Icighan Bibilo ka loho u Aôndo u i nger hen a vese cii yô. Gba u se hen i ve se fa Orngeren i ye. (Yohane 17:3; 2 Timoteu 3:16) Yehova Aôndo pase awashima na sha ci u uumace man sha ci u tar u u lu ya ve la ker.​—Genese 3:15; Mpase 21:​3, 4.

Ma takeda ugen môm ngu a bende a uuma mba iorov er Bibilo nahan ga. Bibilo taver se ishima ér se lu a aeren a Yehova, er dooshima man erdoo kua mhôônom ma zungwen nahan. Bibilo ka i na ishimaverenkeghen shi i wase ior u wan ishima a atsan a vihin tsung je kpaa. Shi i za hemen u ponon aeren a tar ne a a zough sha awashima u vough u Aôndo ga la.​—Upasalami 119:105; Mbaheberu 4:12; 1 Yohane 2:​15-17.

Yange i hii ngeren Bibilo ken zwa Heberu man zwa Aram kua zwa Grika. I gema Bibilo jimin cii shin avegher a i ken ijô i hemban 3,000. Ken yiase i uumace cii, ka takeda ne i hembe geman shi samber a mi sha tar cii ye. Se fa ser kwagh a lu nahan. Kwaghôron u profeti u ken Bibilo kaa ér: “A pase loho u dedoo u Tartor ne [ka loho u vesen u u lu ken Bibilo je la] a tser tar sha u u lu shiada hen akuraior cii, ka zum la mkur una va ye.”​—Mateu 24:14.

Er se fe ser loho u ken Bibilo la ngu a inja yô, se er tom u kengese Bibilo ne i ken zwa Buter la sha icivir tsung sha ci u mkaanem ma i nger ker la. Se fa er tom u se lu a mi u geman loho u ken Bibilo vough la, i lu zegetom je yô. Mgber u ken zwa Buter u i kengese la dondo gbenda u dedoo u yange i er tom u geman mbamgber mba ken zwa Buter mba ken ijime mba Icighan Bibilo i Tar u He la, ka Bibilo i yange i hii duen a mi, anyom a kar hegen i hembe 60 la je la. Nahan kpa, zwa Buter gema ken anyom 50 a a kar ne. Er zwa Buter u gem yô, kwagh ne mgbegha ior mba hegen ve lu ken Kômatii u A Gem Bibilo i Tar u He La u hiin tom u vesen u kengese Bibilo ne. Awashima wase yô, ka u geman kwagh u una due a loho u u lu ken ngeren mba hiihii mbara tseegh ga, kpa shi una wanger shi una taver u kaven ga yô. Ngeren mba seer mba ve lu a itinekwagh ér “Akaawan a Wasen u Geman Bibilo” man “Akaa A a lu ken Mgem u Bibilo Ne Yô,” kua “Er Bibilo Va Nyôr a Vese La,” pase akaa agen a i nyôôso ken zwa Buter ken mgber ne la.

Sar ior mba Yehova Aôndo a doo ve ishima shi ve civir un la u zuan a Mkaanem ma Aôndo ma i gem ma vough shi ma taver u kaven ga yô. (1 Timoteu 2:4) Sha nahan yô, se kengese Bibilo ne ken zwa Buter; awashima wase yô, ka u i gema i ken ijô kpishi, aluer gba sha mi yô. Se ver ishima shi se mba eren msen ser, we or u u lu ôron mgber u Icighan Ruamabera ne la, u zua a iwasen er u lu nôngon wer u ‘ker Aôndo, u zua a na’ la.​—Aerenakaa 17:27.