Yesaia 9:1-21
9 Nahan kpa, ime ia wa er i yange i wa shighe u tar la lu ken ican la ga, man er i yange i wa shighe u i lu eren a tar u Sebulon man tar u Nafetali dang la nahan ga.+ Kpa shighe a karen yô, Aôndo una na u ua lu a icivir—ka gbenda u hen kpezegemnger, hen haregh u Yordan, Galilia u atôatyev je la.
2 Ior mba yange ve lu zenden ken ime la,Ve nenge a iwanger i vesen.
Mba ve lu ken angôghime la di,Iwanger ta sha a ve.+
3 U er ikyurior la ngee kpishi;U na i ityôkyaa i ember tsung.
Ngi ember sha ishigh you,Er ior ka ve ember sha shighe u sunda nahan,Man er ior ka ve ember shighe u ve lu karen ishar la nahan.
4 Gadia u hembe igbur i ve tee ikyav a mi la avur avur,Man gbough ku sha akende a ve, kua gbough ku or u eren ior ican,Er lu sha iyange i i hemba Midian ityav la nahan.+
5 Hanma ikyôvor ki ki ndyar inya i tengerMan hanma ikyondo i i nyer awambe yô,Vea hia ken usu.
6 Gadia i mar se wan,+I na se wan u nomso;Hementor* ua lu sha akende a na.+
A yilan un ér Orwankwagh u Kpilighyol,+ Aôndo u Ageegh,+ Ter u Tsôron, Wantor u Bem.
7 Hementor* na ua lu seer a seerShi bem una lu zan zan a ikighir shio,+Sha ikyônough ki torough ki Davidi+ man ken tartor na kpaa,Sha er a ver u u de tenger mayange ga,+ shi a taver uSha ijirôron i mimi+ man perapera,+Hii hegen je zan zan gbem sha won yô.
Gbashima u Yehova u akum a sha una er kwagh ne.
8 Yehova kaa ér kwagh a tser Yakob,Nahan kwagh a tser Iserael.+
9 Ior cii vea fa kwagh shon—Eferaim man ior mba ken Samaria—
Mba ka ve ôr kwagh sha ihyagh man sha icihi la, ér:
10 “Ayou a i maa sha akamyô gba,Kpa se maa sha awen a kuan.+
I gber ikyon i sikamor,Kpa se lôô ikyon i sedar sha ityough ki ingila.”
11 Yehova una va a mbahyomov mba Reshin vea va ta ityav sha a naShi una mgbegha mbahyomov nav vea va ityav,
12 Shiria una va sha ityoughkitaregh, Mbafiliti di vea va shin ityôtar,+Vea aver ijô vea ya Iserael.+
Nahan cii kpa, ishima de u vihin un ga,Kpa a naregh uwegh nagh her sha u nan mtsaha.+
13 Gadia ior hide hen Un u a tsaha ve la ga;Ve ker Yehova u akum a sha ga.+
14 Yehova una tôndo ityough man tsa,tombo man awoo* ken Iserael kera sha iyange i môm.+
15 Ityough kira ka tamenor u i ne nan icivir kpishi yô,Tsa la gema ka profeti u wan ior kwagh u aiegh.+
16 Ior mba ve hemen ior mban la na mba zenden wue wue,Shi tsume mba i lu hemen ve la.
17 Ka nahan ve a saan Yehova iyol a agumaior a ve ga ye,Shi mhôônom ma a kôr un a ônov vev mba lun a ter ga la* ga, man kasevmbacôgholov vev kpaa ga ye,Sha ci u ve cii ka mba vendan mimi man aferaior,+Shi hanma zwa ngu ôron ibumekwagh.
Nahan cii kpa, ishima de u vihin un ga,Kpa a naregh uwegh nagh her sha u nan mtsaha.+
18 Gadia iferkwagh ka i hia kwagh er usuKa u hia mbaasaa man toho nahan.
Ia nande ikyô i wan civirii,Nahan mnyim ma ikyô i i lu hian la ma a kôndo sha lôgh lôgh.
19 Tar la ngu hianSha ci u ishima i i vihi Yehova u akum a sha tsung la,Nahan ior vea hia ken usu.
Or môm nana yima anmgbian u nan je kpaa ga.
20 Or nana tôndo inyam ken uwegh ku iyanKpa ijen a lu kôron nan her;Shi or nana ya kwagh ken uwegh ku imeseKpa a kuma nan ga.
Hanma or nana ya inyam i uwegh ku nan,
21 Manase una ya Eferaim,Eferaim kpa una ya Manase.
Ve cii vea kohol a lu num a Yuda.+
Nahan cii kpa, ishima de u vihin un ga,Kpa a naregh uwegh nagh her sha u nan mtsaha.+
