Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 LIKE SUANLƐ 1

Ɲanmiɛn yili nglo nin asiɛ’n

Ɲanmiɛn yili nglo nin asiɛ’n

Ɲanmiɛn Zoova yɛ ɔ ti e Yifuɛ’n niɔn. Ninnge nga e kwla wun be’n nin nga e kwlá wunman be’n, i yɛ ɔ yili be kwlaa-ɔ. Ka naan w’a yi ninnge nga e kwla wun be’n, ɔ dun mmua yili anzi kpan- ngban kpa. ?A si wafa nga anzi mun be fa ti’n? Be ti kɛ Zoova sa. E kwlá wunman be. Anzi klikli nga Zoova yili’n, ɔ yoli Zoova i ukafuɛ. Ɔ ukali Zoova be yili nzraama mun, ɔ nin ninnge onga mun. Ninnge sɔ mun be nun kun yɛle asiɛ m’ɔ ti e tranwlɛ’n. Zoova yili i klanman kpa.

Ɔ siesieli asiɛ’n naan nnɛn nin klɔ sran mun be kwla tran su. Ɔ yoli maan wia’n boli asiɛ’n su. Yɛ ɔ yili oka mun nin nzue ba mun, ɔ nin jenvie’n.

?I sin’n, a si like nga Zoova yoli’n? Ɔ seli kɛ: ‘Ń má yí ijre nin waka mun.’ Kɛ ɔ yoli sɔ’n, waka nga be su mma’n, ɔ nin flɛli mun be fifili kpanngban kpa. I sin’n, ɔ yili nnɛn mun. Be nun wie mun be tu, wie mun be o nzue nun, wie mun be nanti, yɛ wie mun be kusu be cuɛn be wun ase. Be nun wie mun be ti kanngan. Be nun kun yɛle gbekle. Yɛ wie mun be ti dandan. Be nun kun yɛle sui. ?Nnɛn nga a klo i kpa’n yɛle benin?

I sin’n, Zoova seli anzi klikli’n kɛ: “E yi sran.” Ɲanmiɛn w’a yiman klɔ sran kɛ nnɛn mun be sa. Sran mun be kwla ijɔ, be kwla yi like, be kwla sri, yɛ be kwla srɛ Ɲanmiɛn. Ɲanmiɛn seli be  kɛ be nian asiɛ’n nin nnɛn mun be lika. ?A si sran klikli nga Ɲanmiɛn yili’n? É wá kɛ́n i ndɛ.

“Kɛ mɛn’n bó i bo’n, Nyanmiɛn yili nglo nin asiɛ’n.” —Bo Bolɛ 1:1