Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 LIKE SUANLƐ 51

Sonja su kpɛn’n nin talua kan’n

Sonja su kpɛn’n nin talua kan’n

Izraɛli talua kaan kun o Siri lɔ. Nvle sɔ’n nin Izraɛli be afiɛn’n ti nun kpa. Siri sonja mun yɛ be trɛli i be ɔli lɔ-ɔ. Ɔ ti Naaman m’ɔ ti sonja su kpɛn’n i yi’n i junman difuɛ. Kannzɛ lɔfuɛ mun be suman Zoova’n, sanngɛ talua kan’n su Zoova.

Tukpacɛ tɛ wie wa yoli Naaman. Ɔ maan blɛ kwlaa nun’n, ɔ wunmɛn i wun fɛ. Talua kan’n kunndɛli kpa kɛ ɔ́ úkɛ i. I sɔ’n ti’n, ɔ seli Naaman i yi’n kɛ: ‘N si sran kun m’ɔ kwla yo nannan juejue-ɔ. Izraɛli lɔ’n be flɛ Zoova nuan ijɔfuɛ kun kɛ Elize. Ɔ kwla yo i juejue.’

Naaman i yi’n ko kannin ndɛ nga talua kan’n kannin’n kleli i wun’n. Naaman kunndɛ kɛ ɔ́ yó like kwlaa nga be se i kɛ ɔ yo’n. I sɔ’n ti’n, ɔ ɔli Elize sin Izraɛli lɔ. Ɔ buli i kɛ Elize wá sɔ́ i nun kɛ sran dan wie sa. Sanngɛ Elize bɔbɔ nin Naaman b’a ijɔman. Ɔ sunmɛnnin i sufuɛ’n naan ɔ ko se Naaman kɛ: ‘Kɔ ko wunnzin Zurdɛn nzue’n nun kpɛ nso. Kpɛkun ɔ tukpacɛ’n wíe.’

Naaman fali ya dan kpa. Ɔ seli kɛ: ‘N buli i kɛ Ɲanmiɛn i nuan ijɔfuɛ sɔ’n ɔ́ bó i Ɲanmiɛn’n i dunman, naan ɔ́ tínngɛ i sa’n min su naan ń yó juejue. Kpɛkun, ɔ se min kɛ n ko wunnzin Izraɛli nzue sɔ’n nun. Siri lɔ nzue ba mun be kpa tra nzue nga lele. ?N kwlá wunnzinman lɔ liɛ mun be nun?’ Naaman fali ya, ɔ jasoli Elize i awlo lɛ.

Naaman i sufuɛ mun be ukɛli i naan w’a kaci i akunndan’n. Be seli i kɛ: ‘?Sɛ like kekle wie yɛ ɔ seli wɔ kɛ a yo’n a su yoman? Like ng’ɔ seli wɔ kɛ a yo’n, ɔ ti kaan sa. ?Yɛ sɛ a yo nian’n nin?’ Naaman tili be ndɛ’n. Ɔ ko wunnzinnin Zurdɛn nzue’n nun kpɛ nso. I kpɛ nso su’n, i tukpacɛ’n wieli. Naaman i klun jɔli dan kpa. Ɔ ɔli ko yoli Elize i kwla. Ɔ seli kɛ: ‘Siɛn’n, m’an wun kɛ Zoova yɛ ɔ ti Ɲanmiɛn’n niɔn.’ ?Kɛ Naaman yoli juejue m’ɔ sɛli i sin i awlo’n, wafa sɛ yɛ i sɔ’n yoli Izraɛli talua kan’n niɔn?

“A yoli maan ba kanngan nin ba nɔnman mun be manmannin wɔ.” —Matie 21:16.