Yesaia 46:1-13
46 Aôndo u Bel man aôndo u Nebo mba er uumace mba ve ngurum nahan.+
Ve kange ieev vev sha uzendenya, uzendenya mba tôôn ikyav,+Er ikyav mbi mbi yoho uzendenya mba ve vôr nahan.
2 Ve ngurum, ve gure inya imôngo;Vea fatyô u yiman ikyav mbira ga,*Shi ve ayol a ve vea yem uikyangen.
3 “Kegh ato a mo, we ya u Yakob, kua ne mba ne shi hen ya u Iserael la cii,+Ne mba m nenge sha a ven hii shighe u i mar ne la je, een, hii shighe u ne lu ken uya la je.+
4 Zan zan ne bee iyol kpa me gema ga;+Zan zan ne mende ivu kpa me de u suen ne ga.
Me tôô ne, me sue ne, shi me yima ne, er m vande eren nahan.+
5 Ka an ne tôôm ne kar sha a nan, shin ne erem m lu kwagh môm a nan, gayô ne karem sha a nan,+Sha er se lu kwaghmômô?+
6 Ior mba, mba ka ve dugh zanaria kpishi ken ikpa ve, ve vihi yô;Ka ve kar myohom ma azurufa.
Ka ve tôô orvareniwa tom, nahan nan gema un nan er an-aôndo a mi.+
Maa ve ngurum, een, ve civir un.*+
7 Ve tôô un ve penda sha akende;+Ve yem a na ve za penda hen ijiir na, a gba tilen her tsô.
A tenger hen ijiir i i ver un la ga.+
Ve vaa ve yila un, kpa a bugh zwa ga;Una fatyô u yiman or môm ken ican ga.+
8 Umbur nen kwagh ne, nahan taver nen ishima.
Kwagh ne a de hungur ne ga, ne mbaperenatindi.
9 Umbur nen akaa a tse* a ngise la,Er mo m lu Aôndo, dugh mo kera yô, Aôndo ugen a lu ga yô.
Mo m ngu Aôndo, dugh mo kera yô, orgen nan ngu er mo ga.+
10 Ka m tsengaôron kwagh u una va er ken hemen la ken mhii,Shi ka m tsengaôron ken ijime ica akaa a a lu a vande eren ga yô.+
M kaa mer, ‘Kwagh u m tsough la,* kwagh a gema sha mi ga,+Shi me er nyityôkwagh i m soo cii.’+
11 M ngu yilan an-inyon u yan inyam ape iyange i dugh* la,+M ngu yilan or u ken tar u icaa mer nana va er kwagh u m tsough la.*+
M ôr kwagh, shi me er un.
M wa ishima u eren un, shi me er un kpaa.+
12 Kegh nen ato a mo, ne mba ne lu a ishima i ungwan kwagh ga ne,Ne mba ne gbe ica a perapera ne.
13 M va a perapera wam ikyua;Ngu ica ga,Shi myom wam una timbir ga.+
Me na myom ken Shion, me na Iserael icivir yam.”+
