Abraamun nin Sara be jali w’a di afuɛ kpanngban. Be yacili be sua klanman’n Ir lɔ. Siɛn’n, tannin sua bo yɛ be tran-ɔn. Sanngɛ Sara w’a faman ya. Afin ɔ lafi Zoova su.

Sara kunndɛli kpa kɛ ɔ́ ɲán ba. I sɔ’n ti’n, ɔ seli Abraamun kɛ: ‘Sɛ min junman difuɛ Agaa wu ba kun’n, ń fɛ́ i ń yó min wa.’ Kɛ ɔ́ kɔ́ i ɲrun’n, Agaa wa wuli ba kun. Be flɛli i kɛ Ismaɛli.

Kɛ afuɛ kpanngban sinnin’n, sran nsan be wa niannin Abraamun nin Sara be osu. Blɛ sɔ nun’n Abraamun le afuɛ ablangwlan-nin-ngwlan (99), yɛ Sara kusu le afuɛ ablaɔcuɛ-nin- ngwlan (89). Abraamun seli be kɛ be bla naan be wa gua ase waka kun bo lɛ naan be di like kan. ?A si sran sɔ mun? Anzi mun-ɔn. Be seli Abraamun kɛ: ‘Afuɛ ng’ɔ́ bá lɔ’n, ikisa’n, a nin ɔ yi amún wá wú ba yasua kun.’ Kɛ bé kán ndɛ sɔ’n nn Sara o tannin sua’n nun lɔ, ɔ tili. Yɛ ɔ srili-ɔ. Ɔ seli i klun lɔ kɛ: ‘?Oke nga m’an yo i yɛ’n, n kwla wu ba ekun?’

Kɛ i afuɛ nuan yiali’n, Sara wuli ba yasua kun, kɛ nga Zoova i anzi mun be fa kannin’n sa. Abraamun tɔnnin ba’n i dunman kɛ Izaaki. I bo’n yɛle kɛ “Srilɛ.”

 Kɛ Izaaki ɲannin afuɛ nnun’n, cɛn kun Sara nían-ɔn, Ismaɛli su yo Izaaki i finfin. Sara kunndɛ kɛ ɔ́ sɛ́sɛ́ i wa’n. I sɔ’n ti’n, ɔ ko seli Abraamun kɛ ɔ se Agaa nin Ismaɛli kɛ be wɔ. I klikli’n nun’n, w’a yoman Abraamun i fɛ. Sanngɛ Zoova seli i kɛ: ‘Yo nga Sara seli ɔ kɛ a yo’n. Ń má nían Ismaɛli lika. Sanngɛ Izaaki lika yɛ ń sín ń yó like nga n seli kɛ ń yó mán wɔ’n niɔn.’