Ɛstɛɛ 2:1-23
2 I sin’n, kɛ Famiɛn Asierisi+ i ya’n kannin ase’n, ɔ wa buli like nga Vasti yoli’n,+ ɔ nin i wun ajalɛ nga be fali’n i akunndan.+
2 I sin’n, famiɛn’n i awlo lɔ junman difuɛ mɔ be mɛntɛn i’n be seli kɛ: “Maan be kunndɛ talua nglanmannglanman kpa mɔ be nin-a siman bian’n be man famiɛn’n.
3 Maan famiɛn’n sie sran wie mun i famiɛn diwlɛ’n nun nvlenvle’m be kwlaa+ be nun naan be fa talua nglanmannglanman kwlaa mɔ be nin-a siman bian’n be bla Sizi m’ɔ ti famiɛn klɔ’n* su, naan be fa be sie bla’m be sua’n nun lɔ. Maan be fa be man Egai+ m’ɔ ti famiɛn’n i junman difuɛ* m’ɔ ti bla’m be sunianfuɛ’n naan ɔ nian be lika. Kpɛkun maan be nian be lika* naan be klanman’n i ɲin fite kpa.
4 Yɛ talua nga famiɛn’n i klun jɔ i wun’n, ɔ́ sín Vasti i osu káci famiɛn’n i yi.”*+ Ndɛ sɔ’n jɔli famiɛn’n i klun, ɔ maan i sɔ yɛ ɔ yoli-ɔ.
5 Zifu bian kun tran Sizi+ m’ɔ ti famiɛn klɔ’n* su lɛ, be flɛ i kɛ Maadose.+ Ɔ ti Bɛnzamɛnfuɛ,+ ɔ ti Zairi i wa. Zairi kusu ti Simei i wa, yɛ Simei ti Kisi i wa.
6 Blɛ wie nun’n, Famiɛn Nebikadnezaa m’ɔ ti Babilɔnin famiɛn’n wa trali Zekoniasi*+ m’ɔ ti Zida famiɛn’n ɔ nin sran wie mun Zerizalɛmun lɛ ɔli. Maadose o sran sɔ’m be nun wie.
7 Ɔ ti Adasa* mɔ be flɛ i ekun kɛ Ɛstɛɛ’n i sunianfuɛ.* Ɛstɛɛ ti Maadose i si’n i niaan bian wa,+ ɔ leman si yɛ ɔ leman nin. Talua’n ɲinnin klanman, yɛ ɔ ti klanman kpa. Kɛ i si nin i nin be wuli’n, Maadose fɛli i kɛ i klun ba sa.
8 Kɛ be boli famiɛn’n i nuan su ndɛ’n nin i mmla’n be jɔ’n, be fali talua mun be ɔli Sizi m’ɔ ti famiɛn klɔ’n* su lɔ. Kpɛkun be fali be wlali Egai+ i sa nun kɛ ɔ nian be lika. Be fali Ɛstɛɛ ɔli famiɛn’n i sua’n nun lɔ wie, yɛ be fɛli i wlali Egai m’ɔ ti bla’m be sunianfuɛ’n i sa nun.
9 Talua’n i wun yoli Egai i fɛ yɛ ɔ kloli i sa kpa.* Ɔ fali ajalɛ ndɛndɛ naan be niɛn i lika* naan i klanman’n i ɲin fite kpa.+ Yɛ aliɛ nga be fa mɛn i’n be ti be liɛ ngunmin. Ɔ fali talua nso famiɛn’n i awlo lɔ kɛ be niɛn i lika. Asa ekun’n, ɔ fɛli i nin i talua nga be niɛn i lika’n sieli be bla’m be sua’n i lika kpafuɛ’n nun.
10 Ɛstɛɛ w’a kɛnmɛn i nvle’n,+ ɔ nin i osufuɛ’m be su ndɛ fi. Afin Maadose+ seli i kɛ nán ɔ kan kle sran.+
11 Cɛn kwlakwla’n Maadose ko nantinanti bla’m be sua’n i awlo klun’n i ɲrun lɛ naan ɔ́ nían sɛ Ɛstɛɛ o lɛ naan i wun ti kpa-o.
12 Kɛ be ko nian talua’m be lika lele mɔ anglo blu-nin-nɲɔn (12) nga be kleli’n ko sin’n, ɔ fata kɛ be sin Famiɛn Asierisi i ɲrun lɔ kunngunngun. Be fa miri ngo+ be kpakpa be anglo nsiɛn, yɛ be fa bomie ngo+ be kpakpa be anglo nsiɛn, kpɛkun be man be ɲanngo fanunfanun ekun naan be klanman’n i ɲin fite kpa. Afin ɔ fata kɛ be di be talua kɛ ngalɛ’n sa.*
13 I sin yɛ bla’m be kwla kɔ famiɛn’n i sin lɔ-ɔ. Kɛ talua kun fɛ i bla’m be sua’n nun lɔ m’ɔ́ kɔ́ famiɛn’n i awlo lɔ’n, like kwlaa ng’ɔ srɛ’n be fa mɛn i.
14 Talua’n kɔ nnɔsua, yɛ kɛ aliɛ ko cɛn’n, ɔ sɛ i sin bla’m be sua’n i nɲɔn su’n nun lɔ. Saasgazi m’ɔ ti famiɛn’n i junman difuɛ’n,*+ m’ɔ nian famiɛn’n i yi’m be su’n yɛ ɔ nian be lika-ɔ. Talua’n sɛmɛn i sin famiɛn’n i wun lɔ kun, saan famiɛn’n i klun w’a jɔ i wun dan, yɛ w’a bo i dunman kɛ be ko flɛ i.+
15 Kɛ Ɛstɛɛ m’ɔ ti Maadose i si niaan bian Abiaili i wa’n, mɔ Maadose fɛli i kɛ i wa sa’n+ i famiɛn sin kɔlɛ cɛn’n juli’n, w’a srɛman like fi. Ninnge nga Egai m’ɔ ti famiɛn’n i junman difuɛ m’ɔ nian bla’m be su’n kleli’n, i ngunmin yɛ ɔ fali-ɔ. (Blɛ kwlaa sɔ’n nun’n, sran kwlaa ng’ɔ wun Ɛstɛɛ’n, Ɛstɛɛ i wun yo i fɛ.)
16 Anglo blu’n su’n, yɛle kɛ Tebɛti* anglo’n nun’n, be fali Ɛstɛɛ ɔli Famiɛn Asierisi i wun lɔ. Kɛ ɔ kacili famiɛn’n, i afuɛ nso’n+ su yɛ sa sɔ’n juli-ɔ.
17 Famiɛn’n kloli Ