Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 LIKE SUANLƐ 35

Anin srɛli Ɲanmiɛn kɛ ɔ mɛn i ba kun

Anin srɛli Ɲanmiɛn kɛ ɔ mɛn i ba kun

Be flɛ Izraɛli bian kun kɛ Ɛlkana. Ɔ le bla nɲɔn. Be flɛ kun Anin, yɛ be flɛ kun kɛ Pɛnina. Anin yɛ Ɛlkana klo i kpa-ɔ. Pɛnina yo Anin i finfin cɛn kwlaa, afin Anin leman ba. Sanngɛ Pɛnina liɛ’n, ɔ le ba kaka. Afuɛ kwlaa nun’n, Ɛlkana nin i awlofuɛ mun be kɔ Silo be ko yi tɛ Ɲanmiɛn i tannin sua’n nun lɔ be mɛn i. Cɛn kun liɛ’n kɛ be ɔli’n, Ɛlkana wunnin kɛ Anin i wla w’a bo i wun dan. Ɔ seli i kɛ: ‘Anin, nán sun. N bɔbɔ n o lɛ. N klo wɔ.’

Kɛ ɔ cɛli kan’n, Anin i ngunmin ɔli Ɲanmiɛn srɛlɛ. Kɛ ɔ́ srɛ́ Zoova’n, nn ɔ́ sún. Ɔ seli kɛ: ‘Zoova, sɛ a man min ba yasua kun’n, ń fɛ́ i ń fá mán wɔ. Ɔ́ káci ɔ liɛ mlɔnmlɔn.’

Kɛ Anin ɔ́ srɛ́ Ɲanmiɛn’n, Eli m’ɔ ti Ɲanmiɛn ɲrun jranfuɛ dan’n ɔ wunnin i. Ɔ buli i kɛ w’a nɔn nzan w’a bo. Anin seli i kɛ: ‘Baba, m’an nɔnman nzan. Afɛ wo min su yɛ n su kan kle Zoova-ɔ.’ Eli wunnin kɛ ndɛ ng’ɔ kannin’n timan kpa. I sɔ’n ti’n, ɔ seli Anin kɛ: ‘Maan Ɲanmiɛn man wɔ like nga a srɛ i’n.’ Anin i wla guali ase yɛ ɔ ɔli-ɔ. Kɛ ɔ yoli sɔ’n w’a diman afuɛ kun, Anin wuli ba yasua kun. Ɔ flɛli i kɛ Samiɛli. Nanwlɛ, Anin klun jɔli dan!

Anin i wla w’a fiman ndɛ ng’ɔ kan kleli Zoova’n su. Kɛ ɔ kpɛli Samiɛli i ɲɔnflɛn cɛ’n, ɔ fɛ i ɔli Ɲanmiɛn i tannin sua’n nun lɔ naan ɔ ko su i. Ɔ seli Eli kɛ: ‘Ba nga n srɛli i Ɲanmiɛn sa nun’n yɛ. N waan ń fɛ́ i ń fá mɛ́n i naan ɔ yo i liɛ mlɔnmlɔn.’ Afuɛ nuan kwlakwla’n, Ɛlkana nin Anin be ko nian Samiɛli osu. Kpɛkun be mɛn i tralɛ uflɛ kun. Zoova mannin Anin ba yasua nsan nin ba bla nɲɔn ekun.

“Maan amun srɛ like titi, yɛ bé fá mán amun. Amun kunndɛ like titi, yɛ amún wún i.”—Matie 7:7.