Jeremias 4:1-31
4 “No ompawil ka, O Israel,” so imbaga nen Jehova,“No ompawil kad siakTan no ekalen mod arapan ko iray makapadimlan idolom,Agka manteyengteyeng a singa sakey a takas.+
2 Tan no isambam ya,‘Unong a mabilay si Jehova!’ diad katuaan, inkahustisya, tan inkatunong,Diad panamegley to et onggamor na bendisyon iray nasyon,
Tan manpasirayew ira lapud sikato.”+
3 Ta oniay inkuan nen Jehova ed saray totoo na Juda tan ed Jerusalem:
“Manbaka kayo ed dalin a dadalusan,Tan agkayo la mantatanem ed saray kasabitan.+
4 Segat yoy sarili yo parad si Jehova,Tan segat yo iray puso yo,+Sikayo ran totoo na Juda tan manaayam ed Jerusalem,Pian say sanok ko et ag-ondalang a singa apoyTan ondalang ya anggapoy makapangerep,Lapud saray mauges a kagagawa yo.”+
5 Ibaga yo itan ed Juda, tan ipaamta yod Jerusalem,
Eyag kayo tan paknol yo so tambuyog diad sayan dalin.+
Oniay ibando yo: “Mantitipon kayo,Ta ombatik itayo ed saray apadiran a syudad.+
6 Mangitagey kayoy tanda* ed Sion.
Mananap kayoy amotan yo, tan agkayo manmemeneng,”
Ta idapok so kadederal manlapud amianen,+ on, sakey a baleg a kadederal.
7 Sikatoy singa leon a pinmaway ed kawalaan ton kakiewan;+Binmuat la so managderal ed saray nasyon.+
Sikatoy pinmaway ed pasen to pian gawaen ton makapataktakot so dalin yo.
Nageraygeray iray syudad yo tan agla napanayaman.+
8 Kanian mansulong kayo na sakon abel,+Manermen kayo* tan manugaog kayo,Ta agni kinmepa so mandarlang a sanok nen Jehova ed sikatayo.
9 “Diad satan ya agew,” so imbaga nen Jehova, “onkapuy so puso* na ari,+Ontan met ed puso* na saray prinsipe;Nataktakot iray saserdote, tan mankelkelaw iray propeta.”+
10 Insan inkuan ko: “O Soberanon Katawan a Jehova! Talagan pinalikdom so totoo na Juda+ tan Jerusalem diad impangibagam na, ‘Niwala so kareenan ed sikayo,’+ anta ngalngali kami la pakgeran na espada.”*
11 Diad satan a panaon et oniay ibaga ed totoo na Juda tan Jerusalem:
“Walay makasinit a dagem a manlapud saray pukdol diad desiertoA maples a mamaarap ed anak a bii na* saray totook;Ag-itan onsabi pian mantaep odino manlinis.
12 Iganggan kon onsabi so maksil a dagem a manlalapud saratan a pasen.
Iyabawag ko natan so panangukom ed sikara.
13 Sikatoy onsabin singa saray lurem,Tan saray karwahe to et singa maksil a dagem.+
Saray kabayo to et maples nen saray agila.+
Pakaskasi tayo la, ta aderal tayo la!
14 O Jerusalem, urasan moy pusom pian nalinisan ed inkauges, tan niliktar ka.+
Anggad kapigan a mansiansia ed sika so mauges a kanonotan?
15 Ta walay boses a mangibabagay balita manlapud Dan,+Tan iyaabawag to so kadederal manlapud kapalandeyan na Efraim.
16 Ibalita yo, on, ibalita yod saray nasyon;Iyabawag yo itan ed Jerusalem.”
“Onsabi ray guardia* manlapud arawin dalin,Tan oneyag ira sumpad saray syudad na Juda.
17 Sikatoy lusoben da ed paliber a singa saray bantay ed uma,+Lapud sikatoy nanrebelde ed siak,”+ so imbaga nen Jehova.
18 “Ompawil ed sika so mismon kabibilay tan kagagawam.+Agaylan makapaermen so kadederal ya onsabi ed sika,
Ta onsabi itan anggad pusom!”
