Eziptifuɛ mun be fali Izraɛlifuɛ mun be kacili be kanga, yɛ be miannin be kɛ be di junman kekle kpa. Zoova sunmannin Moizi nin Aarɔn Faraɔn sin. I waan be ko se i kɛ: ‘Yaci min sran mun be nun naan be wɔ aawlɛ flɛnnɛn’n nun lɔ be ko su min.’ Faraɔn kɛnnin i yasua su kɛ: ‘Min ndɛ nunman Zoova ndɛ nun! Izraɛlifuɛ mun be su tuman be bo.’ I kpa bɔbɔ’n, Faraɔn wa ukali be junman’n su. I sɔ’n ti’n, Zoova tuli i fɔ. ?A si like nga Zoova yoli’n? Ɔ fali ɲrɛnnɛn blu yili i Ezipti mɛn’n su. Zoova seli Moizi kɛ: ‘Faraɔn su faman min ndɛ’n su. Nglɛmun’n, ɔ́ wá kɔ́ Nili nzue ba’n i nuan lɔ. To i lɔ naan se i kɛ, kɛ mɔ w’a yaciman min sran mun be nun’n ti’n, Nili nzue’n wá káci mmoja.’ Kɛ nga Zoova fa kannin’n sa’n, Moizi ɔli. Aarɔn fali kpɔnman’n finnin Nili nzue’n su Faraɔn i ɲrun lɛ. Kpɛkun nzue’n kacili mmoja. Nzue’n wa bɔnnin fiaan kpa, jue mun be wuli, yɛ sran mun b’a kwlá nɔnman Nili nzue’n kun. Sanngɛ Faraɔn w’a manman Izraɛlifuɛ mun be atin kɛ be wɔ.

 I cɛn nso su’n, Zoova sunmannin Moizi Faraɔn wun lɔ ekun. I waan ɔ ko se i kɛ: ‘Sɛ w’a yaciman min sran mun be nun’n, klɛ mun bé wá trú Ezipti mɛn’n nun.’ Kɛ Aarɔn mɛnnin i kpɔnman’n su’n, klɛ mun be fiteli. Be truli Ezipti mɛn wunmuan’n nun. Be wluli be sua nin be sua ba mun, ɔ nin be talie mun be nun. Faraɔn seli Moizi kɛ ɔ srɛ Zoova naan ɲrɛnnɛn sɔ’n wie. Ɔ seli kɛ ɔ́ wá yáci Izraɛlifuɛ mun be nun naan be wɔ. Zoova yoli maan klɛ mun be wuli. Eziptifuɛ mun be tiantiannin klɛ mun be nuan. Lika’n bɔnnin kain kpa. Sanngɛ Faraɔn w’a yaciman Izraɛlifuɛ mun be nun.

I sin’n, Zoova seli Moizi kɛ: ‘Maan Aarɔn fɛ i kpɔnman’n fin asiɛ wun, naan ndutre’n kaci wɛntɛnwɛntɛn.’ Kɛ ɔ yoli sɔ cɛ’n, wɛntɛnwɛntɛn mun be fali lika wunmuan’n. Faraɔn i sran wie mun be seli i kɛ: ‘Ɲrɛnnɛn nga fin Ɲanmiɛn.’ Sanngɛ Faraɔn w’a kplinman su kɛ ɔ́ yáci Izraɛlifuɛ mun be nun naan be wɔ.