Puerta na Benjamin, sikatoy inerel na opisyal na saray guardia a si Irias ya anak nen Selemias ya anak nen Hananias, tan inkuan to: “Diad saray Caldeo so laen mo!”
14 Balet inkuan nen Jeremias: “Aliwan tua itan! Agak onlad saray Caldeo.” Balet sikatoy agto dinengel. Kanian inerel nen Irias si Jeremias tan inyakar tod saray prinsipe.
15 Sinmanok iray prinsipe ed si Jeremias,+ tan sikatoy pinepekpek da tan impriso ra*+ ed abung nen Jehonatan a sekretaryo, ta ginawa ra itan a prisoan.
16 Inyan day Jeremias ed prisoan diad dalem na dalin,* ed saray tinarangkaan a kuarto, tan sikatoy nansiansia ditan ed dakel ya agew.
17 Insan sikatoy impaala nen Arin Zedekias, tan masekreto ton tinepetan diad abung* to.+ Intepet to, “Wala tay imbaga nen Jehova?” Inkuan nen Jeremias, “Wala!” tan intuloy to, “Niyawat kad ari na Babilonia!”+
18 Oniay inkuan ni nen Jeremias ed si Arin Zedekias: “Antoy kasalanan kod sika tan ed saray lingkor mo tan ed sarayan totoo, pian ipriso yo ak?
19 Kawalaan natan na saray propeta yo a nampropesiya ed sikayo, ya ibabaga ran, ‘Say ari na Babilonia et ag-onsabi pian milaban ed sikayo tan ed sayan dalin’?+
20 Ipangasim, dengel mo ak natan, O katawan kon ari. Iter mo komon so kerew ko. Agmo ak ipapawil ed abung nen Jehonatan+ a sekretaryo, pian agak ompatey diman.”+
21 Kanian ingganggan nen Arin Zedekias ya ipriso ray Jeremias ed Sular na Guardia,+ tan sikatoy inagew-agew ya iikdan day tinapay manlapud karsada na saray panadero,+ anggad naupot so amin a tinapay ed syudad.+ Tan nansiansiay Jeremias diad Sular na Guardia.
