Yesaia 41:1-29
41 “Lu nen ving, kegh nen ato a mo,* ne uicile;De akuraior a hide a zua a agee a ve.
De ve kporom; ve ôr kwagh.+
De se kohol nen imôngo sha ci u ijirôron.
2 Ka an nan ne or u a lu ape iyange i dugh* la tahav,+Nan yilan nan sha perapera ér nana va hen angahar a Na,*Sha u a na akuraior sha ikyev i nanShi a na nana hemba ator ityava?+
Ka an nan er ve ve hingir vuulevu sha sanker na,Shi nan sambe ve sha ada na er ahumbe ka a purugh a ayia nahana?
3 A zenda ve, a kar sha igbenda i angahar a na a lu a kar sha mi ga yô,A kwagh u yangen un shio.
4 Ka an nan mough nan er kwagh ne,Nan yilan ikyov sha mhii la je?
Mo Yehova, m ngu Aôndo sha mhii je;+Shi sha ikyov i masetyô la je kpa, m ngu Aôndo her.”+
5 Uicile nenge a mi, cier ve iyol.
Akighir a tar nga gbidyen akarkase iyol.
Ve kporom ikyua ve va sha hemen.
6 Hanma ve nan wase ikyar u nanShi nan kaa a anmgbian u nan ér: “Lu taveraa.”
7 Tsô orfantomaveegh taver orvareniwa ishima;+Or u casem kwagh a hama u varen iwaTaver or u caghen kwagh a hama sha ijôv* ishima.
A kaa ér: “I zua iyôgh kira doo je gande.”
Maa i mande ki sha ukusa sha er kia menger a gba ga yô.
8 “Kpa we, Iserael, u ngu ortom wam,+We, Yakob, we u m tsough,+U lu wan* u Aberaham, ijende yam la,+
9 We u yange m tôô u ken akighir a tar,+We u yange m yila u sha ajiir a u a hemban gban ica cii la.+
M kaa a we mer, ‘U ngu ortom wam;M tsua u; m venda u ga.+
10 De cie ga, sha ci u m ngu a we.+
Ishima i de nyian we ga, sha ci u m ngu Aôndo wou.+
Me na u agee, een, me wase u,+Me kôr u sha uwegh agh ku iyanegh ku perapera la gbang gbang.’
11 Nenge! Mba ishima i vihi ve a we kpishi la cii me na vea ya kunya shi me hee ve.+
A na mba ve lu nôngon num a we la vea kera lu kwagh ga shi a bee a ve kera.+
12 U ker mba ve lu nôngon num a we la, kpa u zua a ve ga;Ior mba ve lu nôngon ityav a we la vea hingir er kwagh u a lu ga yô, vea gba kwagh cuku ga.+
13 Gadia mo Yehova Aôndo wou, m kôr u uwegh ku iyanegh,Ka mo m kaa a we mer, ‘De cie ga. Me wase u’ ye.+
14 De cie ga, we Yakob u u lu anyigôr* ne,+Ne ior i Iserael, me wase ne,” kape Yehova, Orpaan wen,+ Un u a lu Icighan u Iserael la a kaa la.
15 “Nenge! M er u u hingir kpande u gbidyen iyiav,+U hingir ikyagh ki tomough ki gbidyen iyiav ki hegh ki lun a anyi avegher ahar.
U shoghor iwo shi u hembe i,U gema agungu aa hingir er imough nahan.
16 U peer ve,Ahumbe aa kura ve a yem a mi kera;Ahumbe a vesen aa sambe ve.
A saan we iyol, ken Yehova,+Shi u ta ihyagh ken Un u a lu Icighan u Iserael la.”+
17 “Mbaibanave man mbaatsanev mba keren mngerem, kpa ma ga.
Imura kôr ve je nombor ve uma.+
Mo Yehova me ungwa ve.+
Mo, Aôndo u Iserael, me kende ve ga.+
18 Me er uifi vea kua sha agungu a lun a kwagh sha mi ga+Man amboramnger shin upev mba lun gburumaa.+
Me gema taaikyôngo una hingir ityungumnger i lun a ikinakyaMan tar u u om tseghe tseghe ua hingir amboramnger.+
19 Me lôô kon u sedar ken desereti,Man kon u akashia* man kon u metul kua kon u pain.*+
Me lôô kon u Yunipa ken taaikyôngo u lun gburumaa,Imôngo a kon u mtwe* man kon u shipereshi,+
20 Sha er ior cii vea nenge shi vea faShi vea ver ishima vea kav,Er i lu uwegh ku Yehova ku er kwagh ne,Shi i lu Un u a lu Icighan u Iserael la a ve a kwagh ne yô.”+
21 “Va a ijir yen,” kape Yehova a kaa la.
“Na nen atôakyaa a en,” kape Tor u Yakob a kaa la.
22 “Tese se ikyav, ôr se akaa a aa er yô.
Ôr se akaa a ngise* la,Sha er se hen sha mi* shi se fa kwagh u una va due ker yô.
Gayô pase se akaa a a lu van la.+
23 Ôr se akaa a aa er ken hemen la,Sha er se fa ser ne mba mbaaôndo yô.+
Een, er nen kwagh u dedoo gayô u bo,Sha er se nenge a mi a kpiligh se iyol yô.+
24 Nenge! Ne mba kwagh u a lu ga yô,Shi kwagh u ne er la ka gbilinkwagh.+
Hanma or u nan tsough ne cii nan ndôhôrshima.+
25 M na or u ken imbusutarimese tahav, nahan nana va,+Ka or u nan ve ape iyange i dugh* la,+ ka nan nana yila sha iti yam ye.
Nana ndyar mbahemenev* angahar er mba inyatyuu nahan,+Vough er ormaantyegh ka nan ndyar inyatyuu i ndor angahar nahan.
26 Ka an nan ôr kwagh sha kwagh ne ken mhii je, sha er se fa,Shin ka an nan ôr kwagh ne sha ashighe a ken ijime la, sha er se kaa ser, ‘Ngu shami’?+
Mimi yô, or môm yôô kwagh ne ga!
Shi or môm pase un ga!
Or ungwa kwagh môm hen a ven ga!”+
27 M ngu or u hiihii u kaan a Shion mer: “Nenge! ve mban!”+
Shi m ôr a Yerusalem mer me tindi orôron-loho u dedoo.+
28 M kenger zan zan, kpa or môm lu ga;Or môm lu ken a ve u nana wa or kwagh ga.
M zer pinen, kpa or môm bugh zwa ga.
29 Nenge! Ve cii mba a iwasen ga.*
Ityom ve ngi ma kwagh je ga.
Ieev vev mbi iyôôgh* ka ahumbe man gbilinkwagh.+
Ngeren mba shin kpe
^ Shin “Lu nen ving sha ishigh yagh.”
^ Shin “sha ityoughkitaregh.”
^ Ka u civir Un je la.
^ Ka kwagh u ka i ver iyôgh sha mi i caghen la je la.
^ Zwa Heberu, “vor.”
^ Ka or u nan lu a or u wasen nan ga, shi nan gbe kwagh ga je la.
^ Akashia ka kon u lun a asaa. Ngu kposo a kashia u ior ve fe un nyian ne.
^ Zwa Heberu, “kon u mkure,” a fatyô u lun kon u i yer ken Zwa Buter ér Aleppo pain la.
^ Ka zegekon u ka u vese u tav i kuma umita 15 yô. Ka u wa lun ikya dishi dishi shi agbaa a u a lu mtwem mtwem.
^ Zwa Heberu, “hiihii.”
^ Shin “se ver ishima yase sha mi.”
^ Shin “sha ityoughkitaregh.”
^ Shin “mba cirin ken mbahemenev.”
^ Shin “mba kwagh u a lu ga yô.”
^ Shin “ieev vev mbi keren a ker.”
