Jeremias 13:1-27
13 Oniay inkuan nen Jehova ed siak: “La ka, tan mangaliw kay linen a balkes tan ibariber mod awak mo, balet agmo itan ibabasa ed danum.”
2 Kanian angaliw ak na balkes unong ed imbaga nen Jehova tan imbariber kod awak ko.
3 Tan oniay mensahe nen Jehova a sinmabi ed siak diad komaduan pankanawnawa:
4 “Awit mo so sinaliw mon balkes ya akasulong ed sika tan alagey ka, la kad Eufrates tan iyamot mo itan diad sakey a letak na baleg a bato.”
5 Kanian linma ak tan inyamot ko itan ed abay na Eufrates, unong ya ingganggan nen Jehova ed siak.
6 Balet kayari na dakel iran agew et inkuan nen Jehova ed siak: “Alagey ka, la kad Eufrates tan alam diman imay balkes ya impaiyamot kod sika.”
7 Kanian linma ak ed Eufrates tan kinotkot ko tan inalak imay balkes ed angiyamotan ko, tan anengneng ko ya aderal la imay balkes; aglan balot nausar.
8 Insan oniay mensahe nen Jehova a sinmabi ed siak:
9 “Oniay inkuan nen Jehova, ‘Ontan met so paneral kod inkamapaatagey na Juda tan say alabas ya inkamapaatagey na Jerusalem.+
10 Sarayan mauges a totoo ya agda labay a tuloken iray salitak,+ ya ipipilit dan tumboken so puso ra,+ tan ontutumbok irad arum a dirios a panlilingkoran tan pandadakmomoan da, et magmaliw met a singa sayan balkes ya aglan balot nausar.’
11 ‘Ta singa say balkes ya akapeket ed awak na sakey a too, pinagmaliw kon akapeket met ed siak so interon sankaabungan na Israel tan interon sankaabungan na Juda,’ so imbaga nen Jehova, ‘pian magmaliw iran totook,+ gloriak,+ dayew ko, tan sakey a bengatlan marakdakep. Balet ag-ira tinmulok.’+
12 “Tan ipasabim met iyan mensahe ed sikara, ‘Oniay inkuan nen Jehova a Dios na Israel: “Nepeg a panoen na alak so amin a baleg a buyog.”’ Tan oniay iyebat dad sika, ‘Agmi ni sirin amta a nepeg a panoen na alak so amin a baleg a buyog?’
13 Insan ibagam ed sikara, ‘Oniay inkuan nen Jehova: “Panoen ko na alak so amin a manaayam ed sayan dalin,+ saray arari ya akayurong ed trono nen David, saray saserdote tan saray propeta, tan amin a manaayam ed Jerusalem, ya anggad nabuek ira.
14 Tan pambabasigan ko ra ed sakey tan sakey, kaamaan pati ananak,” so imbaga nen Jehova.+ “Agko ra abageyen odino panermenan odino kasian; anggapoy makaamper ed siak no deralen ko ra.”’+
15 Dengel yo tan imano yo.
Agkayo manpapaatagey, ta si Jehova so nansalita.
16 Igloria yo si Jehova a Dios yo,Antis ton pabilungeten so agewTan antis a natiror iray sali yo diad kapalandeyan no mansirunget.
Tatalaranan yoy liwawa,Balet iyakar toy makapal a bilunget;Pagmaliwen to iyan ambilbilunget.+
17 Tan no agkayo ondengel,Onakis ak* ya anggapoy makanengneng lapud inkamapaatagey yo.
Onterter iray luak, tan onagus iray lua manlapud matak,+Lapud naaripen so pulok nen Jehova.+
18 Ibagam ed ari tan ed reyna ya ina to,+ ‘Yurong kayo ed mas abeban pasen,Ta napelag so marakep a korona a walad ulo yo.’
19 Akakapot* iray syudad ed abalaten, tan anggapoy makapangilukas ed saratan.
Amin a totoo ed Juda et nibantak ed arum a dalin.+
20 Tangwa ka tan nengneng mo iramay onsasabi manlapud amianen.+
Kawalaan na samay pulok a niiter ed sika, saray alay abig a karnerom?+
21 Antoy ibagam sano dusaen kaNa saramay maapit ya akikaaroan mo manlapu lad gapo?+
Agta onsabi ed sika so pampasakit, a singa biin manaanak?+
22 Tan sano ibagam ed sarilim, ‘Akin et agawad siak irayan bengatla?’+
Lapud kabaleg na lingom kanian nakal so sapey mo+
Tan apairap a maong iray mukor mo.
23 Nasalatan kasi na sakey a Cusita* so baog to, odino nasalatan kasi na leopardo iray batek to?+
Andi, agyo met sirin nayarian so manggaway maong,Sikayon nipasal a manggaway mauges.
24 Kanian itaytayak ta kayo a singa dayami ya itiktikyab na dagem a nanlapud desierto.+
25 Saya so betang mo, say apag a sinukat ko parad sika,” so imbaga nen Jehova,“Lapud nilingwanan mo ak+ tan nanmatalek kad katilaan.+
26 Kanian ilukayab ko met so sapey mo anggad lupam,Tan nanengneng so kababaingan mo,+
27 Saray pikakalugoran mo+ tan say panungol mo lapud pampilalek,Say makapabaing a pilalawanan mo.
Anengneng ko ray makapadimlan kagagawam.+Diad saray pukdol tan diad uma.
Pakaskasi ka la, O Jerusalem!
Anggad kapigan ka mansiansian agmalinis?”+
