Yesaia 28:1-29
28 Kwagh a tser idyer* i ihyagh* i mbahundenmsôrom mba Eferaim+Kua imondon i mdoom nam ma engem, i i lu usen,I i lu sha ityough ki pev u doon iyiav u ior mba ve hundu wain la!
2 Nenge! Yehova ngu a orageegh u taver iyol.
Er uraawombo u duran man uraahumbe u vihin kwagh nahan,Er uraahumbe u duran u mngerem ma ma sar avenge sha utaha nahan,Una ker un sha agee una va gba shin tar.
3 A ndyar ader a ihyagh* a mbahundenmsôromMba Eferaim angahar.+
4 Shi faluwa u mdoom nam ma engem u a lu usen,U a lu sha ityough ki pev u doon iyiav la,Una hingir er ityamegh ki tur a um tsuaa cii ve inyom i av la nahan.
Or ka nana nengen a ki yô, nan mena ki fese er ki lu nan ken uwe la je.
5 Sha iyange la, Yehova u akum a sha una hingir idyer i icivirigh man hwe u doonashe u cirin sha ityo hen ior nav mba ve mase shin la.+
6 Una na un u a tem u ôron ijir la jijingi u ôron ijir sha mimi, shi una na mba ve lu nôngon kwagh sha hundagar ér mbahyomov ve de nyer ga la agee.+
7 Shi mban kpa wain na ve tsume;Shi msôrom vem na ve zende ze-ze-ze.
Msôrom na pristi man profeti tsume;Wain nzughul a ve,Shi msôrom vem na ve zende ze-ze-ze;Mpase ve u sha mnenge na ve tsume,Shi ve nôngo gbeev a ijirôron.+
8 Gadia utebul vev iv a isho i ndôhôrshima—Isho ngi hanma ijiir cii.
9 Ka an a na nan mfe,Shi ka hen an a pase loho laa?
Ka hen mba i sember den ve ityumba,Ve mba i sember dughun ve zwa sha atumba kera la gaa?
10 Gadia Yesaia ka a wa “tindi môm tsô shi a wa ugen, a wa tindi môm tsô shi a wa ugen,Sha hwange sha hwange, sha hwange sha hwange,*+Heen kpuaa, heela kpuaa.”
11 Nahan una ôr kwagh a nongoior ne sha zwa u ior mba eren ikyeen, man mba lamen zwa ugen.+
12 Kwagen la a kaa a ve ér: “Ka ijiir i memen je ne. Or u nan vôr yô nana mem; ka ijiir i zuan a mpeveryol je ne,” kpa ve venda u ungwan.+
13 Nahan yô, kape kwaghôron u Yehova una lu hen a ve je ne:
“Tindi sha tindi, tindi sha tindi,Sha hwange sha hwange, sha hwange sha hwange,*+Heen kpuaa, heela kpuaa,”Sha er vea zenden yô,Vea nôngo gbeev a hide a cagh inya,Nahan vea kever, a hôn ve shi a kôr yô.+
14 Nahan ungwa nen kwaghôron u Yehova, ne ior mba tan ihyagh,Ne mbahemenev mba ior mba ne lu ken Yerusalem ne,
15 Gadia ne ior mban ka ne kaa ner:
“Se ya ikyur a Ku,+Shi se gba zwa môm a Uwar.*
Shi shighe u mngerem ma a sar avenge ma a lu karen sha utaha la,Ma a ar a vese ga,Sha ci u se gema aie hingir se ijiir i yerenShi se yer ayol a ase ken kwagh u mimi ga.”+
16 Nahan ka kwagh u Yehova, Ter u Hemban Cii a kaa je ne, ér:
“Nenge, me tim iwen i i kar i yô ken Shion, ia lu imaagh,+Ka iwen i injaa i sha zongo+ i imaagh ki taver.+
Hanma or u nan ne iwen la jighjigh yô, nana gbidye ikyarkyase iyol ga.+
17 Me er ijirôron i mimi ia hingir kor u karen kwagh+Shi me er perapera una hingir ikyagh ki karen kwagh ér a lu jighilii.*+
Awombo aa ese ijiir i yeren i mbaaie kera,Shi mngerem ma a kua a ijiir i yeren kera.
