Yesaia 48:1-22
48 Ungwa kwagh ne, we ya u Yakob,Ne mba ne yer ayol a en sha iti i Iserael+Shi ne dugh shin mngerem ma* Yuda,Ne mba ne bumun ken iti i Yehova+Shi ne yer sha iti i Aôndo u Iserael la,Shin er i lu sha mimi man ken perapera ga nahan kpaa.+
2 Gadia mba yer ayol a ve mba suur sha icighan gar la+Shi ka ve keren ér Aôndo u Iserael,U i yer iti na ér Yehova u akum a sha la a wase ve.+
3 “Yange m ôr u akaa a ngise* la ica i gba.
Lu sha zwa wam a due,Shi m na i fa a ye.+
Fese je m er kwagh sha kwagh u m ôr la, shi a er di nahan.+
4 Gadia m fa u taver ityough—Gbela u mon wou ka iyôgh, shi icul you ka togula+—
5 M ôr u kwagh ne ica i gba.
Cii man a er yô, m na u ungwa un,Sha er u kaa wer, ‘Akombo a am er kwagh ne;Eev av mbu gban a gba man eev av mbu iyôôgh* kaa ér i lu nahan’ ga yô.
6 U ungwa shi u nenge kwagh ne cii.
Nahan u kera pase un gaa?+
Hii hegen je zan zan yem ken hemen, me lu yôôn akaa a he mer ungwa,+A lu akaa a ken myer a i koso, a u fe kwagh sha mi ga yô.
7 Ka hegen tsô i gbe a ye, ica ngi a gba ga,Akaa a u lu a vande ungwan cii ve nyian ga yô,Sha er u kaa wer, ‘Nenge! M vande fan a’ ga yô.
8 U ngu a ungwa ga,+ u ngu a fa kpaa ga,Shi yange u bugh ato a ou ken shighe u karen ken ijime la ga.
Sha ci u m fa u wa atseregh kpishi,+Shi hii shighe u i mar u la je, mba yer u ér orperenatindi.+
9 Kpa sha ci u iti yam yô, me kera vihi ishima ga;+Sha ci u iwuese yam yô, me kôr iyol yam tsaha sha kwagh wou,Nahan me kar a we kera ga.+
10 Nenge! M sôr u, kpa ka er ka i sôr azurufa nahan ga.+
M kar* u ken usu u ican u soughon kwagh.+
11 Gadia me er kwagh sha ci wam, een, sha ci wam,+Sha ci u me fatyô u den mer i hôngor mo ga.+
Me na orgen môm icivir yam ga.
12 Kegh ato a mo, we Yakob, man Iserael, we u m yer la.
M ngu Un shon môm,+ m ngu u hiihii; shi m ngu u masetyô.+
13 Uwegh agh wa imagh ki taregh,+Shi uwegh agh ku iyanegh samber usha.+
Ka mea yila ve yô, ve mough ve tile sha imôngo.
14 Kohol nen imôngo, ne cii, shi kegh nen ato.
Ka an ken a ve nan yôô akaa nee?
Nan doo Yehova ishima.+
Una er kwagh u a soo la a Babilon,+Shi uwegh nagh kua hingir num a Mbakaldi.+
15 Mo iyol yam m lam, shi m yila un.+
M va a na, nahan gbenda na ua doo.+
16 Kporom ikyua a mo, ungwa kwagh ne.
Sha hiihii la je, m lam ken myer ga.+
M lu her shighe u kwagh shon er la.”
Man hegen yô, Yehova Ter u Hemban Cii tindim, kua* jijingi na.
17 Ka kwagh u Yehova, Orpaan wou, Un u a lu Icighan u Iserael+ la a kaa je ne, ér:
“Mo, Yehova, m ngu Aôndo wou,Un u a tesen we kwagh u una wase u,+Un u a tesen we gbenda u i gbe u u za sha mi la.+
18 Aluer u ver ishima sha atindi a am yô!+
Bem wou una lu er ifi nahan,+Perapera wou kpa una lu er agôndo a zegemnger nahan.+
19 Ônov ou vea* ngee er waarawa nahanShi mbayev ou kpa vea ngee er sam u waarawa nahan.+
A tôndo iti ve kera mayange ga, shin a tim ve sha ishigh yagh kpaa ga.”
20 Due nen ken Babilon kera!+
Yevese nen Mbakaldi!
Yôô nen kwagh ne sha iember! Pase nen gbungur gbungur!+
Na nen i fa kwagh shon sha akighir a tar.+
Kaa nen ner: “Yehova paa ortom na Yakob.+
21 Shighe u a hemen ve kar a ve sha ajiir a i vihi kera la imura kôr ve ga.+
Yange na mngerem due ken vande sha ci ve;A pav vande a er mngerem due iuu.”+
22 Yehova kaa ér: “Bem ngu sha ci u iferor ga.”+