19 O agaylay ermen ko,* agaylay ermen ko!
Ansakisakit so naliliknak ed pusok.*
Manpukal so pusok.
Agko nayariay manpareen,Ta narerengel ko* so tanol na tambuyog,Say tanda a mangipapasakbay na guerra.*+
20 Nantutumbokan a kadederal so nibalita,Ta aderal la iyan dalin.
Insan biglan aderal iray toldak,Agnambayag et saray abel na toldak.+
21 Anggad kapigan ko nanengneng so tanda,*Tan narengel so tanol na tambuyog?+
22 “Ta makulangkulang iray kabaleyan ko;+Agda ak iimanoen.
Sikaray ananak ya andiay kalakal tan pakatalos.
Masilib* ira ed panaggaway mauges,Balet agda amtay manggawa na maabig.”
23 Anengneng ko so dalin, tan anggapo lay wadtan tan anggapo lay manaayam ditan.+
Ninmengneng ak ed tawen, tan anggapo lay liwawa ra.+
24 Anengneng ko iray kapalandeyan, tan nayeyegyeg iratan,Tan natetenyeg iray kapukdolan.+
25 Anengneng ko, tan anggapoy too ditan,Tan tinmaynan lan amin iray manok.+
26 Anengneng ko, tan nagmaliw lan kalawakan iray tanemay manbubungan kiew,Tan nagba la ray syudad ditan.+
Agawa itan lapud si Jehova,
Lapud mandarlang a sanok to.
27 Ta oniay inkuan nen Jehova: “Magmaliw ya agnapanayaman iyan dalin,+Balet agak sigpot a maneral.
28 Lapud saya et manermen so dalin,+Tan ombilunget so tawen.+
Ta nansalita ak tan nandesisyon ak,Tan agko umanen so kanonotan ko* odino babawien itan.+
29 Diad ungol na saray lalakin akakabayo tan saray managpana,Ombatik so amin a walad syudad.+
Onla rad saray kakiewan,Tan onamot ira ed saray angkakabaleg a bato.+
Nataynanan so kada syudad,Tan anggapoy too a manayam ed saratan.”
30 Natan ta aderal ka la, antoy gawaen mo?
Dati et mankakawes kay ambalbalanga,Mansusulong kay balitok ya alahas,Tan paparakepen moy matam ed panamegley na andeket a pinta.*
Balet anggapoy kakanaan na impanpagangganam,+Ta impulisay ka na saramay manpipilalek ed sika;Labay da ka natan a pateyen.*+
31 Ta walay nadngel kon singa ungol na mansasakit a bii,Singa paniirap na biin mangiyaanak ed panguloan ya anak to,Say boses na anak a bii na Sion ya abot-aboten toy linawa to.
Oniay ibabaga to legan ya akaunat iray lima to:+
“Pakaskasi ak la, ta naksawan ak la* lapud saray managpatey!”
Paimanod leksab
^ Odino “palitek a pinagkatanda.”
^ Odino “Tapok yo ray pagew yo.”
^ Odino “inkakpel.”
^ Odino “inkakpel.”
^ Odino “anta akasabi lad kamarerwa mi so espada.”
^ Personipikasyon iya, a nayarin mangibabalikas na panangasi odino simpatya.
^ Literal, “managbantay,” saramay manbabantay ed syudad pian nanengneng da no kapigan so iyataki.
^ Literal, “saray pait ko.”
^ Literal, “ed saray padir na pusok.”
^ Odino “na kamarerwak.”
^ Odino posiblin, “say tanol na eyag parad guerra.”
^ Odino “palitek a pinagkatanda.”
^ Odino “Marunong.”
^ Odino “agko pagbabawian.”
^ Odino “panagkolor na mata.”
^ Odino “Aanapen da natan so kamarerwam.”
^ Odino “naksawan lay kamarerwak.”
