Numeros 17:1-13
-
Sinmimit so baston nen Aaron bilang tanda (1-13)
17 Oniay inkuan natan nen Jehova ed si Moises:
2 “Mitongtong kad saray Israelita tan mangala kad sikara na sakey a baston parad kada pamilya na kaamaan da, manlapud saray papangulo na kada pamilya na kaamaan da,+ 12 baston ya amin. Isulat mo so ngaran na balang sakey ed baston to.
3 Isulat moy ngaran nen Aaron diad baston nen Levi, ta sakey a baston so parad ulo na kada pamilya na kaamaan da.
4 Iyan mo iray baston ed tolda a pantitiponan diad arap na Testimonya,+ a ditan ak naynay ya ompaparungtal ed sikayo.+
5 Tan say baston na samay laki a pilien ko+ et onsimit, tan patundaen ko so panmemeremere ed siak na saray Israelita,+ ontan met ed panmemeremere da ed sikayo.”+
6 Kanian akitongtong si Moises ed saray Israelita, tan say amin a papangulo ra et angiter ed sikato na baston—sakey a baston parad kada pangulo na pamilya na kaamaan da, 12 baston—tan kaibad saray baston da so baston nen Aaron.
7 Insan inyan nen Moises iray baston diad tolda na Testimonya ed arapan nen Jehova.
8 Sanen linmay Moises ed tolda na Testimonya diad tinmumbok ya agew, anengneng ton sinmimit so baston nen Aaron parad sankaabungan nen Levi tan nanrosas tan nambunga itan na aluton almendro.
9 Insan inyakar nen Moises ed amin a totoo na Israel so amin a baston manlapud arapan nen Jehova. Ninengneng da iratan, tan inala na kada laki so baston to.
10 Insan inkuan nen Jehova ed si Moises: “Ipawil moy baston nen Aaron+ diad arap na Testimonya bilang sakey a bengatlan nisinop ya onkanan tanda+ parad saray rebelyoson ananak,+ pian ontunda so panmemeremere dad siak ta pian ag-ira ompatey.”
11 Tampol a ginawa nen Moises so ingganggan nen Jehova ed sikato. Ontan so ginawa to.
12 Insan inkuan na saray Israelita ed si Moises: “Natan et seguradon ompatey kami, seguradon naderal kami, naderal kami lan amin!
13 Ompatey so siopaman ya onasingger ed tabernakulo nen Jehova!+ Ontan kasi so paraan na ipatey mi?”+
