Yesaia 39:1-8
-
Mbaôron-loho mba ken Babilon (1-8)
39 Hen shighe la, Merodaki-baladan wan u Baladan u lu tor u Babilon la, tindi Hesekia a uwashika man iyua,+ sha ci u a ungwa ér a gba angev kpa a mough.+
2 Hesekia maa ngohol ve saan saan shi tese ve iyou na i koson akaainjaa ker;+ a tese ve azurufa man zanaria man mkurem ma balsam man mkurem ma injaam magen, man iyou na i koson ikyav mbi utyaav cii man hanma kwagh u lu ken ayou a na a koson akaainjaa cii. Hesekia tese ve hanma kwagh u hen ya na,* man ken tartor na cii, kwagh u tese ve ga yô, lu ga.
3 Tsô profeti Yesaia nyôr va pine Tor Hesekia ér: “Ka nyi ior mban ve ôr, man ka han ve mough ve ve?” Hesekia gema kaa ér: “Ka ken Babilon, ken tar u icaa la ve mough ve ye.”+
4 Shi a pine ér: “Ka nyi ve nenge a mi hen ya wouwe?”* Hesekia gema kaa ér: “Ve nenge a hanma kwagh u hen ya wam* cii. M tese ve hanma kwagh u a lu ken ayou a am a koson akaainjaa cii.”
5 Yesaia maa ôr a Hesekia ér: “Ungwa kwagh u Yehova u akum a sha a kaa ne, ér,
6 ‘Nenge! Ayange nga van a a kura akaa a u koso hen ya wou* la cii, man akaa a uter ou ve koso zan zan nyian ne la cii, a yem a mi ken Babilon yô, kwagh môm una shi her ga,’+ kape Yehova a kaa la.+
7 ‘Shi a kura ônov ou mba nomso mbagen mba u va mar la a yem a ve, vea za hingir u eren tom ken ya u tor u Babilon.’”+
8 Nahan Hesekia kaa a Yesaia ér: “Mkaanem ma Yehova ma u ôr la doo.” Shi a kaa ér: “Sha ci u bem man mkpeyol* vea lu hen shighe u* m lu uma ne.”+
