Siri famiɛn Bɛn-Adad fa alɛ wla Izraɛlifuɛ mun be sin titi. Sanngɛ i kwlaa sɔ’n nun’n, Ɲanmiɛn nuan ijɔfuɛ Elize dun mmua bo su kle Izraɛli famiɛn’n. Ɔ maan b’a kwlá ɲanman Izraɛli famiɛn’n. I sɔ’n ti’n, Bɛn-Adad waan be ko tra Elize. Be seli i kɛ Elize o klɔ nga be flɛ i Dotan’n su lɔ. Ɔ sunmɛnnin i sonja mun kɛ be ko trɛ i.

Siri sonja mun be juli lɔ kɔnguɛ. Kɛ aliɛ cɛnnin mɔ Elize i sufuɛ’n fiteli’n, ɔ wunnin kɛ sonja kpanngban kpa b’a sin b’a yia klɔ’n. Srɛ kunnin i dan kpa yɛ ɔ kpan seli kɛ: ‘?Elize, é yó nga sɛ?’ Elize tɛli i su kɛ: ‘Be nga be o e sin’n, be sɔnnin trali be sran liɛ mun.’ Zoova yoli maan Elize i sufuɛ’n wunnin kɛ oka nga be bo sin yia klɔ’n be su lɔ’n, nnɛn kpanngɔ nin kakaklolo mun b’a yi lika’n piɛ. Be jue kɛ sin sa.

Kɛ Siri sonja mun be waan bé trá Elize’n, ɔ srɛli Zoova seli kɛ: ‘Zoova, yaci yo maan be kaci aɲinsifuɛ.’ Kɛ ɔ yoli sɔ’n, sonja mun be wun ase,  sanngɛ be wunman lika nga be o’n i wlɛ kun. Elize seli be kɛ: ‘Nán klɔ nga amun kunndɛ’n yɛle nga. Amun su n su, ń kó klé amun sran nga amun kunndɛ i’n.’ Be suli Elize su lele be juli Samari, kan Izraɛli famiɛn’n tran lɔ’n.

Sirifuɛ mun bé nían-ɔn b’a ju Samari, be kwlá yoman like fi kun. Izraɛli famiɛn’n usali Elize kɛ: ‘?N kun be?’ ?Kɛ mɔ be kunndɛli kɛ bé trá Elize ti’n, ɔ́ sé kɛ be kun be? Cɛcɛ. Elize seli famiɛn’n kɛ: ‘Nán kun be. Man be aliɛ maan be di yɛ yaci be nun maan be wɔ.’ Famiɛn’n yoli maan be tɔnnin aliɛ kaka mannin be, kpɛkun ɔ yacili be nun be ɔli.