Yesaia 27:1-13
27 Sha iyange la, Yehova una kôr sanker na u a cieryol, a lu zegenan shi a taver iyol la,+Una na ishima sha kwagh u Leviatan,* iyô i kpelan shighee shighee la,Una na ishima sha Leviatan, iyô i zômon a zômon la,Nahan una wua inyam i cieryol i shin zegemnger la.
2 Sha iyange la, wa un icam kaa wer:*
“Ngu sule u ikyon i wain u mbuan hugh!+
3 Mo Yehova m ngu kuran un.+
Hanma shighe ka m ur un mngerem.+
Ka m kura un tugh man atetan,Sha er or môm nana bula un ga yô.+
4 Ishima vihim ga.+
Ka unô vea zua vanger a mo a mbaasaa man toho ken utya?
Me ndyar ve angahar shi me nande ve cii sha usu.
5 Gayô nana̱ kôr ave gbang sha ijiir yam i taver.
Nana̱ ker u lun ken bem vea mo;Een, nana̱ ker u lun ken bem vea mo.”
6 Ken ayange a a lu van la, Yakob una wa mise,Iserael una mende una hôm,+Nahan vea iv tar la cii a iyiav.+
7 Gba u a gbidye un sha akpa u un u a lu gbidyen un laa?
Shin gba u a wua un er i woo ior nav nahana?
8 U nôngo kwagh a na a mliam ma tan mciem iyol shighe u u zenda un wer a yem la.
Sha iyange i ahumbe a sha ityoughkitaregh la, una zenda un a ihyuran i cier iyol, una yem kera.+
9 Nahan kape a wam isholibo i Yakob ne;+Shighe u a kar a isholibo na kera la, ka kwagh u una er je ne:
Una er awen a atse a nan nagh la cii,Aa lu er awen a taver ga, a i woo a hingir vue nahan,Shi a de mtôm ma akombom ma sha ikyon* shin atse a nanden insensi aa shi her ga.+
10 Gadia a undu gar u i maa un gir u taver la;A undu ajiir a yan toho, a kende a er taaikyôngo nahan.+
Ka her wanbua una yaan toho, una yavenShi una yaan agbaa a na ye.+
11 Shighe u agbaa a na aa uma kera la,Kasev vea va vea va gber a kera,Vea wa usu a mi.
Gadia ior mban mba a mkav ga.+
Ka nahan ve Orgban ve una zungwe ve mhôônom ga ye,Shi kunya a kôr Un u a er ve la a ve kpaa ga ye.+
12 Sha iyange la, Yehova una kohol atam a ikyon, hii hen mngerem ma shin Ifi* ma ma lu kuan la zan zan za nyôr hen Uwagh* u Igipiti,+ nahan a kohol ne môm môm, ne ior i Iserael.+
13 Sha iyange la, a tôngo korough ku vesen,+ nahan ior mba ve lu timin ken tar u Ashiria+ man ior mba i sambe ve ken tar u Igipiti la,+ vea va vea va gure Yehova inya sha icighanwo na ken Yerusalem.+
Ngeren mba shin kpe
^ Nenge Ngeren u Pasen Asember.
^ Alaghga mba ôron ka kwagh u Iserael; i ôr kwagh na heen inja er ka kwase nahan, shi i tôô un i kar sha sule u ikyon i wain.
^ Nenge Ngeren u Pasen Asember.
^ Ka Uferati je la.
^ Nenge Ngeren u Pasen Asember.
