Yesaia 36:1-22
36 Ken inyom i sha 14 i Hesekia tema tor la, Senakeribi tor u Ashiria+ kôndo va ta ityav sha agar a Yuda, a i wa a ugir mba taver la cii, ngohol a.+
2 Tor u Ashiria maa tindi Rabeshake*+ a ikyumutya i vesen hen Lakishi+ ér, ve za hen Tor Hesekia ken Yerusalem. Ve kôndo ve za tile hen gôngormnger u ityungu i sha,+ u a lu sha gbenda u vesen u zan ken sule u orkirenakondo la.+
3 Maa Eliakim+ wan u Hilkia u nengen sha ya u tor la, man Shebena+ u lu akawe la, kua Yoa wan u Asav u lu orngeren la, ve due ve va hen a na.
4 Tsô Rabeshake kaa a ve ér: “Nea lumun yô, kaa nen a Hesekia ner, ‘Ka kwagh u zegetor, tor u Ashiria a kaa je ne, ér: “Ka nyi u suur sha mi ve u lu a vangertiôr nahana?+
5 U ngu kaan wer, ‘M fa kwagh u me er yô, shi m ngu a tahav mbu nôngon ityav,’ kpa mkaanem man ka ma gbilinigh tsô. Ka sha an u suur ve, u cihi u hembem ato?+
6 Nenge! U ngu suur sha Igipiti, u a lu er iyiagh ki ki sombo ne wer a wase u, man yô aluer or suur sha ki yô, kia kuma nan ken ikyevwe a pev. Kape Farou tor u Igipiti a lu hen mba ve suur sha a na la cii je la.+
7 Man aluer u kaa a mo wer, ‘Se mba suur sha Yehova Aôndo wase yô,’ kera ka un Hesekia a bee a ajiir a na a taven man atse a na a nan nagh,+ a gem a kaa a Yuda man Yerusalem ér, ‘Gure nen sha ishigh ki atse a nan nagh ne’ ga zee?”’+
8 Nahan hegen nea lumun yô, ta ase nen hwande a terem tor u Ashiria:+ Mo me na ne anyinya 2,000 aluer ne fatyô u zuan a mbahendan a cii yô.
9 Aluer ne mba suur sha Igipiti ner, a na ne akekeautya man mbahendananyinya yô, a er nan ve ne fatyô u hemban gomna môm, u a hembe gban ijime ken mbatomov mba terem la sha wono?
10 Ka Yehova a nem ian ér m kôndo m va ta ityav sha tar ne, m tim u kera gaa? Yehova iyol na kaa a mo ér, ‘Kôndo va ta ityav sha tar ne, tim u kera.’”
11 Tsô Eliakim man Shebena+ man Yoa kaa a Rabeshake+ ér: “Wea lumun yô, lam a mbayev ou ken zwa Aram,*+ sha ci u se mba ongo u; de lamen a vese ken zwa u Mbayuda wer ior mba ve lu sha kpekpe la ve ungwa ga.”+
12 Kpa Rabeshake kaa ér: “Ka hen teru man hen a we tseegh, terem a tindim ér m va ôr mkaanem man yee? Ka hen ior mba ve tem sha kpekpe, ve mba vea ya ambi a ve, shi vea ma mnyandem vem a ven imôngo la kpaa a tindim ye gaa?”
13 Rabeshake maa tile ôr kwagh genger genger ken zwa u Mbayuda,+ kaa ér: “Ungwa nen mkaanem ma zegetor, tor u Ashiria ne.+
14 Ka kwagh u tor a kaa ne, ér, ‘De deen nen ner Hesekia a bume ne ga, gadia una fatyô u yiman ne ga.+
15 Shi de deen nen ner Hesekia a na ne suur sha Yehova,+ a kaan ér: “Yehova una yima se kpee a bunde ga, shi a na gar ne sha ikyev i tor u Ashiria kpaa ga” ze.
16 De keghen nen ato a Hesekia ga, sha ci u tor u Ashiria kaa ér: “Lu nen ken bem vea mo shi haa nen ikyav inya, nahan hanma wen nana ya atam a kon u wain u nan man atam a kon u tur u nan, shi nana ma mngerem ma shin ijôr i nan,
17 zan zan me va, me va kura ne, me yem a ven ken tar ugen u lun er u wen nahan,+ tar u lun a samuyia man wain u he, tar u lun a kwaghyan man ishuleikyon i wain.
18 De deen nen ner Hesekia a bume ne, a kaan ér, ‘Yehova una yima se’ ga. I lu nahan ma aôndo ken mbaaôndo mba akuraior yima tar u nan sha ikyev i tor u Ashiria vee?+
19 Mbaaôndo mba Hamati man Arpadi mba hana?+ Mbaaôndo mba Sefarvaim mba hana?+ Ve yima Samaria sha ikyev yam kpa?+
20 Ken mbaaôndo mba ityar ne cii, ka hanma aôndo a yem tar u nan sha ikyev yam ve, Yehova una yima Yerusalem sha ikyev yama?”’”+
21 Kpa ve lu ving, ve ôr kwagh môm a na ga, sha ci u tor kaa ér, “De lamen nen a na ga.”+
22 Kpa Eliakim wan u Hilkia u nengen sha ya u tor la, man Shebena+ u lu akawe la, kua Yoa wan u Asav u lu orngeren la, ve va hen Hesekia a akondo a anden iyol, ve va ôr un mkaanem ma Rabeshake.
