Yesaia 40:1-31
40 Aôndo wen kaa ér, “Sur ior av ishima, sur ve ishima.”+
2 “Ôr kwagh i kôr Yerusalem ken ishima,*Shi yôô a ungwa wer a er tom u i kighir un a lu eren la bee,Wer i kimbi injar i ibo na.+
A ngohol injar i vesen* sha asorabo a na cii sha uwegh ku Yehova.”+
3 Imo i or ngi yôôn ken taaikyôngo ér:
“Sôr nen gbenda u Yehova!+
Dugh nen gbenda u vesen u yem jighilii,+ u kar ken desereti sha ci u Aôndo wase.+
4 I̱ cir hanma pev,Shi i̱ hembe hanma uwo man hanma igyungu.
Ijiir i lun agber agber i hingir vaanaan,Shi ijiir i lun awen awen i hingir pev u lun gburumaa.+
5 A pase icivir i Yehova,+Nahan ior cii vea nenge a i imôngo,+Sha ci u ka zwa u Yehova u ôr kwagh ne ye.”
6 Kegh ato, or ngu kaan ér: “Yôô genger genger!”
Orgen pine ér: “Ka nyi m yôô genger genger?”
Yôô wer: “Uumace cii mba toho u ndor.
Erdoo ve cii ngu er imondon u ken toho nahan.+
7 Toho u ndor uma kera,Imondon use kera,+Sha ci u iôôn i* Yehova ta sha mi.+
Mimi yô, ior mba toho u ndor tsô.
8 Toho u ndor uma kera,Imondon use kera,Kpa kwaghôron u Aôndo wase una lu gbem sha won.”+
9 Kôndo za sha uwo u taven,We kwase u u lu van Shion a loho u dedoo la.+
Ngor imo sha utaha,We kwase u u lu van Yerusalem a loho u dedoo la.
Ngor imo, de cie ga.
Yôô ken agar a Yuda wer: “Aôndo wen ngun.”+
10 Nenge! Yehova, Ter u Hemban Cii una va tese tahav nav,Shi uwegh nagh ku a hemen sha ci na.+
Nenge! Injar na ngi a na,Shi injar i ka a kimbi la ngi sha ishigh nagh.+
11 Una nenge sha* iyôngo na er orkuranilev nahan.+
Una kohol ônovmbaiyôngov imôngo sha uwegh nagh,Shi una wa ve shin ikyum.
Una hemen mba ve lu nan ônov vev atumba la kundu kundu.+
12 Ka an nana fatyô u haan mngerem ma shin uzegembamngerev cii ken ikyevwe i nana?+
Shi ka an nan kar usha a igbanger i ikyevwe i nana?*
Ka an nan kar vuulevu u shin tara?+
Shin ka an nan kar myohom ma iwoogh a akaa a karen myohomMan agungu a usikeele?
13 Ka an nan kar* jijingi u Yehova?
Shi ka an nana fatyô u wan un kwagh sha ci u nan ngu orwan un kwagha?+
14 Ka an a ze idyu a nan sha u una zua a mkava?
Shin ka an nan tesen un gbenda u una ôr ijir sha mimi?
Shin ka an nan tesen un mfe?
Shin ka an nan tesen un gbenda u mkav u mimi?+
15 Nenge! Akuraior nga er ibyelegh ki mngeregh ki shin bokoti nahan,Shi a nenge ve ér mba er ihyundu i sha usikeel nahan.+
Nenge! Ka a kende a uicile sha er ka ihyundu nahan.
16 Lebanon je kpa kuma u una na usu a za hemen u hian ga,*Shi inyamtoho na ngee kuma u nan nagh ku nanden ga.
17 Sha ishigh nagh yô, akuraior cii nga er kwagh u a lu ga nahan;+Nengen a er nga kwagh ga nahan, er ka gbilinkwagh nahan.+
18 Ka sha an ne kar Aôndo?+
Ne kaa ner a bee nyi?+
19 Orfantomaveegh nan ker eev,Orvareniwa nan cir mbu zanaria,+Shi nan var mshirim ma sha azurufa.
20 Orgen tsua kon ér nana na nagh a mi,+Ka kon u ua hôô ga yô.
Nan ker or u fan tomaveegh tsema tsemaSha u nana er eev mbu gban a gba mbu mbua gba ga yô.+
21 Ne fa gaa?
Ne mba a ungwa gaa?
Shin mba a ôr ne kwagh ne ken mhii ga?
Hii sha shighe u i wa amagh a tar la je ne mba a kav gaa?+
22 Or ngu u nan tem sha ijiir i i hembe taven a tar u lun gbilititi* yô,+Shi ior mba ve tem sha u la mba er mbaahungwa nahan.
Ngu naregh usha er ikyondo i doonashe i lun aan aan nahan,Shi a samber ve er ikyondo i tenti u teman ker nahan.+
23 Ka a hide a mbatomov mba vesen ijime ve kera gba kwagh gaShi a na mbaajiriv* mba tar ne ve hingir gbilinkwagh.
24 Mba a lôô ve ga,Mba a wa ve shin inya ga,Ikpughur ve ngu a wa amise i yem shin inya ga tsô,Ahumbe purugh a ve, ve uma kera,Maa ahumbe tôô ve yem a mi kera er ayia nahan.+
25 Un u a lu Icighan la kaa ér, “Ka an ne tôôm ne kar sha a nan ner m lu kwaghmôm a nana?”
26 “Kende nen ashe a en sha nenge nen.
Ka an nan gbe akaa nee?+
Ka Un u a hemen ikyum ve, a ôron iyenge ve môm môm la;Yer ve cii sha ati ati.+
Er a lu a agee kpishi shi tahav nav mbu kpilighyol yô,+Mô ve môm saa ga.
27 Er nan, we Yakob, man we Iserael, ne kaa ner,‘Yehova fa gbenda wam ga,Shi Aôndo nenge a atsan a m lu yan la ga’?+
28 Ne fa gaa? Ne mba a ungwa gaa?
Yehova, Un u a gbe akighir a tar la, ngu Aôndo gbem sha won.+
Mayange vôron ga, shin iyol ngi kpen un kpaa ga.+
Or môm nana fatyô u tôvon fan mkav na ga.+
29 Ka a na or u nan vôr la tahav,Shi a na mba agee a yen ve la agee kpishi.+
30 Mbayevnomso vea vôr, iyol ia kpe ve,Shi agumaior aa nôngo gbeev a gba,
31 Kpa mba ve veren ashe sha Yehova yô, vea hide a zua a tahav.
Vea purugh vea yem sha aôndo ica er mba a akper a uigyuve nahan.+
Vea yevese kpa iyol a kpe ve ga;Vea zende kpa vea vôr ga.”+
Ngeren mba shin kpe
^ Shin “Ôr kwagh u una sur Yerusalem ishima yô.”
^ Shin “A ngohol injar kwa har.”
^ Shin “jijingi u.”
^ Shin “kura.”
^ Ka igbanger i mough hen hôwe u vesen za kighir sha hôwe u kiriki shighe u or nan bugh uwegh je la. Nenge Ngeren u Seer u B14 la.
^ Shin a fatyô u kaan ér, “kav.”
^ Shin “fatyô u nan ikyonusu a ngee a kuma ga.”
^ Shin “vingir.”
^ Shin “mbahemenev.”
