Numeros 10:1-36
10 Insan inkuan nen Jehova ed si Moises:
2 “Manggawa kay duaran trumpetam;+ nepeg a gawa iratan ed pinanday a pilak, tan usar mo iratan a panawag ed saray totoo tan pamapikal ed saray kampo.
3 Sano apaknol iratan a dua, nepeg ya amin et mantitipon pian onarap ed sika diad lolooban na tolda a pantitiponan.+
4 No sakey labat so apaknol, saray papangulo labat, saray ulo na nilibo ed Israel, so onlad sika.+
5 “Sano paknolen yo so trumpeta ed manguman-uman a tanol, nepeg ya ombuat iray kampo a walad bukig.+
6 Sano paknolen yo lamet so trumpeta ed manguman-uman a tanol, nepeg ya ombuat iray kampo a walad abalaten.+ Ontan so pamaknol da ed trumpeta kapagno ombuat so sakey ed sikara.
7 “Natan, no pantitiponen yo so kongregasyon, nepeg yon paknolen iray trumpeta,+ balet aliwan diad manguman-uman a tanol.
8 Saray ananak nen Aaron, saray saserdote, so nepeg a mamaknol ed saray trumpeta,+ tan say pangusar ed saratan et manbayag a ganggan parad sikayo diad amin a henerasyon yo.
9 “No bilang diad dalin yo et miguerra kayo ed sakey a mamapairap ed sikayo, paknol yo ray trumpeta pian nipaamta so piguerra,+ tan nonoten kayo nen Jehova a Dios yo tan niliktar kayo ed saray kakabusol yo.
10 “Ontan met ed saray maliket ya okasyon yo+—saray piesta yo+ tan diad gapo na saray bulan yo—nepeg yon paknolen iray trumpeta diad arap na saray apay yon popoolan+ tan saray bagat yon pandurungoan;+ onkana iratan bilang panonot ed sikayo diad arapan na Dios yo. Siak si Jehova a Dios yo.”+
11 Diad komaduan taon, diad koma-20 agew na komaduan bulan,+ tinmagey so lurem manlapud tabernakulo+ na Testimonya.
12 Kanian ginapoan na saray Israelita so ompikal manlapud kalawakan na Sinai unong ed niyuksoy ya ibuat da,+ tan tinmunda ed kalawakan na Paran+ imay lurem.
13 Saya so unonan pankanawnawa a binmuat ira diad intumbok dad ganggan nen Jehova ed panamegley nen Moises.+
14 Kanian say taloran-tribu a dibisyon ed kampo na saray ananak nen Juda so inmunan binmuat unong ed saray grupo ra,* tan si Naason+ ya anak nen Aminadab so angidaulo ed sayan grupo.
15 Say angidaulo ed grupo na tribu na saray ananak nen Isacar et si Netanel+ ya anak nen Zuar.
16 Say angidaulo ed grupo na tribu na saray ananak nen Zebulon et si Eliab+ ya anak nen Helon.
17 Sanen abagbag la so tabernakulo,+ binmuat iray ananak nen Gerson+ tan saray ananak nen Merari,+ a sikara so mangaawit ed tabernakulo.
18 Insan say taloran-tribu a dibisyon ed kampo nen Ruben so binmuat unong ed saray grupo ra,* tan si Elizur+ ya anak nen Sedeur so angidaulo ed sayan grupo.
19 Say angidaulo ed grupo na tribu na saray ananak nen Simeon et si Selumiel+ ya anak nen Surisadai.
20 Say angidaulo ed grupo na tribu na saray ananak nen Gad et si Eliasaf+ ya anak nen Deuel.
21 Insan binmuat iray Kohatita, a mangaawit ed saray kagawaan diad santuaryo.+ Diad isabi ra so pangipaalagey ed tabernakulo.
22 Insan say taloran-tribu a dibisyon ed kampo na saray ananak nen Efraim so binmuat unong ed saray grupo ra,* tan si Elisama+ ya anak nen Amihud so angidaulo ed sayan grupo.
23 Say angidaulo ed grupo na tribu na saray ananak nen Manases et si Gamaliel+ ya anak nen Pedazur.
24 Say angidaulo ed grupo na tribu na saray ananak nen Benjamin et si Abidan+ ya anak nen Gideoni.
25 Insan binmuat so taloran-tribu a dibisyon ed kampo na saray ananak nen Dan unong ed saray grupo ra,* a sikara so bantay ed benegan parad amin a kampo, tan si Ahiezer+ ya anak nen Amisadai so angidaulo ed sayan grupo.
26 Say angidaulo ed grupo na tribu na saray ananak nen Aser et si Pagiel+ ya anak nen Ocran.
27 Say angidaulo ed grupo na tribu na saray ananak nen Neftali et si Ahira+ ya anak nen Enan.
28 Onia so uksoy a tutumboken na saray Israelita tan saray grupo ra* sano ombuat ira.+
29 Insan inkuan nen Moises ed si Hobab ya anak nen Reuel*+ a Midianita, say katulangan nen Moises: “Onla kami lad pasen ya imbaga nen Jehova ya, ‘Iter ko itan ed sika.’+ Mila kad sikami,+ tan maabig so pideneng mid sika, ta angisipan si Jehova na maabig iran bengatla parad Israel.”+
30 Balet inkuan tod sikato: “Agak mila. Ompawil ak lad dilin bansak tan ed saray kakanayon ko.”
31 Diad saya et inkuan to: “Ipangasim, agmo kami tataynanan, ta amtam no iner so nepeg min pankampoan ed kalawakan, tan nayarian moy magmaliw a giya* mi.
32 Tan no mila kad sikami,+ seguradon ipatnag mid sika so kamaongan ya ipatnag nen Jehova ed sikami.”
33 Kanian nanakar ira manlapud palandey nen Jehova+ pian manbiahe na taloy agew, tan say kaban+ na sipanan nen Jehova et walad unaan da diad taloy agew ya impanbiahe ra pian mananap na pampainawaan da.+
34 Tan diad agew et walad tagey da so lurem nen Jehova+ sano ombuat la rad kampo.
35 Kada no iyalis lay Kaban, ikuan nen Moises: “Alagey ka, O Jehova,+ tan nitaytayak komon iray kalaban mo, tan ontaynan komon ed arapan mo iramay mamubusol ed sika.”
36 Tan sano ontunda itan, ikuan to: “Pawil ka pa, O Jehova, ed saray dakerakel* a nilibo na Israel.”+
