Jeremias 15:1-21
15 Insan oniay inkuan nen Jehova ed siak: “Anggano akaalagey natan ed arapan ko si Moises tan si Samuel,+ agko kasian irayan* totoo. Pataynan mo ra ed arapan ko. Paalis mo ra.
2 Tan no ikuan dad sika, ‘Iner so laen mi?’ ibagam ed sikara, ‘Oniay inkuan nen Jehova:
“Siopaman a parad makapatey a salot, ompatey ed makapatey a salot!
Siopaman a parad espada, ompatey ed espada!+
Siopaman a parad eras, ompatey ed eras!
Tan siopaman a parad pakaaripen, et naaripen!”’+
3 “‘Tan ibakik ed sikara so apatiran kadederal,’*+ so imbaga nen Jehova, ‘say espada a mamatey, saray aso a mangigayugoy, saray manok tan ayayep a mangupot tan maneral.+
4 Tan pagmaliwen ko ran sengegay pakataktakotan na amin a panarian diad dalin+ lapud ari na Juda a si Manases ya anak nen Hezekias, lapud ginawa to ed Jerusalem.+
5 Siopay mangasi ed sika, O Jerusalem,Siopay miambegya ed sika,Tan siopay onsamar a mangumusta ed sika?’
6 ‘Tinaynan mo ak,’ so imbaga nen Jehova.+
‘Naynay mo ak ya ibebeneg.*+
Kanian dusaen ta ka tan deralen ta ka.+
Naksawan ak lan mangaabagey ed sika.*
7 Tan diad saray syudad* na dalin et taepan ko ra pian itikyab ira na dagem.
Pateyen ko iray anak da.+
Deralen ko iray totook,Lapud agda labay a benegan iray kagagawa ra.+
8 Diad arapan ko, saray abalon bibii ed sikara et magmaliw a dakdakel nen saray buer ed dayat.
Diad kaagwan et iyakar ko so managderal ed saray kainaan tan kalangweran a lalaki.
Biglan idapok ed sikara so takot tan gonigon.
9 Kinmapuy la so bii a nananak na pitora;Sikatoy* manpapanabos la.
Sinmelek lay agew to anta kaagwan ni,A sengegay kababaingan tan kipaabeba.’*
‘Tan saramay daiset ya akera ed sikaraEt iter kod espada diad arapan na saray kalaban da,’ so imbaga nen Jehova.”+
10 Pakaskasi ak la, O ina, lapud inyanak mo ak,+Sakey a toon naynay a nipapaarap ed kolkolan tan panlalaban diad sayan dalin.Agak nampabayes odino binmayes;
Balet amin da et isasamba da ak.
11 Inkuan nen Jehova: “Seguradon manggawa ak na maabig ed sika;Seguradon tulongan ta ka diad panaon na kadederal,Diad panaon na gonigon sumpad kalaban.
12 Wala kasi makayarin manemek ed balatyang,Anggan say balatyang a manlalapud amianen, pati say gansa?
13 Iter ko bilang samsam iray kaykayarian yo tan saray kayamanan yo,+Aliwan lapud bayar, noagta lapud amin a kasalanan yo diad amin a nasasakopan yo.
14 Iter ko iratan ed saray kalaban yoPian awiten dad dalin ya agyo amta.+
Ta dinmangat so apoy lapud sanok ko,Tan dinmalang itan ed sikayo.”+
15 Sika so makaamta, O Jehova,Nonot mo ak tan imanom ak.
Ibawian mo ak ed saray mamapasegsegang ed siak.+
Agmo komon aabuloyan a say matantan a pampasnok mo et sengegay ipatey ko.
Nonot mo ya itetepel ko iyan kababaingan lapud sika.+
16 Sinmabi ed siak so salitam, tan kinan ko iratan;+Tan nanggayaga tan nanliket so pusok lapud salitam,
Ta atawag ak ed ngaran mo, O Jehova a Dios na saray armada.
17 Agak yinmurong a kaiba na saray manliliket tan agak akiliket.+
Yinmurong ak a bukor lapud panangiwanwan na limam,Ta pinanom ak na sanok.*+
18 Akin et agla naandi so sakit a naliliknak tan agla natambal so sugat ko?
Agla itan onabig.
Magmaliw ka kasin makapalikdon subol na danumYa agnapanmatalkan?
19 Kanian oniay inkuan nen Jehova:
“No ompawil ka, abobonan ta ka lamet,Tan onalagey kad arapan ko.
No ibiig moy mabli ed saray andi-kakanaan,Magmaliw kan singa mismon sangik.*
Onla rad sika,Balet agka onla ed sikara.”
20 “Pagmaliwen ta kan singa mabiskeg a gansan padir ed sarayan totoo.+
Milaban irad sika,Balet agda ka natalo,+Ta wadia ak a mangiliktar tan mangisalba ed sika,” so imbaga nen Jehova.
21 “Tan iliktar ta kad lima na saray mauges,Tan bawien ta kad lima na saray maruksa.”
Paimanod leksab
^ Odino “anggapo so kamarerwak ed sarayan.”
^ Odino posiblin, “apatiran klase na panangukom.” Literal, “apatiran pamilya.”
^ Odino posiblin, “Naynay kan manaakar a paatras.”
^ Odino “manliliknay pagbabawi.”
^ Literal, “puerta.”
^ Odino “Say kamarerwa to et.”
^ Odino posiblin, “Abaingan tan apabanday itan.”
^ Odino “mensahe na panangukom.”
^ Odino “Magmaliw kan pinagkasangiyan ko.”
