Ɛsdrasi blɛ su’n, Izraɛli bian kun o lɛ’n be flɛ i Neemin. Ɔ tran Pɛrsi klɔ nga be flɛ i Sizi’n su lɔ, yɛ ɔ di junman Famiɛn Artaksɛrksɛsi i awlo lɔ. Neemin i niaan bian kun fin Zida, ɔ wa boli jasin tɛ kun kleli i. Ɔ seli i kɛ: ‘Be nga be sali be sin Zerizalɛmun’n be wun jɔman be. Afin be nin-a kwlá kplanman klɔ’n i wun talɛ nga Babilɔninfuɛ mun be sacili i’n.’ Ndɛ sɔ’n boli Neemin i wla dan. I sɔ’n ti’n, ɔ kunndɛli kɛ ɔ́ kɔ́ Zerizalɛmun naan ɔ́ kó úka be. Ɔ srɛli Ɲanmiɛn naan famiɛn’n mɛn i atin.

Famiɛn’n sieli i nzɔliɛ kɛ Neemin i klun timan jɔwa. Ɔ seli i kɛ: ‘N wun kɛ ɔ klun timan jɔwa. ?Ngue sa-ɔ?’ Neemin seli i kɛ: ‘Like nga ti yɛ min klun timan jɔwa’n, yɛle kɛ Zerizalɛmun klɔ’n w’a saci.’ Famiɛn’n usɛli i kɛ: ‘?Ngue yɛ a kunndɛ kɛ n yo man wɔ-ɔ?’ Neemin kali lɛ srɛli Ɲanmiɛn i klun lɔ. I sin’n, ɔ seli kɛ: ‘Yaci man min atin naan n wɔ Zerizalɛmun naan n ko kplan klɔ’n i wun talɛ’n.’ Famiɛn Artaksɛrksɛsi seli Neemin kɛ ɔ kwla kɔ, kpɛkun ɔ fali ajalɛ naan like fi w’a yoman Neemin atin nun. Ɔ sieli Neemin Zida akpasua’n i su kpɛn, ɔ mɛnnin i waka mun naan ɔ fa yo klɔ’n i anuan mun.

Kɛ ɔ juli Zerizalɛmun lɔ’n, ɔ ko nianniannin klɔ’n i wun talɛ’n. Ɔ yiali Ɲanmiɛn ɲrun jranfuɛ mun nin kpɛnngbɛn mun. Ɔ seli be kɛ: ‘Amun nian ɲrɛnnɛn mɔ e o nun-ɔn. Maan e mian e ɲin e di junman’n.’ Nvlefuɛ mun be sɔli ndɛ’n nun klanman, kpɛkun be boli talɛ’n i kplanlɛ bo ekun.

Sanngɛ Izraɛlifuɛ mun be kpɔfuɛ mun be srili be. Be seli be kɛ: ‘Sɛ nnɛn kaan wie bɔbɔ tu si talɛ nga amun su kplɛn i yɛ’n, ɔ́ bú gúa.’ Be nga be di junman’n b’a nianman be lɔ. Be liɛ nga be si i’n, yɛle talɛ’n i kplanlɛ. Blɛblɛblɛ, talɛ’n wa yoli tɛnndɛn kpa, kpɛkun ɔ jrannin cinnjinnjin.

Zerizalɛmunfuɛ mun be kpɔfuɛ mun be waan bé wá fá alɛ bé fú be nun. Be waan bé sín atin fanunfanun nun naan bé tɔ́ be su kpɛ kunngba. Kɛ Zuifu mun be tili ndɛ sɔ’n, srɛ kunnin be. Sanngɛ Neemin seli be kɛ: ‘Nán srɛ kun amun. Zoova o e sin.’ Neemin fali sran wie mun kɛ be sasa junman difuɛ mun. Ɔ maan be kpɔfuɛ mun b’a kwlá tɔman be su.

 Talɛ’n i kplanlɛ’n nin anuan mun be yolɛ’n dili cɛn ba ablenun-nin-nɲɔn (52) cɛ. Neemin fali Levifuɛ mun be kwlaa bali Zerizalɛmun naan be wa yi talɛ’n i nglo. Ɔ buli be nun akpasua nɲɔn naan be to jue. Be sinnin Nzue ti’n i anuan’n nun, kpɛkun be fuli talɛ’n su. Akpasua kun sinnin talɛ’n i bue kun su, yɛ kun sinnin i bue kun’n su. Be boli awɛ nin aaba ndɛ, ɔ nin jru, yɛ be toli jue be manmannin Zoova. Ɛsdrasi nin akpasua kun be ɔli, yɛ Neemin kusu nin akpasua kun’n be ɔli. Be akpasua nɲɔn’n be yiali Ɲanmiɛn i sua’n i ɲrun lɛ. Sran mun be kwlaa, i yasua-o, i bla-o, i ba kanngan-o, be yili tɛ mannin Zoova, yɛ be dili cɛn. Sran mun be tili be aklunjuɛ kpanlɛ’n mmua lɔ.