Yesaia 7:1-25
7 Sha ayange a Tor Ahashi+ wan u Yotam wan u Ushia tor u Yuda la, Reshin tor u Shiria man Peka+ wan u Remalia tor u Iserael, kôndo va u va nôngon ityav a Yerusalem, kpa a* fatyô u ngohol un ga.+
2 Tsô i za kaa a ya u Davidi ér: “Mbautyaav mba Shiria za kohol Eferaim.”
Nahan cier Ahashi man ior nav iyol, ve gba gbidyen akarkase iyol, er ikyon i ken ikyô i ahumbe ka a daase a mi la nahan.
3 Yehova maa kaa a Yesaia ér: “Due za, za kohol Ahashi, we man wan wou Shear-yashubi,*+ hen ikighir i gôngormnger u ityungu i sha,+ u a lu sha gbenda u vesen u zan ken sule u orkirenakondo la.
4 Kaa a na wer, ‘Nôngo ishima i de ze u iyol ga. De cie ga, shi de yen ishima sha ci u ve mba uhar mba ve lu er akpughur a ikyon a duen mnyim la ga, man sha ci u ishima i i vihi Reshin man Shiria man wan u Remalia tsung la kpaa ga.+
5 Gadia Shiria vea Eferaim man wan u Remalia ve zua zwa ér vea er u iferkwagh, mba kaan ér:
6 “De se kôndo se za ta nen ityav sha Yuda, se ande un ker* se ngohol un* sha ci wase, nahan se ver wan u Tabeel a hingir tor na.”+
7 “‘Ka kwagh u Yehova Ter u Hemban Cii a kaa je ne, ér:
“Kwagh la una er ga,Shi kwagh a lu nahan kpaa ga.
8 Gadia gartamen u Shiria ka Damaseku,Tor u Damaseku gema ka Reshin.
Ken atô u anyom 65 tseegh,A tim Eferaim gburu gburu, una kera lu ikyurior ga.+
9 Gartamen u Eferaim ka Samaria,+Tor u Samaria gema ka wan u Remalia.+
Saa ne lu a jighjigh u nan taveraa,Gayô ne fatyô u taver dông ga.”’”
10 Yehova za hemen u ôron kwagh a Ahashi, ér:
11 “Pine Yehova Aôndo wou a tese u ikyav;+ ikyav ne ia fatyô u zan shimi er Uwar* shin ia tav er kwavaôndo nahan.”
12 Kpa Ahashi kaa ér: “Me pine ga, shi me kar Yehova kpaa ga.”
13 Yesaia maa kaa ér: “Wea lumun yô, kegh ato, we ya u Davidi. Aluer ne kar ishimawan i uumace yô kuma gaa? Saa shi ne kar ishimawan i Aôndo kpaa?+
14 Sha nahan yô, Yehova iyol na una tese u ikyav ne: Nenge! Gumkwase* una wa iyav una mar wan u nomso;+ una ii un iti ér Imanuel.*+
15 Una yaan bôta* man iyough hen shighe u una fa u vendan kwaghbo geman tsuan kwagh u dedoo la.
16 Kpa cii man wannomso la a fa u vendan kwaghbo geman tsuan kwagh u dedoo yô, a undu tar u utor uhar mba u cie ve la vindi vindi.+
17 Yehova una de, we man ior ou kua ya u teru, ne nyôr ken shighe u hii sha iyange i Eferaim undu Yuda la je ne lu a nyôr ker ga yô.+ Gadia Aôndo una va a tor u Ashiria.+
18 “Sha iyange la, Yehova una tôngo hondo una yila ankaam ma purugh ma ken iwagh i icaa i Nil ken Igipiti, man iyough i ken tar u Ashiria;
19 ve cii vea va vea va haa shin upev mba* zan gbeng man ken ikwe i avandegh, man sha mbaasaa cii, man sha ajiir a lun a mngerem cii.
20 “Sha iyange la, Yehova una hondo ice i sha ityo man ice i shin angahar, shi una torough ice i shin gbem kpa kera, a atsem u i za goho hen haregh u Ifi yô,* sha ikyev i tor u Ashiria.+
21 “Sha iyange la, or nana de gumbua u ken ikyumuile una lu uma kua iyôngo ihiar.
22 Shi er atumba aa lu kpishi yô, nana ya bôta,* sha ci u hanma or u nan shi ken tar la nana ya bôta* man iyough.
23 “Ape yange atine a wain 1,000 lu, i kuma u a tee sha agbenger a azurufa 1,000 la, a lu mbaasaa man toho tseegh vea lu her ye.
24 Ior vea za her a ada man ivaan, sha ci u tar la cii ua hingir a mbaasaa man toho.
25 Shi iwo i ngise i huran sha gbaa la cii, u za ikyua her ga sha ci u u lu cian mbaasaa man toho; ia hingir ijiir i anomabua aa yaan toho shi iyôngo ia ndyaren angahar yô.”
Ngeren mba shin kpe
^ Shin a fatyô u kaan ér, “ve.”
^ Inja na yô ér, “Ka Ior mba Ve Shi la Tseegh Vea Hide Ye.”
^ Shin a fatyô u kaan ér, “se ta un mciem iyol.”
^ Shin “se hembe ukpekpe nav.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “Iniuunkwase.”
^ Inja na yô ér, “Aôndo Ngu a Vese.”
^ Ka i yila ishember ne ken zwa Buter ér butter. Ka i zua a bôta ken atumba.
^ Shin “iwagh i.”
^ Ka Ifi u Uferati je la.
^ Ka i yila ishember ne ken zwa Buter ér butter. Ka i zua a bôta ken atumba.
^ Ka i yila ishember ne ken zwa Buter ér butter. Ka i zua a bôta ken atumba.
