Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 LIKE SUANLƐ 23

Be seli Zoova kɛ bé sú i titi

Be seli Zoova kɛ bé sú i titi

Kɛ Izraɛlifuɛ mun be jasoli Ezipti lɔ’n, mɔ anglo nɲɔn sinnin’n, be juli Sinai oka’n i bo lɛ. Kpɛkun be trannin lɛ kan. Zoova flɛli Moizi oka’n su lɔ, ɔ seli i kɛ: ‘N deli Izraɛlifuɛ mun. Sɛ be ɲin yi min naan be nanti min mmla mun be su’n, bé káci min liɛ mlɔnmlɔn.’ Moizi ko kannin ndɛ’n kleli Izraɛlifuɛ mun. Be seli i kɛ: ‘Like kwlaa nga Zoova se e kɛ e yo’n é yó.’

Kɛ Moizi sɛli i sin oka’n su lɔ ekun’n, Zoova seli i kɛ: ‘Sɛ ɔ di cɛn nsan’n, ń má kán ndɛ ń klé amun. Se nvlefuɛ mun kɛ nán be fu Sinai oka’n su.’ Moizi jrali ko seli Izraɛlifuɛ mun kɛ be siesie be wun naan Zoova wá kán ndɛ klé be.

I cɛn nsan su’n, Izraɛlifuɛ mun be wunnin kɛ ɲanmiɛn su lɔ’n kpa sin, kpɛkun ɲanmiɛn ble’n fali oka wunmuan’n. Ɲanmiɛn su lɔ’n kplali kekle kpa, kpɛkun be tili awɛ kun tɛlɛ. Zoova jrali sin kun nun Sinai oka’n su. Srɛ kunnin Izraɛlifuɛ mun dan. Ɔ maan be usuli sa tututu. Oka’n kejeli dan kpa, kpɛkun sin wɛnsrɛn’n fali oka’n wunmuan’n. Awɛ’n tɛli kekle kpa ekun. Yɛ Ɲanmiɛn seli kɛ: ‘Min yɛ n ti Zoova’n niɔn. Nán amun sɔ amuin.’

Moizi sɛli i sin oka’n su lɔ ekun. Zoova mɛnnin i mmla naan ɔ fa ko man Izraɛlifuɛ mun. Mmla sɔ’n kan wafa ng’ɔ fata kɛ be su i’n, ɔ nin like ng’ɔ fata kɛ be yo’n be ndɛ. Moizi klɛli mmla’n kpɛkun ɔ kanngannin nun kleli Izraɛlifuɛ mun. Be tɛli i su kɛ: ‘Like kwlaa nga Zoova se e kɛ e yo’n é yó.’ Be seli Zoova kɛ bé sú i titi. ?Sanngɛ ndɛ nga be kannin’n be dili su?

“Fa ɔ awlɛn’n kwlaa, ɔ nin ɔ nguan’n kwlaa, ɔ nin ɔ akunndan’n kwlaa fa klo Zoova m’ɔ ti ɔ Ɲanmiɛn’n.”—Matie 22:37.

Ezipt Lɔ Tulɛ 19:1–20:21; 24:1-8; Mmla’n 7:6-9; Neemi 9:13, 14.