Ɛstɛli ti Zuifu talua. Ɔ tran Pɛrsifuɛ mun be klɔ nga be flɛ i kɛ Sizi’n i su lɔ. Laa’n, i osufuɛ mun be tran Zerizalɛmun. Sanngɛ Nɛbikadnɛzali trali be kekle nun ɔli. I si i niaan bian mɔ be flɛ i Mardose’n yɛ ɔ tɛli i-ɔ. Ɔ di junman Pɛrsi famiɛn mɔ be flɛ i kɛ Asierisi’n i awlo lɔ.

Cɛn kun’n, Famiɛn Asierisi waan be kunndɛ bla uflɛ be mɛn i. I sran mun be fali nvle’n nun bla klanman kpa mun be bali. Ɛstɛli o bla sɔ mun be nun wie. Bla kwlaa sɔ mun be nun’n, Ɛstɛli yɛ famiɛn’n fali-ɔ. Mardose seli Ɛstɛli kɛ nán ɔ kan kle sran kɛ ɔ ti Zuifu.

Be flɛ bian kun kɛ Aman. Ɔ ti famiɛn’n i awlo lɔ sran dandan mun be su kpɛn, yɛ ɔ tu i wun. Ɔ kunndɛ kɛ sran mun be kwlaa be koto i bo. Sanngɛ Mardose waan ɔ kotomɛn i bo. I sɔ’n ti’n, ɔ fali ya dan kpa, yɛ i waan ɔ́ kún Mardose. Kɛ Aman wa tili i kɛ Mardose ti Zuifu’n, ɔ fali ajalɛ kɛ ɔ́ kún Zuifu mun be kwlaa nga be o be nvle’n nun’n. Ɔ seli famiɛn’n kɛ: ‘Zuifu mun be timan kpa. Ɔ fata kɛ e nunnun be.’ Asierisi tɛli i su kɛ: ‘Like kwlaa nga a kunndɛ kɛ á yó’n, yo.’ Kpɛkun ɔ mannin Aman i atin kɛ ɔ kpɛ mmla kun. Mmla sɔ’n se kɛ Adar anglo’n i le blu-nin-nsan (13) su’n, maan be kun Zuifu mun be kwlaa. Zoova wunnin sa sɔ’n i kwlaa nun.

Ɛstɛli siman kɛ b’a kpɛ mmla. Ɔ maan Mardose fali mmla fluwa’n kun ko mannin Ɛstɛli. Kpɛkun ɔ seli i kɛ: ‘Ko wun famiɛn’n i wun.’ Ɛstɛli seli i kɛ: ‘Sran kwlaa nga famiɛn’n w’a flɛmɛn i naan ɔ kɔ i wun wunlɛ’n, be kun i. I cɛn ba ablasan (30) yɛ, famiɛn’n nin-a flɛman min. Sanngɛ ń má kɔ́. Sɛ ɔ fɛ i kpɔnman’n tinngɛ min ɲrun’n, be su kunman min. Sanngɛ sɛ w’a yoman sɔ’n, bé kún min.’

Yɛ Ɛstɛli ɔli famiɛn’n i awlo lɔ-ɔ. Kɛ famiɛn’n wunnin i’n, ɔ fɛli i kpɔnman’n tinngɛli i ɲrun. Ɔ wunngeli famiɛn’n i wun lɔ, kpɛkun famiɛn’n usɛli i kɛ: ‘?Ɛstɛli, ngue yɛ a kunndɛ kɛ n yo man wɔ-ɔ?’ Ɛstɛli tɛli i su kɛ: ‘M’an tɔn aliɛ dan kpa, min waan a nin Aman amun bla naan e ko di.’ Kɛ bé dí like’n, Ɛstɛli seli be kɛ be bla cɛn uflɛ naan be wa di like ekun. Kɛ be bali’n, famiɛn’n usali Ɛstɛli kɛ: ‘?Ngue yɛ a kunndɛ kɛ n yo man wɔ-ɔ?’ Ɛstɛli tɛli i su kɛ: ‘Sran kun kunndɛ kɛ ɔ́ kún min nin min nvle’n nunfuɛ mun. Yaci de e.’ Yɛ famiɛn’n usɛli i kɛ: ‘?Wan yɛ ɔ kunndɛ kɛ ɔ́ kún wɔ-ɔ?’ Ɔ tɛli i su kɛ: ‘Klunwifuɛ ng’ɔ o yɛ’n niɔn. Aman-ɔn.’ Asierisi fali ya dan kpa, ɔ maan be ja nun lɛ’n, ɔ yoli maan be kunnin Aman.

Sran fi kwlá kaciman mmla nga Aman kpɛli’n. Famiɛn’n bɔbɔ kwlá kacimɛn i kun. I sɔ’n ti’n, famiɛn’n fali Mardose sieli i sran dandan mun be su kpɛn, kpɛkun ɔ mɛnnin i atin kɛ ɔ kpɛ mmla uflɛ. Ɔ maan Mardose kpɛli mmla kun. Mmla sɔ’n se kɛ sɛ sran mun be ba Zuifu mun be kunlɛ’n, maan Zuifu mun be kpli be ti. Adar anglo’n i le blu-nin-nsan (13) su’n, Zuifu mun be kwlali be kpɔfuɛ mun. Kɛ ɔ fɛ i lɛ’n, Zuifu mun be di kwlalɛ sɔ’n i ti cɛn afuɛ kwlaa.