Yesaia 45:1-25
45 Ka kwagh u Yehova a kaa a Shirushi,+ or na u a shigh un mkurem,Un u m ker uwegh nagh ku iyan+Sha u hemban akuraior sha ishigh nagh,+Shi ngohol utor ikyav mbi utyaav*Shi bughun ihinda i lun avegher ahar sha ishigh nagh,Sha er a wuhe ihindagar ga yô, ér:
2 “Mo iyol yam me hemen we gbenda,+Shi me hembe agungu a hingir vaanaa.
Me hembe ihinda i togula avur avur,Shi me tôndo uishindan mba iyôgh kera.+
3 Me na u akaainjaa a a lu ken ime laKua akaainjaa a i yer a hen ajiir a ken iuv yô,+Sha er u fa er mo m lu Yehova,Aôndo u Iserael, un u a lu yilan we sha iti you la.+
4 M ngu yilan we sha iti youSha ci u ortom wam Yakob man Iserael, un u m tsough la.
M ngu nan we iti i icivirigh, shin er u fem ga nahan kpaa.
5 Mo m ngu Yehova, dugh mo kera yô, orgen nan ngu ga.
Dugh mo kera yô, Aôndo ugen ngu ga.+
Me taver we,* shin er u fem ga nahan kpaa,
6 Sha er ior ve faÉr, dugh mo kera yô, orgen nan ngu ga+Hii ape iyange i duen la zan zan za nyôr ape i miren la yô,*Mo m ngu Yehova, dugh mo kera yô, orgen nan ngu ga.+
7 M er iwanger+ shi m gba ime,+M va a bem+ man kwaghtseren;+Ka mo Yehova, m lu eren akaa ne cii ye.
8 Ne usha, nôô nen ura i haa shin inya;+Abeen a nôô perapera.
Tar u bugh u na myom a dumbur,Shi u na perapera kpa a due hen shighe shon môm.+
Ka mo Yehova m er kwagh ne ye.”
9 Kwagh a tser or u nan nôngon kwagh* a Orgban u nan,*Sha ci u nan ngu er bamber u kwagh u i maa sha inyatyuu,A lu vea akaa agen a i maa sha inyatyuu hen inya nahan!
Doo u inyatyuu ia pine Ormaantyegh* ér: “Ka nyi u lu maana?”+
Shin doo u tom wou ua kaa ér: “Ngu a ave ga”?*
10 Kwagh a tser or u nan pin ter u nan ér: “Ka nyi u mara?” la.
Man or u nan pin kwase ér: “Ka nyi u lu marene?” la.*
11 Ka kwagh u Yehova, Un u a lu Icighan u Iserael,+ Un u a gbe un la a kaa ne, ér:
“U fatyô u pinen mo mpin sha kwagh u akaa a a lu van laShi ôron mo kwagh u me er sha kwagh u ônov av+ man ityom i ave a ama?
12 M er tar+ shi m gba or m ver sha u.+
M naregh usha sha ave a am,+Shi ka mo m ôron ikyum ve cii akaa a vea er ye.”+
13 Yehova u akum a sha kaa ér:
“M yese or ken perapera,+Shi me er igbenda na cii ia za jighilii.
Ka un una maa gar wam+Shi una pase ior av mba i yem a ve uikyangen la una tuhwa,+A u mo kimbin injar shin nan ingyatu shio ye.”+
14 Ka kwagh u Yehova a kaa je ne, ér:
“Injar i* Igipiti man ikyav mbi kasua* mbi Etiopia man Mbasabia, ior mba taven gôgônan la,Mbia va hen a we mbia hingir kwagh wou.
A ta ve mshirim vea lu zenden van we ken ijime.
Vea va vea va gure u inya.+
Vea ôr a we ken msen ér, ‘Mimi je Aôndo ngu a we,+Dugh mo kera yô, orgen ngu ga; dugh mo kera yô Aôndo ugen ngu ga.’”
15 Mimi je, we Aôndo u Iserael, Oryiman,+U ngu Aôndo u u yeren iyol you yô.
16 Ve cii a hee ve shi vea ya kunya;Mba ve eren ieev la cii vea yem a ihyeen iyol.+
17 Kpa Yehova una yima Iserael, una na un myom u tsôron.+
Mayange a hee ne ga, shi ne ya kunya kpaa ga.+
18 Gadia ka kwagh u Yehova,Orgban u usha,+ Aôndo u mimi,Un a er tar, a Gbe u, a we u imaagh gbang,+Un u a gbe gban u tsô ga,* kpa a er u sha u ior ve lu sha mi+ la a kaa je ne, ér:
“Mo m ngu Yehova, dugh mo kera yô, orgen nan ngu ga.
19 M lam hen ijiir i ken iuv,+ ken tar u imegh ga;M kaa a ônov mba* Yakob mer,‘Kerem nen gbilin ga.’
Mo m ngu Yehova, ka m ôr kwagh u perapera shi m pase kwagh u mimi.+
20 Kohol nen imôngo va nen.
Kporom va nen imôngo, ne mba ne war hen akuraior la.+
Mba ve zenden a ieev mbi gban a gba la fa kwagh môm ga,Shi ka ve er msen hen aôndo u una fatyô u yiman ve ga yô.+
21 Va ôr nen kwagh wen, na nen atôakyaa a en.
De ve za idyu imôngo, ve er kwagh ken mzough.
Ka an yange nan tsengaôron kwagh ne ken ijime icaShi nan pase un hii sha ashighe a karen la je?
Kera ka mo Yehova gaa?
Dugh mo kera yô, Aôndo ugen ngu ga;M ngu Aôndo u perapera man Oryiman,+ dugh mo kera yô, mô ugen ngu ga.+
22 Ne akighir a tar cii,+ va nen hen a mo m yima ne,Gadia mo m ngu Aôndo, dugh mo kera yô orgen nan ngu ga.+
23 M bum iyol yam;Kwaghôron due ken zwa wam sha perapera,Nahan una kera hide ga:+
Hanma inyu ia gurem inya,Hanma nombor ua bum sha kwagh u mimi+
24 Ua kaa ér, ‘Mimi je, ka ken Yehova perapera u mimi man agee ve lu ye.
Mba ishima i vihi ve a na la cii, vea va sha ishigh nagh a ihyeen iyol.
25 Ka ken Yehova ônov mba* Iserael vea tese ér mba shami ye,+Shi ka ken a na vea ta ihyagh ve ye.’”
Ngeren mba shin kpe
^ Zwa Heberu, “saghen ikyange i shin iwenge i utor.”
^ Zwa Heberu, “Me ta u ikyondo uya.”
^ Shin “Hii sha ityoughkitaregh zan zan za nyôr shin ityôtar.”
^ Shin “nyiman kwagh.”
^ Shin “a Un u a er nan la.”
^ Shin “Un u a er i la.”
^ Shin a fatyô u kaan ér, “Shin doo u inyatyuu ia kaa ér: ‘Tom wou ngu a ave ga’?”
^ Shin “Ka nyi u lu toghor mar a mini la.”
^ Shin a fatyô u kaan ér, “Mbatomov mba.”
^ Shin a fatyô u kaan ér, “mbazendenkasua.”
^ Shin a fatyô u kaan ér, “Un u a Gbe u ér u lu gbilin ga la.”
^ Zwa Heberu, “vor u.”
^ Zwa Heberu, “vor u.”
