Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 LIKE SUANLƐ 79

Zezi yoli abonuan sa kpanngban

Zezi yoli abonuan sa kpanngban

Ɲanmiɛn i Famiɛn dilɛ’n i ndɛ kanlɛ ti yɛ Zezi bali asiɛ’n su wa-ɔ. Zoova kunndɛ kɛ sran mun be si like nga kɛ Zezi wá dí famiɛn’n, ɔ́ wá yó’n. I sɔ’n ti’n, ɔ fɛli i wawɛ’n mannin Zezi naan ɔ yo abonuan sa wie mun. Zezi kwla yo tukpacifuɛ kwlaa juejue. Lika kwlaa ng’ɔ kɔ’n, tukpacifuɛ mun be ko wun i wun, yɛ ɔ yo be juejue. Aɲinsifuɛ mun be wun ase, sutrefuɛ mun be ti sa, bubuwafuɛ mun be nanti, yɛ mmusu mun be jaso sran mun be su. Kɛ be kɛn i tralɛ’n i nuan su’n bɔbɔ’n, be yo juejue. Sran mun be su Zezi su lika kwlaa. Ɔ jue wie’n, ɔ kunndɛ kɛ ɔ́ trɛ́n i ngunmin kan. Sanngɛ kɛ sran mun be kɔ i sin’n, ɔ fuanman be.

Cɛn kun mɔ Zezi o sua kun nun’n, sran wie mun be fali bubuwafuɛ kun be bali. Sanngɛ kɛ mɔ sran kpanngban o sua sɔ’n nun lɔ’n ti’n, be kwlá wluman lɔ. Ɔ maan be kpɛli toklo kun sua’n i ti su lɔ. Be fali bubuwafuɛ’n be sinnin nun naan b’a jrɛ i Zezi i ɲrun lɛ. Yɛ Zezi seli bian’n kɛ: ‘Jaso naan nanti.’ Kɛ ɔ nantili’n, sran mun be nuan boli be wun.

Cɛn kun ekun mɔ Zezi wlú klɔ kun nun’n, sran blu mɔ kokowe o be wun’n, be jinjin mmua lɔ be kpan se kɛ: ‘Zezi, uka e!’ Blɛ sɔ’n nun’n, kokowefuɛ mun be leman atin be faman be wun mantanman sran mun. Zezi seli be kɛ be wɔ Ɲanmiɛn i sua’n nun lɔ. Zoova i Mmla’n kle kɛ sɛ kokowefuɛ kun yo juejue’n, i sɔ yɛ ɔ fata kɛ ɔ yo-ɔ. Kɛ bé kɔ́’n, be yoli juejue atin’n su. Kɛ kokowefuɛ mun be nun kun wunnin kɛ w’a yo juejue’n,  ɔ sɛli i sin ɔ wa yoli Zezi i kwla, kpɛkun ɔ manmannin Ɲanmiɛn. Sran blu sɔ mun be nun’n, i kunngba cɛ yɛ ɔ yoli Zezi i kwla-ɔ.

Bla kun m’ɔ tɔli tukpacɛ w’a di afuɛ blu-nin-nɲɔn’n (12) ɔ kunndɛli kpa kɛ ɔ́ yó juejue. Ɔ wluwluli sran nga be su Zezi su’n be nun, kpɛkun ɔ kɛnnin i tralɛ’n i nuan su’n. Kɛ ɔ kɛnnin i cɛ’n, ɔ ka lɛ yoli juejue. Kɛ ɔ yoli sɔ’n, Zezi usali kɛ: “Wan yɛ ɔ kannin min-ɔn?” Srɛ kunnin bla’n, sanngɛ ɔ ɔli ko seli Zezi kɛ i yɛ ɔ kɛnnin i-ɔ. Zezi fɔnvɔli bla’n. Ɔ seli i kɛ: ‘Min wa, maan ɔ wla gua ase, kɔ.’

Be flɛ bian kun kɛ Zairisi. Ɔ le ɲrun kpa. Cɛn kun’n, ɔ ko seli Zezi kɛ: ‘Yaci, bla maan e wɔ min awlo lɔ! Min wa bla kan’n su wu.’ Sanngɛ ba’n wuli ka naan Zezi w’a ju Zairisi i awlo lɔ. Kɛ Zezi juli lɔ’n, ɔ wunnin kɛ sran kpanngban be o bian’n i awlo lɔ be su sun. Zezi seli be kɛ: ‘Nán amun sun, ɔ su lafi.’ Ɔ sɔli ba’n i sa’n, kpɛkun ɔ seli kɛ: “Bakan, jaso!” Ɔ ka lɛ jasoli. Yɛ Zezi seli ba’n i si nin i nin be kɛ be man ba’n i like naan ɔ di. Nanwlɛ, ba’n i si nin i nin be klun jɔli kpa.

“Ɲanmiɛn fɛli i wawɛ’n mɛnnin i, ɔ mɛnnin i tinmin. Kpɛkun ɔ wlanwlannin mɛn’n nun, ɔ yoli sran’m be kpa, ɔ yoli be nga Suɛn tɔnfuɛ’n kle be yalɛ’n be kwlaa be juejue, afin Ɲanmiɛn nin i o nun.”—Sa Nga Be Yoli’n 10:38.