Job 12:1-25
12 Unya si Job mitubag:
2 “Sa tinuod kamo mao ang mga tawo nga nahibalo,
Ug wala nay kaalam inigkamatay ninyo!
3 Apan ako usab dunay pagsabot.*
Ako dili ubos kaninyo.
Kinsa may wala mahibalo nianang mga butanga?
4 Ako nahimong kataw-anan sa akong mga higala,+Kay ako nagtawag sa Diyos ug naghulat sa iyang tubag.+
Ang tawong matarong ug walay ikasaway gihimong kataw-anan sa uban.
5 Kadtong tawo nga walay kabalaka nagtamay sa kalamidad,Siya naghunahuna nga kini alang lamang niadtong mga misarasay.*
6 Ang mga tolda sa mga tulisan malinawon,+Ug kadtong nagpasuko sa Diyos may kasegurohan,+Sila kinsa nagdaladala sa ilang mga diyos diha sa ilang mga kamot.
7 Apan palihog, pangutan-a ang mga hayop, ug sila magtudlo kanimo;Ug usab ang mga langgam sa kalangitan, ug sila mosulti kanimo.
8 O hatagig pagtagad ang* yuta, ug kini magtudlo kanimo;Ug ang mga isda sa dagat mopahayag niini kanimo.
9 Kinsa kanilang tanan ang wala mahibaloNga ang kamot ni Jehova maoy nagbuhat niini?
10 Anaa sa iyang kamot ang kinabuhi sa matag buhing linalangUg ang espiritu* sa matag tawo.*+
11 Dili ba timbangtimbangon sa dalunggan ang mga pulongUg tilawan sa dila* ang pagkaon?+
12 Dili ba ang kaalam anaa sa mga tigulang,+Ug dili ba ang pagsabot anaa niadtong taas ug kinabuhi?
13 Anaa sa Diyos ang kaalam ug pagkagamhanan;+Siya dunay katuyoan ug pagsabot.+
14 Dihang duna siyay lumpagon, kini dili na matukod pag-usab;+Ang iyang gisirhan, walay tawong makaabli.
15 Dihang iyang pugngan ang ulan, ang yuta mamala;+Dihang siya magpaulan, ang yuta magbaha.+
16 Anaa kaniya ang kusog ug ang praktikal nga kaalam;+Anaa sa iyang kamot ang nahisalaag ug ang nagpahisalaag;
17 Iyang gipalakaw nga nagtiniil* ang mga magtatambag,Ug iyang gihimong buangbuang ang mga maghuhukom.+
18 Iyang gibadbad ang mga gapos sa mga hari,+Ug iyang gibaksan ang ilang mga hawak.
19 Iyang gipalakaw nga nagtiniil ang mga saserdote,+Ug iyang gipukan ang gamhanang mga magmamando;+
20 Iyang gipahilom ang kasaligang mga magtatambagUg gikuhaag salabotan ang mga tigulang;*
21 Iyang gibuboan ug pagtamay ang mga halangdon,+Ug iyang gipahuyang ang mga gamhanan;*
22 Iyang gipadayag ang lawom nga mga butang gikan sa kangitngit,+Ug iyang gipadan-ag ang kahayag diha sa mga dapit nga hilabihan ka ngitngit;
23 Iyang gipadako ang kanasoran aron iyang malaglag sila;Iyang gipalapad ang kanasoran aron sila iyang mabihag.
24 Iyang gikuha ang pagsabot* sa mga pangulo sa katawhanUg gipalatagaw sila sa kamingawan nga walay dalan.+
25 Sila mangapkap sa kangitngitan,+ diin walay kahayag;Iya silang gipalatagaw samag mga hubog.+
