Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 LIKE SUANLƐ 80

Zezi kpɛ i akoto blu-nin-nɲɔn mun

Zezi kpɛ i akoto blu-nin-nɲɔn mun

Zezi boli jasin fɛ’n i bolɛ bo w’a di afuɛ kun nin sin. Siɛn’n, ɔ fata kɛ ɔ fa ajalɛ cinnjin kpa kun. ?Wan mun yɛ ɔ́ fá be naan ɔ nin be w’a di junman’n niɔn? ?Wan mun yɛ ɔ́ klé be like naan b’a dun asɔnun’n i ɲrun mmua-ɔ? Zezi kunndɛ kɛ Zoova kle i atin naan w’a kwla fa ajalɛ sɔ mun. I sɔ’n ti’n, i ngunmin ɔli oka kun su. Ɔ ko srɛli Ɲanmiɛn kɔnguɛ lele aliɛ cɛnnin. Kɛ aliɛ cɛnnin’n, ɔ flɛli i sɔnnzɔnfuɛ mun, kpɛkun ɔ fali be nun blu-nin-nɲɔn (12) yoli i akoto. ?A si be dunman? Be yɛle Piɛli, Andre, Zaki, Zan, Filipu, Batelemin, Toma, Matie, Zaki m’ɔ ti Alfe wa’n, Tade, Simɔn, yɛ Zida Iskariɔti.

Andre, Piɛli, Filipu, Zaki

Sran blu-nin-nɲɔn sɔ mun’n, kɛ Zezi kɔ́ lika’n, be nin i yɛ be kɔ-ɔ. Zezi kleli be like, kpɛkun ɔ sunmannin be kɛ be ko bo jasin. Zoova mannin be tinmin naan be fuan mmusu mun, yɛ be yo tukpacifuɛ mun be juejue.

Zan, Matie, Batelemin, Toma

Zezi flɛli sran blu-nin-nɲɔn (12) sɔ mun kɛ i janvuɛ, yɛ ɔ lafili be su. Farizifuɛ mun be waan sran sɔ mun b’a diman suklu naan be leman ɲrun.  Sanngɛ Zezi kleli be like naan b’a kwla di be junman’n. Ka naan Zezi w’a wu’n, yɛ kɛ ɔ cɛnnin nguan’n, ɔ nin be yɛ be sannin nun-ɔn. Be nun sunman be fin Galile kɛ Zezi sa. Yɛ be nun wie mun be le bla.

Alfe wa Zaki, Zida Iskariɔti, Tade, Simɔn

Fɔ o akoto mun be nun. Ɔ maan be fɔn. Ɔ ju wie’n, be kan ndɛ’n ka naan b’a bu i sin, yɛ be fa ajalɛ tɛ. Sa wie mun be nun’n, b’a kwlá traman be awlɛn. I kpa bɔbɔ’n, be sili akplowa naan bé sí sran ng’ɔ ti be nun sran dan’n. Sanngɛ be ti sran kpa, yɛ be klo Zoova. Be yɛ be yoli asɔnun’n i nun sran klikli mun-ɔn. Kɛ Zezi ɔli ɲanmiɛn su’n, be yɛ be dunnin asɔnun’n i ɲrun mmua-ɔ.

“N flɛ amun kɛ min janvuɛ. Afin ndɛ kwlaa nga min Si kan kleli min’n, n boli su n kleli amun.”—Zan 15:15.