Kɛ Izraɛlifuɛ mun be o aawlɛ flɛnnɛn’n nun lɔ’n, Kore nin Datan nin Abiramun, be nin sran ya nɲɔn ablenun (250) be yoli ɲin kekle Moizi su. Be seli i kɛ: ‘Amun liɛ’n w’a flan e siɛn’n. ?Ngue ti yɛ wɔ yɛ a ti e su kpɛn mɔ Aarɔn yɛ ɔ ti Ɲanmiɛn ɲrun jranfuɛ’n niɔn? Zoova o e kwlaa e sin, nán a nin Aarɔn amun ngunmin amun sin yɛ ɔ wo-ɔ.’ Ndɛ nga be kannin’n w’a yoman Zoova i fɛ. I waan i bɔbɔ su yɛ be yoli ɲin kekle’n niɔn.

Moizi seli Kore nin be nga be su i su’n be kɛ: ‘Ainman’n an bla Ɲanmiɛn i tannin sua’n nun wa. Kɛ amún bá’n, amun fa ansan gua amun sɛnmlɛn guawlɛ’n nun be bla. Zoova wá klé e sran ng’ɔ fɛli i’n.’

Kɛ i aliɛ cɛnnin’n, Kore nin sran ya nɲɔn ablenun (250) mun be toli Moizi Ɲanmiɛn i tannin sua’n nun lɔ. Be ko yrali ansan. Kusu nn be timan Ɲanmiɛn ɲrun jranfuɛ. Zoova seli Moizi nin Aarɔn be kɛ: ‘Amun jaso Kore nin i sran mun be wun lɛ.’

Kore toli Moizi Ɲanmiɛn i tannin sua’n nun lɔ. Sanngɛ Datan nin Abiramun, be nin be awlofuɛ mun b’a ɔman lɔ wie. Zoova seli Izraɛlifuɛ mun kɛ be jaso Kore nin  Datan nin Abiramun be tannin sua mun be wun lɛ. Kɛ Zoova kannin sɔ cɛ’n, Izraɛlifuɛ mun be jasoli lɛ. Datan nin Abiramun, ɔ nin be awlofuɛ mun be fiteli be wa jranjrannin be tannin sua mun be wun lɛ. Kpɛkun asiɛ’n kpacili kpɛ kunngba, ɔ mɛnnin be. Ɲanmiɛn i tannin sua’n nun lɔ’n, sin kun fin ɲanmiɛn su lɔ ɔ wa yrali Kore nin i sran ya nɲɔn ablenun (250) mun.

Zoova seli Moizi kɛ: ‘Se Izraɛli akpasua mun be su kpɛn mun be kɛ be tinuntinun be man kpɔnman kun. Yɛ klɛ be dunman su. Levi akpasua’n i kpɔnman liɛ’n su’n, klɛ Aarɔn i dunman. Fa kpɔnman mun sie be min tannin sua’n nun. Sran nga n fɛli i’n, i kpɔnman liɛ’n bó nɲrɛ.’

Kɛ i aliɛ cɛnnin’n, Moizi fali kpɔnman mun, ɔ ko fa kleli Izraɛli kpɛnngbɛn mun. Aarɔn i kpɔnman liɛ’n boli nɲrɛ, ɔ suli mma bɔbɔ. I sɔ’n kleli weiin kɛ Aarɔn yɛ Zoova fɛli i kɛ ɔ yo i ɲrun jranfuɛ dan’n niɔn.