18 A vihi ikyur i ne ye a Ku la kera,Shi kwagh u ne gbe zwa môm sha mi a Uwar* la una er ga.+
Shi shighe u mngerem ma a sar avenge ma a lu karen sha utaha la,Ma a tim ne.
19 Hanma kwa u ma kar cii,Ma a kuwa a ven kera;+Gadia ma a lu karen hanma pepe,Atetan man tugh.
Ka mciem tseegh ma a na vea kav kwagh u yange ve ungwa la ye.”*
20 Gadia gambe ngu tiônôô gande u yaven sha mi,Shi ikyondo i i tum la, i ndahar gande u cirin iyol.
21 Gadia Yehova una mough a tile sha, er sha Uwo u Perashim nahan;Una mough iyol na una tile sha, shin pev* ikyua a Gibeon,+Sha er una er kwagh na—kwagh na u kpilighyol—
Man sha er una er tom na—tom na u kpilighyol la yô.+
22 De nen u nahan mbagenev tar,+Sha er a seer tsulen ne ikyangenev ga yô,Sha ci u m ungwa Yehova u akum a sha, Ter u Hemban Cii kaa ér,I wa ishima u timin tar ne cii kera.+
23 Kegh ato ungwa imo yam;Ver ishima ungwa kwagh u me ôr yô.
24 Or u kahan kwagh ka nan kaha kwagh zan zan iyange jimin cii ve nan lôô ivor yee?
Nana gbaa vughur inya samben ér i lu vaanaa gbem tsôô?+
25 Ka nana samben i ia hingir vaanaa yô,Ka nan kera ta kumin u il shi nan lôô kumin ga zee,Ka nan kera lôô alakema man amine kua barli sha ajiir a ve ga zee?
Shi ka nan kera lôô ivor i alakema igen*+ sha akpi a sule ga zee?
26 Gadia Aôndo ka a tese un* gbenda u vough;Aôndo na una wa un kwagh.+
27 Gadia mba dorough kumin u il a kpande u gbidyen iyiav ga,+Mba karen a ikyaver u ikyekye i tôôn ikyav sha kumin ga.
Kpa ka i gbidye kumin u il sha aga,shi ka sha gbo ka i gbidye kumin ye.
28 Or ka nan dorough samuyia ér nana er beredi?
Ei, nan gbidyen u gbem ga;+Shi ka nana kar a ikyaver u ikyekye i tôôn ikyav i nan sha u, a anyinya a nan kpa,Ka nan dorough u ga.+
29 Ngun kpa ka hen Yehova u akum a sha a ve ye,Un u kwaghwan* na a kpilighyolShi a er akaa a vesen la.*+
Ngeren mba shin kpe
^ A shi nan kpa mba ôron ka kwagh u gartamen u Samaria.
^ Shin “igbongor; iyolmoron.”
^ Shin “igbongor; iyolmoron.”
^ Shin “Kor u karen kwagh sha kor u karen kwagh, kor u karen kwagh sha kor u karen kwagh.”
^ Shin “Kor u karen kwagh sha kor u karen kwagh, kor u karen kwagh sha kor u karen kwagh.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “konmnger.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin a fatyô u kaan ér, “Shighe u vea kav la, mciem ma a gba ve iyol.”
^ Shin “pev u lun gburumaa.”
^ Ishember i ken zwa Heberu ne ngi ôron kwagh u kpan-alakema u yange i kahan sha ayange a tsuaa ken Igipiti la.
^ Shin “tsaha un sha; kôôm un sha.”
^ Shin “awashima.”
^ Shin “Shi kwaghfan na a gande ave la.”
