Cɛn kun’n, Piɛli ɔli jue tralɛ Galile Jenvie’n nun lɔ. Kɛ ɔ́ yó sɔ’n, nn Zezi fiteli i akoto mun be ɲrun ɔ nin-a cɛman. Ɔ nin Toma nin Zaki nin Zezi i sɔnnzɔnfuɛ wie mun ekun yɛ be ɔli-ɔ. Be guali be lala’n kɔnguɛ lele lika cɛnnin. Sanngɛ b’a ɲanman like fi.

Nglɛmun tutu kpa’n, be wunnin bian kun ce’n su lɔ. Ɔ flɛli be, kpɛkun ɔ usali be kɛ: ‘?Amun ɲannin jue?’ Be tɛli i su kɛ: “Cɛcɛ-o!” Ɔ seli be kɛ: “Amun gua lala’n alie’n i fama su.” Kɛ be yoli sɔ’n lala’n fali jue kpanngban kpa. Ɔ maan be kwlá cuɛnman lala’n naan b’a fa sie i alie’n nun bɔbɔ. Zan wunnin i wlɛ kɛ Zezi-ɔ. I sɔ’n ti’n ɔ seli kɛ: “E Min’n niɔn.” Kɛ Piɛli tili i sɔ’n, ɔ tɔli nzue’n nun. Ɔ wuɛli nzue’n lele juli ce’n su lɔ. Zezi i sɔnnzɔnfuɛ onga mun be kannin alie’n toli be lɔ.

Kɛ be juli cenje’n su lɛ’n, be wunnin kɛ kpanwun nin jue o sin su. Zezi seli be kɛ be fa jue nga be trali be’n i wie bla naan be fa uka ng’ɔ o sin nun’n su. I sin’n, ɔ seli be kɛ: “Amun bla be wa di like.”

Kɛ be wieli like di’n, Zezi usali Piɛli kɛ: ‘?A klo min tra jue tralɛ’n?’ Ɔ tɛli i su kɛ: “Ɛɛn min Min, a si kɛ n klo wɔ.” Zezi seli i kɛ: “Man min bua ba’m be aliɛ.” Zezi usɛli i ekun kɛ: “?Piɛli, a klo min?” Ɔ tɛli i su kɛ: “Min Min, a si kɛ n klo wɔ.” Zezi seli i kɛ: “Nian min bua ba’m be lika.” Zezi usali Piɛli kosan kunngba’n kpɛ nsan. I sɔ’n boli Piɛli i wla. Ɔ maan ɔ seli i kɛ: “Min Min, a si sa kwlakwla. A si kɛ n klo wɔ.” Zezi seli i kɛ: “Man min bua ba’m be aliɛ.” I sin’n, ɔ seli Piɛli kɛ: “Su min su titi.”