Numeros 14:1-45
14 Insan inkasil na amin a totoon nantitipon so boses da, tan nantultuloy iran nanakis diad saman a labi.+
2 Nanmeremere so amin ya Israelita ed si Moises tan Aaron,+ tan nansalita so amin a totoon nantitipon sumpad sikara, ya inkuan da: “Inatey kami la komon ed dalin na Ehipto, odino inatey kami la komon ed sayan kalawakan!
3 Akin et inyakar itayo nen Jehova ed sayan dalin pian ompatey ed espada?+ Saray kaasawaan tan ananak tayo et magmaliw a samsam.+ Agta magmaong ni no ompawil tayod Ehipto?”+
4 Ibabaga da ni ingen ed sakey tan sakey: “Manuro itayo na sakey a lider, insan ompawil tayod Ehipto!”+
5 Diad saya et dinmakmomo ed dalin si Moises tan Aaron diad arapan na interon atipon a kongregasyon na saray Israelita.
6 Si Josue+ ya anak nen Nun tan si Caleb+ ya anak nen Jefune, a kaibad saramay nan-espiya ed dalin, et pinilat day kawes da,
7 tan oniay inkuan dad amin ya Israelita: “Say dalin a nila min nan-espiyaan et agaylan abig a dalin.+
8 No naliliketan si Jehova ed sikatayo, seguradon iyakar to itayod saman a dalin tan iter to iman ed sikatayo, sakey a dalin a manag-agus so gatas tan dilo.+
9 Balet agkayo manrerebelde ed si Jehova, tan agyo tatakotan iray totoo ed saman a dalin,+ ta akmonen tayo ra.* Nakal lay salimbeng da, tan walad sikatayo si Jehova.+ Agyo ra tatakotan.”
10 Ingen, nantotongtongan na amin a totoon nantitipon so panupak ed sikara.+ Balet pinmatnag ed amin a totoo na Israel so gloria nen Jehova diad tolda a pantitiponan.+
11 Insan inkuan nen Jehova ed si Moises: “Anggad kapigan so agpanrespeto ed siak na sarayan totoo,+ tan anggad kapigan ya agda ipatnag so pananisia ed siak anggaman ed amin a tanda a ginawak ed limog da?+
12 Paulyan mon saloten tan pataynanen ko ra, tan pagmaliwen ta kan sakey a nasyon a mas baleg tan mabiskeg nen say sikara.”+
13 Balet inkuan nen Moises ed si Jehova: “No ontan so gawaen mo, narengelan itan na saray Ehipsio, a diad sikara so angipawayan mod sarayan totoo ed panamegley na pakayarim,+
14 tan itongtong da itan ed saray manaayam ed sayan dalin. Nadngelan da met lan sika, Jehova, et walad limog na sarayan totoo+ tan nampanengneng kad sikara ya arap-arapan.+ Sika si Jehova, tan say lurem mo et manaayam ed tagey da, tan wala kad unaan da ed panamegley na singa lusek a lurem no agew tan singa lusek ya apoy no labi.+
15 No pateyen mon maminpinsan* irayan totoo, oniay ibaga na saray nasyon ya akadngel ed inkabantog mo:
16 ‘Agnayarian nen Jehova ya iyakar irayan totoo ed dalin ya insipan ton iter ed sikara, kanian pinatey to ra diad kalawakan.’+
17 Ipangasim natan, Jehova, nipatnag komon so kabaleg na pakayarim unong ya insipan mo, lapud inkuan mon:
18 ‘Si Jehova et matantan a manpasnok tan abalbaleg ed matoor a panangaro,*+ a mameperdona ed impakalingo tan impakasumlang, balet agton balot abuloyan ya agnadusa so nankasalanan, a dusaen to iray ananak lapud impakalingo na saray kaamaan, diad komatlon henerasyon tan komapat a henerasyon.’+
19 Ipangasim, perdonam so kasalanan na sarayan totoo unong ed kabaleg na matoor a panangarom, a singa impamerdonam ed sarayan totoo manlapud Ehipto ya anggad natan.”+
20 Insan inkuan nen Jehova: “Perdonaen ko ra unong ya imbagam.+
21 Anggaman ontan, unong a mabilay ak, say interon dalin et napano na gloria nen Jehova.+
22 Balet amin a totoo ya akanengneng ed gloriak tan saray tandan+ ginawak ed Ehipto tan ed kalawakan, tan siansia nin sinubok da ak+ ya aminsamplo tan agda ak dinengel,+
