Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 LIKE SUANLƐ 31

Zozie nin Gabaɔnfuɛ mun

Zozie nin Gabaɔnfuɛ mun

Sa ng’ɔ juli Zeriko klɔ’n su’n, ɔ truli Kanaan mɛn’n nun. I sɔ’n ti’n, Kanaan famiɛn mun be bo yoli kun kɛ be nin Izraɛlifuɛ mun bé kó kún. Gabaɔnfuɛ mun b’a faman be wun b’a wlaman be nun wie. Be wlali tralɛ titiwa, kpɛkun be ko wunnin Zozie wun. Be seli i kɛ: ‘E fin mmua kpa. E tili Zoova i su ndɛ. Yɛ e si like ng’ɔ fa yoli Eziptifuɛ mun nin Moabufuɛ mun’n. Sɛ amun nin e b’a kunman alɛ’n, é káci amun kanga.’

Zozie fali ndɛ nga be kannin’n su. Ɔ seli be kɛ ɔ nin be su kunman alɛ. Kɛ ɔ dili cɛn nsan’n, Zozie wa wunnin i wlɛ kɛ be finman lika mmua, naan be ti Kanaanfuɛ. Zozie usali Gabaɔnfuɛ mun kɛ: ‘?Ngue ti yɛ amun lakali e-ɔ?’ Be tɛli i su kɛ: ‘Srɛ kunnin e. E si kɛ Zoova o amun sin. An yaci, nán amun kun e.’ Zozie dili ndɛ ng’ɔ kannin’n su, w’a kunman be.

Kɛ ɔ yoli sɔ’n w’a cɛman, cɛn kun’n Kanaan famiɛn nnun be waan be nin Gabaɔnfuɛ mun bé wá kún. Zozie nin i sonja mun be nantili kɔnguɛ wunmuan kun be ɔli be delɛ. Kɛ aliɛ cɛnnin cɛ’n, be boli alɛ’n i kunlɛ bo. Kanaanfuɛ mun be bo sanndili. Zoova maan laglasi dandan nga wie liɛ’n kɛ nzue tɔ́’n be gua’n, be guali be su. Zozie seli Zoova kɛ ɔ yo naan wia’n jran. Kusu nn wia’n nin-a jranman le. ?Ngue ti yɛ Zozie kwla se Zoova kɛ ɔ yo i sɔ like’n niɔn? Ɔ lafi Zoova su ti-ɔ. Cɛn sɔ nun’n, wia’n w’a tɔman, lele Izraɛlifuɛ mun be kwlali Kanaan famiɛn mun nin be alɛ kunfuɛ mun.

“Sɛ amun se kɛ ‘Ɛɛn’ maan ɔ ka su. Sɛ amun se kɛ ‘Cɛcɛ’ kusu’n maan ɔ ka su. Afin ndɛ kwlaa nga be kan gua su’n, ɔ fin klunwifuɛ’n.”—Matie 5:37.