Yesaia 31:1-9
31 Kwagh a tser mba ka ve sen ve za shin Igipiti ér i wase ve la,+Ve mba ve suur sha anyinya,+Ve suur sha akekeautya sha ci u nga kpishi la,Kua sha anyinya a utya* sha ci u nga a agee la.
Kpa mba keren iwasen hen un u a lu Icighan u Iserael la ga,Mba keren Yehova ga.
2 Kpa ngu a kwaghfan, nahan una va a kwaghtseren,Shi una hide a mkaanem ma a ôr ga.*
Una mough a nôngo ityav a ya u mbaaferevKua mba ve wasen mbaasorabo la.+
3 Kpa Mbaigipiti ka uumace mba kaka ne, mba Aôndo ga;Anyinya a ve ka zendenya tsô, ka jijingi ga.+
Shighe u Yehova una naregh uwegh nagh yô,Hanma or u nana na iwasen cii nana nôngo gbeevShi hanma or u a wase nan cii nana gba;Ve cii vea tim hen shighe môm.
4 Gadia ka kwagh u Yehova a kaam je ne, ér:
“Er gumbegha* u lun a agee ka una kôr inyam ve a kpela ikyer nahan,Shighe u nongo u mbakuranilev ve kohol imôngo ve va te num sha a na,Kpa a cie imo ve ga,Shi kwagh a gbe un sha ayôôso a ve eren ga nahan,Kape Yehova u akum a sha una sen u za nôngon ityavSha ci u Uwo u Shion man sha ci u igyungu na je la.
5 Er inyon i purugh ka i sen sha agee nahan,Kape Yehova u akum a sha una nôngo kwagh sha ci u Yerusalem je la.+
Una nôngo kwagh sha ci na, una yima un.
Una de un una lu her shi una war un.”
6 “Ne ior i Iserael, hide nen hen Un u ne hembe un ato sha apera la.+
7 Gadia sha iyange la, hanma wen nana venda mbaaôndo mba nan mba gbilinigh mba sha azurufa man mbaaôndo mba nan mba gbilinigh mba sha zanaria, mba ave a ou a er, i lu isholibo la.
8 Shi Ashiria una kpe sha sanker, kpa a lu sha sanker u or ga;Una kpe sha sanker, kpa a lu sanker u orumace una tim un ga.+
Una yevese sha ci u sanker,Shi a kighir agumaior a na vea er tom u kpan.
9 Vande na ua kar kera sha ci u mciem tseegh tsô,Shi mbahemenev nav vea gbidye akarkase iyol sha ci u tuta,” kape Yehova a kaa la,Un u iwanger* na i lu ken Shion shi usu na u yeghen ibyugh ibyugh u lu ken Yerusalem la.
