Yesaia 3:1-26
3 Gadia nenge! Ter u mimi, Yehova u akum a sha,Ngu karen a hanma iwasen man hanma kwagh u a ne Yerusalem man Yuda la cii kera;Una kar a hanma iwasen i kwaghyan man mngerem kera,+
2 Me kar a or u ageegh kera man orutyaMan orjir man profeti+ man orkpehenishor kua ortamen,
3 Me kar a or u hemen iorov 50+ kera, kua shagbaor man or u wan or kwagh,Man or u nan fe ahir a eren tsema tsema, kua or u nan fe akombo a eren tsembelee cii kera.+
4 Me gema mbayev vea hingir mbahemenev vev,Shi upepepe-mbaiorov* vea hemen ve.
5 Ior vea na ayol a ve ican,Hanma or a or u nan.+
Wanye nana ta num sha orbeenyol,Shi or u sha kwarkyaa ga nana hendan kwagh a or u i ne nan icivir yô.+
6 Hanma or nana kôr anmgbian u nan u hen ya u ter u nan sha uwe, nana kaa er:
“U ngu a ikyondo—nahan hemen se.
Nengen sha atihi a alôgh a a lu hen inya ne.”
7 Kpa sha iyange la, nana venda, nana kaa ér:
“Me lu or u kangen* ne avav ga;M ngu a kwaghyan shin ikyondo hen ya wam ga.
De kaan nen ner m hemen ior ga.”
8 Gadia Yerusalem nôngo gbeev,Shi Yuda gba,Sha ci u mba hendan kwagh a Yehova sha mkaan man sha ieren;Ve hemba ato sha ishigh ki un u a engem la.*+
9 Mshim vem tese ér mba a ibo,Isholibo ve due ken igbar er Sodom nahan;+Mba nôngon ér vea yer i̱ ga.
Kwagh a tser ve, sha ci u mba van a kwaghbo sha ayol a ve!
10 Kaa nen mbaperapera ner, kwagh a za a ve a doo;A na ve injar sha kwagh u ve eren yô.*+
11 Kwagh a tser iferor!
Kwaghbo una va sha a nan,Gadia a er nan kwagh u ave a nan a er la!
12 Ior av yô, ior vev mbanan tom wa tswam,Shi kasev mba hemen ve.
Ior av, mbahemenev enev na ne mba zenden wue wue,Shi mba tsumen a igbenda yen.+
13 Yehova tile hen ijiir na sha u una na ibo;A tile sha, ér una ôr ior ijir.
14 Yehova una tema ijir a mbatamen man mbahemenev mba ior nav.
“Ne nande sule u ikyon u wain,Kwagh u ne ii mbaatsanev la ngu hen uya enev.+
15 Ne cihi ne njighe ior avShi ne kôô mshim ma atsanaior hen inya ner nyi?”+ kape Ter u Hemban Cii, Yehova u akum a sha a kaa la.
16 Yehova kaa ér: “Er ônkasev mba Shion ve we ihyagh,Ve lu zenden sha shagba,*Nyiar ashe, yaren kwan,Shi uvan asa a ve a shin angahar yô,
17 Yehova kpa una ta ônkasev mba Shion lagh sha ityo,Shi Yehova una na vea kpur ityough.+
18 Sha iyange la, Yehova una ngohol mbaagba vev mba doonashe mbara kera,Kua utsar vev mba kangen sha ityo man ikyav vev mbi hweev, mbi lun er vegher-uwer nahan la,+
19 Man mbaabinkwini* man mbaagba man akondo a cirin sha ishi,
20 Man mbaadikpo man asa a shin angahar man ikyange i tsulen sha vanger,Man akpe a senti man akpagher,
21 Man ikyunya i sha ahôaveegh man ikyunya i sha ahenga,
22 Man akondo a zan iniongo man akondo a haan iyol man akondo a zeren man ankpaam ma kôron hen uwe,
23 Man ujingi mba kiriki+ man akondo a huan,*Man akondo a kangen sha ityo kua akondo a cirin sha ishi.
24 Er ve hom iyol i doo er mkurem ma balsam nahan kpa,+ vea huma er kwaghhôôn nahan;Er ve tsur kwange nahan kpa, a lu kor vea va tsule ye;Er ve er ityough i doo u kenger nahan kpa, vea va kpur ityough;+Er ve hoo ikyondo i taver ishe nahan kpa, a lu ibyashôhô* vea va hua ye;+Shi er ve doo ashe nahan kpa, vea va lu a ayor.
25 A wua nomso enev sha sanker,Man nomso enev mba ageev ken utya.+
26 Ihindagar i Shion ia vaa shi ia zungwe,+Una shar hen inya aveve.”+