23 agdan balot nanengneng so dalin ya insipan kod saray kaamaan da. On, amin iramay agmanrerespeto ed siak et agda itan nanengneng.+
24 Balet lapud duma so espiritu nen Caleb+ a lingkor ko tan nantultuloy a tinmumbok ed siak diad interon puso to, seguradon sikatoy iyakar kod dalin a nila to, tan nakayarian itan na saray ilalak to.+
25 Lapud manaayam ed lawak* iray Amalekita tan saray Canaanita,+ pawil kayo nabuas tan la kayod kalawakan diad dalan a mamaarap ed Ambalangan Dayat.”+
26 Insan oniay inkuan nen Jehova ed si Moises tan Aaron:
27 “Anggad kapigan so panmeremere na sayan mauges a totoo ed siak?+ Nadngel ko no antoy sengegan na panmemeremere na saray Israelita ed siak.+
28 Ibaga yod sikaran, ‘“Unong a mabilay ak,” so inyabawag nen Jehova, “gawaen kod sikayo so nadngel kon imbaga yo!+
29 Ompatey kayod sayan kalawakan,+ on, amin yon nirehistro a mantaon na 20 a patagey, amin yon nanmeremere ed siak.+
30 Anggapod sikayoy makaloob ed dalin ya insipan ko* a panayaman yo,+ nilikud ed si Caleb ya anak nen Jefune, tan si Josue ya anak nen Nun.+
31 “‘“Tan iloob ko ray ananak yo, ya imbaga yon magmaliw a samsam,+ tan nanengneng da so dalin ya impulisay yo.+
32 Balet ompatey kayon mismo diad sayan kalawakan.
33 Natan, saray ananak yo et magmaliw a managpastol ed kalawakan diad loob na 40 taon,+ tan ebatan da so ginawa yon ag-inkamatoor,* anggad ompatey kayon amin diad kalawakan.+
34 Unong ed bilang na saray agew ya impan-espiya yod dalin, 40 agew,+ sakey agew parad sakey taon, sakey agew parad sakey taon, ebatan yo ray impankasalanan yod loob na 40 taon,+ pian naamtaan yo no antoy pansumpalan na isusumpa ed siak.*
35 “‘“Siak, si Jehova, so nansalita. Onia so gawaen kod sayan amin a mauges a totoo, saramay nantitipon ya onsumpad siak: Naupot irad sayan kalawakan, tan ompatey ira dia.+
36 Saramay lalakin imbaki nen Moises a nan-espiya ed dalin tan sengegan na impanmeremere ed sikato na amin a totoon nantitipon sanen pinmawil irayan lalaki a walaay mauges a balita nipaakar ed dalin,+
37 on, saramay lalakin angipasabi na mauges a balita nipaakar ed dalin so nadusa tan ompatey ed arapan nen Jehova.+
38 Balet si Josue ya anak nen Nun tan si Caleb ya anak nen Jefune, a kaibad saramay nan-espiya ed dalin, et seguradon mantultuloy a manbilay.”’”+
39 Sanen imbaga iya nen Moises ed amin ya Israelita, nanermen a maong iray totoo.
40 Insan, kabkabuasan iran binmangon tan sinali ray ontatdang ed toktok na palandey, ya inkuan dan: “Nia, akaparaan kamin ontatdang ed pasen ya imbaga nen Jehova, ta nankasalanan kami.”+
41 Balet inkuan nen Moises: “Akin et lalampasan yoy ganggan nen Jehova? Ag-iya ontalona.
42 Agkayo ontatatdang, ta anggapo ed sikayo si Jehova; tan taloen kayo na saray kakabusol yo.+
43 Ta wadtan ya onarap ed sikayo iray Amalekita tan saray Canaanita,+ tan ompatey kayod espada. Lapud sinmian kayod si Jehova, agmansiansia ed sikayo si Jehova.”+
44 Balet impilit day linmad toktok na palandey,+ ingen ta ag-inmalis ed pegley na kampo so kaban na sipanan nen Jehova tan si Moises.+
45 Insan linmeksab iray Amalekita tan saray Canaanita a manaayam ed saman a palandey tan kinabil da ra, tan intaytayak da ra ya anggad Horma.+
Paimanod leksab
^ Literal, “ta tinapay ira ed sikatayo.”
^ Literal, “singa saksakey a laki.”
^ Odino “maaron-kaabigan.”
^ Odino “abeban patar.”
^ Literal, “angitageyan koy limak.”
^ Literal, “prostitusyon.”
^ Odino “no siak so magmaliw a kabusol yo.”
