Job 36:1-33
-
Gituboy ni Elihu ang dili matukib nga pagkagamhanan sa Diyos (1-33)
36 Si Elihu mipadayon:
2 “Dugangi pa ang imong pailob kanako samtang magsaysay ko,Kay duna pa koy isulti bahin sa Diyos.
3 Isulti nako nga detalyado ang akong nahibaloan,Ug akong ipahayag nga ang pagkamatarong iya sa akong Magbubuhat.+
4 Sa pagkatinuod ang akong mga pulong dili bakak;Kini naggikan sa Usa nga hingpit sa kahibalo.+
5 Oo, ang Diyos gamhanan+ ug dili mosalikway kang bisan kinsa;Siya lawom ug pagsabot.
6 Dili niya tipigan ang kinabuhi sa mga daotan,+Apan hatagan niyag hustisya ang mga dinaogdaog.+
7 Dili niya ibulag ang iyang mga mata gikan sa mga matarong;+Iya silang palingkoron sa trono uban sa mga hari,*+ ug sila pagabayawon hangtod sa hangtod.
8 Apan kon sila gikadenahanUg nagapos sa pisi sa kasakitan,
9 Iyang sultihan sila sa ilang nahimo,Sa ilang mga kalapasan tungod sa ilang garbo.
10 Iyang buksan ang ilang igdulungog alang sa pagtul-idUg sultihan sila nga talikdan ang pagkadaotan.+
11 Kon sila motuman ug moalagad kaniya,Sila magkinabuhi nga mauswagon,Ug ang ilang mga tuig magmalipayon.+
12 Apan kon dili sila motuman, sila mamatay pinaagig espada*+Ug mamatay nga walay kahibalo.
13 Ang mga walay Diyos* maghambin ug kasuko.
Sila dili motuaw alang sa tabang bisan pag sila iyang gaposon.
14 Sila mangamatay samtang batan-on pa,+Tungod sa ilang pagpakig-uban* sa mga lalaking pampam* sa templo.+
15 Apan luwason sa Diyos* ang mga sinakit panahon sa ilang kasakitan;Ug iyang buksan ang ilang igdulungog dihang sila daogdaogon.
16 Iya kang ipahilayo sa kasakitan+Ug dad-on ngadto sa lapad nga luna, nga walay restriksiyon,+Nga may lamiang pagkaon sa imong lamesa aron ikaw hupayon.+
17 Unya ikaw matagbaw gayod sa paghukom sa daotan,+Dihang ipakanaog ang hukom ug ipatigbabaw ang hustisya.
18 Apan pagbantay kay basig mamiaybiay ka* tungod sa imong grabeng kasuko,+Ug ayawg itugot nga mapahisalaag ka tungod sa dakong hiphip.
19 Ang imo bang pagtuaw alang sa tabangO ang imong grabeng mga paningkamot makapahilayo kanimo sa kasakitan?+
20 Ayawg pangandoya ang kagabhion,Dihang ang mga tawo mawala sa ilang dapit.
21 Pagbantay nga dili ka moliso sa paghimog daotan,Nga magpili niini inay sa kasakitan.+
22 Tan-awa! Ang Diyos binayaw tungod sa iyang gahom;Kinsa ba nga magtutudlo ang sama kaniya?
23 Kinsay nagtultol kaniya* sa iyang dalan+O miingon kaniya, ‘Sayop ang imong gibuhat’?+
24 Ayawg kalimot sa pagdayeg sa iyang mga buhat,+Nga bahin niana ang mga tawo nanag-awit.+
25 Ang tanang katawhan nakakita niana,Ang tawo nagtan-aw niana gikan sa layo.
26 Oo, dili nato bug-os masabtan kon unsa ka gamhanan ang Diyos;+Ang gidaghanon sa iyang mga tuig dili maihap.*+
27 Iyang ipasaka ang mga tinulo sa tubig;+Dayon kini mahimong gabon ug ulan;
28 Unya ang mga panganod magbubo niini;+Kini moulan nganha sa katawhan.
29 Duna bay makasabot sa pagkalut-od sa mga panganod,Ug sa pagdalugdog gikan sa iyang tolda?*+
30 Tan-awa kon giunsa niya pagpakidlap ang kilat*+ diha nianaUg kon giunsa niya pagtabon ang kahiladman* sa dagat.
31 Pinaagi niini iyang ginatagan-an ang* katawhan;Siya naghatag kanilag dagayang pagkaon.+
32 Iyang kumkomon ang kilat,Ug ipuntirya kini sa ig-onon niini.+
33 Ang iyang dalugdog nagsaysay bahin kaniya,Bisan ang kahayopan mosulti kon kinsay* moabot.
Mga Footnote
^ O posible, “Siya mag-entrono ug mga hari.”
^ O “hinagiban.”
^ O “mga apostata.”
^ O posible, “Matapos ang ilang kinabuhi uban.”
^ Literal, “niya.”
^ O “mopakpak ka nga mabiaybiayon.”
^ O posible, “nagsaway kaniya; nagpatawag kaniya aron husayon siya maylabot.”
^ O “dili matukib.”
^ Literal, “balongbalong?”
^ Literal, “kahayag.”
^ Literal, “mga gamot.”
^ O posible, “gilabanan ang kawsa sa.”
^ O posible, “unsay.”
