Numeros 35:1-34
35 Oniay intuloy ya imbaga nen Jehova ed si Moises diad saray patar a desierto na Moab ed abay na Jordan+ diad Jerico:
2 “Bilin mo ray Israelita ya ikdan da ray Levita na saray syudad a panayaman da manlapud tawir da,+ tan iter dad saray Levita iray panagpastolan a walad liber na saray syudad.+
3 Manayam irad saray syudad, tan saray panagpastolan et parad saray ayayep da, saray kayarian da, tan arum ni ran ayayep da.
4 Saray panagpastolan na saray syudad ya iter yod saray Levita et 1,000 kasiko* manlapud padir ya akapaliber ed syudad.
5 Manukat kad paway na syudad na 2,000 kasiko ed bandad bukig, 2,000 kasiko ed bandad abalaten, 2,000 kasiko ed bandad sagur, tan 2,000 kasiko ed bandad amianen, a say syudad et walad pegley. Saya so onkanan panagpastolan diad saray syudad da.
6 “Saray syudad ya iter yod saray Levita et 6 syudad a salimbengan+ a batikan na akapatey,+ ontan met ed 42 syudad.
7 Ami-amin a syudad ya iter yod saray Levita et 48, kaiba iray panagpastolan na saratan.+
8 Saray syudad ya iter yod sikara et manlapud kayarian na saray Israelita.+ Mangala kayoy dakel manlapud babaleg a grupo, tan mangala kayoy daiset manlapud memelag a grupo.+ Iter na kada grupo ed saray Levita so arum ed saray syudad da unong ed kabaleg na tawir ya awaten da.”
9 Oniay intuloy ya imbaga nen Jehova ed si Moises:
10 “Mitongtong kad saray Israelita tan ibagam ed sikara, ‘Baliw yoy Jordan a mamaarap ed dalin na Canaan.+
11 Mamili kayo na saray syudad a mainomay yon nasabi pian onkanan syudad a salimbengan, a nepeg a batikan na samay agto ginagalay amatey na too.*+
12 Sarayan syudad so onkanan salimbengan yo manlapud manangibales na dala,+ pian ag-ompatey imay akapatey antis na iyalagey tod arapan na saray totoon nantitipon parad panangukom.+
13 Say anemiran syudad ya itarya yo et parad sayan gagala.
14 Taloran syudad so itarya yo diad sayan pagpag na Jordan+ tan taloran syudad ed dalin na Canaan+ pian onkanan syudad a salimbengan.
15 Sarayan anemiran syudad et onkanan salimbengan parad saray Israelita, parad dayo,+ tan parad miaayam ed limog da, pian ombatik ditan so siopaman ya agto ginagalay amatey na too.*+
16 “‘Balet no sikatoy pinekpek to na balatyang a kagawaan tan inatey, sikatoy sakey a managpatey. Nepeg a pateyen so managpatey.+
17 Tan no sikatoy pinekpek to na bato a nayarin pansengegay ipapatey, tan lapud satan et sikatoy inatey, sikatoy sakey a managpatey. Nepeg a pateyen so managpatey.
18 Tan no sikatoy pinekpek to na kiew a kagawaan a nayarin pansengegay ipapatey, tan lapud satan et sikatoy inatey, sikatoy sakey a managpatey. Nepeg a pateyen so managpatey.
19 “‘Say manangibales na dala so nepeg a mamatey ed samay managpatey. Sikaton mismo so mamatey ed samay amatey sano naabet to.
20 No sikatoy intulak to lapud pambusol odino tinupak to na sakey a bengatla lapud mauges a getma,* tan nanresulta itan ed ipapatey,+
21 odino lapud pambusol et sikatoy sinakitan tod panamegley na lima to, tan inatey, nepeg a pateyen imay amatey ed sikato. Sikatoy sakey a managpatey. Say manangibales na dala so mamatey ed samay amatey sano naabet to.
22 “‘Balet no sikatoy nitulak to ya agto ginagala tan aliwan lapud pambusol odino atupak to na sakey a bengatla ya anggapoy mauges a getma to,*+
23 odino sikatoy agto anengneng tan apataan to na bato, tan sikatoy aliwan kabusol tan agto getma so pamasakit ed sikato, tan inatey so too,
24 nepeg a mangukom iray totoon nantitipon ed baetan na samay akapatey ed sikato tan samay manangibales na dala, unong ed sarayan totontonen.+
25 Nepeg ya isalba na saray totoon nantitipon imay akapatey manlapud samay manangibales na dala tan sikatoy ipawil da ed syudad a salimbengan a binatikan to, tan sikatoy nepeg a manayam ditan anggad ipatey na atagey a saserdote ya alanaan na masanton larak.+
26 “‘Balet no pinmaway imay akapatey diad ketegan na syudad a salimbengan a binatikan to
27 tan sikatoy aromog na samay manangibales na dala ed paway na ketegan na kawalaan ton syudad a salimbengan tan pinatey to may akapatey, anggapoy kasalanan tod dala.
28 Ta sikatoy nepeg komon a manayam ed kawalaan ton syudad a salimbengan anggad ipatey na atagey a saserdote. Balet kayari ipatey na atagey a saserdote et nayari lan ompawil imay akapatey diad dalin to.+
29 Saraya so onkanan totontonen yo parad panangukom diad amin a henerasyon yo ed amin a pasen a panaayaman yo.
30 “‘Siopaman ya amatey na too* et nepeg a pateyen bilang sakey a managpatey+ unong ed testimonya* na saray akatasi;+ balet agnepeg a pateyen so sakey a too* unong ed testimonya na sakey labat ya akatasi.
31 Agkayo mangaawat na dondon parad bilay* na sakey a managpatey a manepeg ya ompatey, ta sikatoy nepeg a pateyen.+
32 Tan agkayo mangaawat na dondon parad samay tinmaynan ed kawalaan ton syudad a salimbengan, pian sikatoy makapanayam lamet ed dalin to antis ya ompatey so atagey a saserdote.
33 “‘Agyo nepeg a dutakan so dalin a panaayaman yo, ta dutakan na dala so dalin,+ tan anggapoy pananakbong parad dala a niyibung ed dalin nilikud ed dala na samay angiyibung ed satan.+
34 Agyo nepeg a dutakan so dalin a panaayaman yo, a ditan so panaayaman ko; ta siak, si Jehova, et manaayam ed pegley na saray totoo na Israel.’”+
Paimanod leksab
^ Say sakey a kasiko et 44.5 sentimetro (17.5 pulgada). Nengnengen so Apendise B14.
^ Odino “angabil na kamarerwa.”
^ Odino “angabil na kamarerwa.”
^ Literal, “legan a manatambang.”
^ Literal, “ya agnantambang.”
^ Odino “kamarerwa.”
^ Literal, “sangi.”
^ Odino “kamarerwa.”
^ Odino “kamarerwa.”
