Yesaia 38:1-22
38 Sha ayange la, Hesekia gba angev je lu nôngon ku.+ Tsô profeti Yesaia+ wan u Amoshi va, va kaa a na ér, “Ka kwagh u Yehova a ôr je ne, ér: ‘Ôr mba hen ya wou akaa a vea er yô, sha ci u u kpe; u mough angev mbun ga.’”+
2 Tsô Hesekia gema ishigh na ken kpekpe, a gba eren msen hen Yehova kaan ér:
3 “M zamber we Yehova, wea lumun yô, umbur+ er m zende sha ishigh you sha mimi man a ishima i môm,+ shi m er kwagh u dedoo sha ishigh you yô.” Maa Hesekia gba vaan tsung.
4 Nahan Yehova ôr kwagh a Yesaia kaa ér:
5 “Hide za ôr a Hesekia+ wer, ‘Ka kwagh u Yehova, Aôndo u Davidi teru u tamen a ôr je ne, ér: “M ungwa msen wou.+ M nenge a mliam ou.+ Nenge, me seer we anyom 15 sha ayange a uma wou,+
6 shi me yima u kua gar ne sha ikyev i tor u Ashiria, shi me kura gar ne.+
7 Ka ikyav i Yehova i tesen we ér Yehova una er kwagh u a kaa la je ne:+
8 Nenge! Me er mure u iyange u a gbe sha angahar a unden* a Ahashi la, una hide ken ijime angahar pue.”’”+ Nahan mure la hide ken ijime angahar pue sha angahar a unden la, shin er vande gban sha angahar a unden la kar yem ken hemen nahan kpaa.
9 Ka kwagh u Hesekia tor u Yuda nger shighe u gba angev mough je ne.
10 M ôr mer: “Er m lu a bee iyol ga ne,Gba kpee u me nyôr sha ihinda i Uwaregh.*
A yangem u lun uma sha anyom a m shi a mi la.”
11 M ôr mer: “Me kera nenge a Yehova* ga, een, me kera nenge a Yehova* ken tar u mbaumav ga.+
Shighe u me lu vea ior mba ve tem hen ijiir i uma a lu ga la,Me kera kenger sha uumace ga.
12 I dugh ijiir yam i teman sha, i kar a i hen a mo kera,+Er tenti u orkuranilev nahan.
M hure uma wam sha, er or u tumen akondo ka nana tume ikyondo a bee ve nan hure kera nahan;A tôndo uma wam kera, er ka i tôndo mou mba ve yem jighilii sha ikyondo kera nahan.
U ngu zan a mo ken mtim pepe zan zan tugh.+
13 M tema girgir zan zan pepe.
A za hemen u hemben akuhe a am cii, er begha nahan;U ngu zan a mo ken mtim pepe zan zan tugh.+
14 M za hemen u eren imo, er gbargbar shin icaregh* nahan;+M zer eren imo er ikyungugh nahan.+
Ashe a am kenger sha, zunguluu:+
‘Yehova, m nyôr ken ican i vesen;Yô, wasem!’+
15 Shi me ôr mer nyi?
A ôr kwagh shi a er kwagh shon.
Me zende a iyolhiden ijime sha ayange a am ciiSha ci u ican yam i vihin tsung la.
16 ‘Yehova, ka sha akaa ne* hanma or ka nan lu uma ye,Shi ka sha a, iôôn i uma wam i lu ye.
U na me hide me lu gbang gbang shi u kura uma wam.+
17 Nenge! U ma m lu ken bem yô, m gema m ya ican tsung;Kpa er kwagh wam a doo u yum yô,U kuram m gba shin ihyungwa i mtim ga.+
U haa asorabo a am cii ken ijime you.*+
18 Gadia Uwar* ua fatyô u civir we ga,+Shi ku ua fatyô u wuese we ga.+
Ior mba ve sen shin ihyungwa la vea fatyô u veren ashe a mimi wou ga.+
19 Mbaumav, een mbaumav yô, vea fatyô u wuese we,Vough er m er nyian nahan.
Ter nana fatyô u nan ônov mba nan mfe sha kwagh u mimi wou.+
20 Yimam, Yehova,Nahan se wa u atsam a am sha akaa a kuhwan kwagh a lun a ikyar+Hen iyou i Yehova sha ayange a uma wase cii.’”+
21 Yesaia maa kaa ér: “Va a ijen i atam a tur a uman a i kam yô, va shighe sha ityundu la, sha er angev mbua bee un yô.”+
22 Hesekia pine ér: “Ka ikyav i nyi i lu i tesen ér me kôndo me za sha iyou i Yehova?”+
Ngeren mba shin kpe
^ Alaghga angahar a unden ne ka a ôron shighe, er anar u wasen or u fan shighe sha iyange nahan.
^ Shin “Sheol,” ka uwar u uumace je la. Nenge Ngeren u Pasen Asember.
^ Ken zwa Heberu yô, i nger iti i Yehova ne heen tiônôô.
^ Ken zwa Heberu yô, i nger iti i Yehova ne heen tiônôô.
^ A fatyô u lun, “hulô.”
^ Ka mkaanem ma Aôndo man akaa a a er je la.
^ Shin “u kar a asorabo a am cii sha ishigh you kera.”
^ Shin “Sheol,” ka uwar u uumace je la. Nenge Ngeren u Pasen Asember.
