Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

E Anuannzɛ’n i Ɲrun Dinfuɛ’m be lɛtri’n

E Anuannzɛ’n i Ɲrun Dinfuɛ’m be lɛtri’n

E sran kpa mun:

E mɔ e ti Zoova i sufuɛ’n e klo Biblu’n. Afin ɔ ti i nuan ndɛ. E lafi su kɛ i nun ndɛ’n ti nanwlɛ, naan sɛ e nanti su’n, e liɛ yó ye. I nun ndɛ’n kle weiin kɛ Zoova klo klɔ sran mun. (Jue Mun 119:105; Liki 1:3; 1 Zan 4:19) E klo kpa kɛ é úka e wiengu mun naan be si ndɛ nanwlɛ ng’ɔ o Ɲanmiɛn Ndɛ’n nun’n. I sɔ’n ti yɛ e yili fluwa nga-ɔ. Be flɛ i kɛ “Biblu’n nun ndɛ’m be kle e like.” Maan e kɛn i ndɛ kan.

Ba kanngan’m be ti yɛ e yili fluwa nga-ɔ. Sanngɛ sran kaklaka nga be kunndɛ kɛ bé sí Biblu’n nun ndɛ’n i kpa’n, e kwla fa uka be wie. Biblu’n ti sran kwlaa liɛ. Ɔ maan, e lafi su kɛ fluwa nga nun afɔtuɛ’m be kwla yo e kwlakwla e ye.

Fluwa nga i nun ndɛ’n taka Biblu’n su. Ɔ kan wafa nga mɛn’n boli i bo’n, ɔ nin klɔ sran mun be ndɛ. Wafa nga be klɛli ndɛ’n, ɔ yo maan ndɛ’n ti weiin, kpɛkun i wlɛ wunlɛ’n ti pɔpɔ. Asa ekun’n, wafa nga sa’m be suli be wun su juli’n, i su yɛ be niannin be klɛli ndɛ mun-ɔn.

Nán ndɛ ng’ɔ o Biblu’n nun’n i ndɛ kanlɛ sa ngbɛn ti yɛ be yili fluwa’n niɔn. Wafa nga be klɛli ndɛ’n, ɔ nin i nun desɛn’m be yo maan Biblu’n nun ndɛ nga be o fluwa’n nun’n be kannganlɛ’n yo fɛ. Kpɛkun e wun wafa nga sran nga be kan be ndɛ’n be wun fa yo be’n.

Fluwa nga kle kɛ Biblu’n kan sran akpasua nɲɔn ndɛ: Be nga be ɲin yili Zoova’n, ɔ nin be nga be ɲin w’a yimɛn i’n. Yɛ i nun ndɛ’n man e  afɔtuɛ wie mun. (Rɔmunfuɛ Mun 15:4; 1 Korɛntifuɛ Mun 10:⁠6) I nun ndɛ’m be ti akpasua 14. Ka naan b’a bo ndɛ akpasua kun bo’n, be bo i nun ndɛ’n i kpɔlɛ kan.

Sɛ amun le ba’n, amun nin i be kwla kanngan like suanlɛ kun nun, kpɛkun amun koko i nun desɛn’m be su yalɛ. I sin’n, amun kwla kanngan Biblu’n nun ndɛ mma nga like suanlɛ’n taka su’n, be nun. Amun uka amun wa’n naan ɔ wun kɛ Biblu’n nun ndɛ mma ng’ɔ kanngan nun’n, ɔ nin ndɛ ng’ɔ o fluwa’n nun’n be kɔ likawlɛ. Sɛ sran kaklaka wie yɛ amun su ukɛ i naan ɔ wun Biblu’n nun ndɛ’n i wlɛ’n, amun kwla fa ajalɛ kunngba’n.

E lafi su kpa kɛ fluwa nga ɔ́ wá úka be kwlaa nga be awlɛn ti kpa’n, i bakan-o, i kpɛnngbɛn-o, naan be si Ɲanmiɛn Ndɛ’n, yɛ be fɛ i nun ndɛ’n su. I liɛ’n, be kusu bé sú Ɲanmiɛn, kpɛkun bé yó i awlobo’n i nunfuɛ wie.

Amun niaan mun,

Zoova i Lalofuɛ’m be Anuannzɛ’n i Ɲrun Dinfuɛ mun