Numeros 27:1-23
27 Insan inmasingger iray bibiin ananak nen Zelofehad,+ say anak nen Hefer, ya anak nen Gilead, ya anak nen Makir, ya anak nen Manases, a nanlapud saray pamilya nen Manases ya anak nen Jose. Say kangaranan na saray bibiin ananak to et Mahla, Noa, Hogla, Milca, tan Tirza.
2 Inmalagey irad arapan di Moises, Eleazar a saserdote, saray papangulo,+ tan amin a totoo, diad lolooban a tolda a pantitiponan, tan inkuan da:
3 “Inatey ed kalawakan so ama mi, balet sikatoy agkaiba ed samay ulop a nankakasakey a sinmumpad si Jehova, saramay sinmuportad si Kora,+ noagta sikatoy inatey ed dilin kasalanan to tan anggapoy anak ton laki.
4 Akin et nabalang so ngaran nen ama mi manlapud pamilya to lapud anggapoy anak ton laki? Ikdan yo kami na kayarian min dalin diad limog na agagi nen ama mi.”
5 Kanian inyarap nen Moises ed si Jehova so kaso ra.+
6 Insan oniay inkuan nen Jehova ed si Moises:
7 “Duga iray ananak nen Zelofehad. Nepeg mon iter ed sikara so kayarian dan dalin bilang tawir dad limog na saray agagi nen ama ra tan iyalis mod sikara so tawir nen ama ra.+
8 Tan ibagam ed saray Israelita, ‘No ompatey so sakey a too ya anggapoy anak ton laki, nepeg yon iyalis so tawir tod anak ton bii.
9 Tan no anggapoy anak ton bii, iter yod agagi ton lalaki so tawir to.
10 Tan no anggapoy agagi ton lalaki, iter yod lalakin agagi nen ama to so tawir to.
11 Tan no anggapoy lalakin agagi nen ama to, iter yo so tawir tod sankaasinggeran a kanayon na pamilya to, tan nakayarian to itan. Onkana iya bilang sakey a totontonen unong ed ganggan parad saray Israelita, unong ya ingganggan nen Jehova ed si Moises.’”
12 Insan inkuan nen Jehova ed si Moises: “Tatdang kad sayan palandey na Abarim,+ tan bantag mo so dalin ya iter kod saray Israelita.+
13 Sano anengneng mo la itan, nitipon ka met lad saray totoom,*+ a singa si Aaron ya agim,+
14 ta sanen akikolkol ed siak iray totoo diad kalawakan na Zin, nanrebelde kayod ganggan ko tan agyo ak pinasanto ed arapan da diad panamegley na danum.+ Saya may danum na Meriba+ ed Kades+ diad kalawakan na Zin.”+
15 Insan oniay inkuan nen Moises ed si Jehova:
16 “Manuro komon si Jehova, say Dios a panlalapuan na espiritu na amin a totoo,* na sakey a too
17 ya ompaway tan onloob diad unaan da tan mangipaway ed sikara tan mangiloob ed sikara, pian say totoo nen Jehova et agmagmaliw a singa saray karneron andian na managpastol.”
18 Kanian inkuan nen Jehova ed si Moises: “Alam si Josue ya anak nen Nun, sakey a lakin walaan na espiritu, tan itapew mod sikato so limam.+
19 Insan sikatoy paalagey mod arapan nen Eleazar a saserdote tan ed arapan na amin a totoo, tan sikatoy turom diad pakanengneng da.+
20 Nepeg mon iter ed sikato so arum ya autoridad* mo,+ pian ondengel ed sikato so amin ya Israelita.+
21 Sikatoy onalagey ed arapan nen Eleazar a saserdote, ya onkonsultad si Jehova parad sikato, pian naamtaan so desisyon ed panamegley na Urim.+ Diad ganggan to et ompaway ira tan diad ganggan to et onloob ira, sikato tan amin ya Israelita a kaiba to tan say amin a totoo.”
22 Kanian ginawa nen Moises so ingganggan nen Jehova ed sikato. Inala toy Josue tan pinaalagey tod arapan nen Eleazar a saserdote tan ed arapan na amin a totoon nantitipon,
23 tan intapew tod sikato iray lima to tan tinuro to,+ unong ya imbaga nen Jehova ed panamegley nen Moises.+
Paimanod leksab
^ Sakey iyan maanlong a balikas parad ipapatey.
^ Literal, “saray espiritu na amin a laman.”
^ Odino “kagalangan.”
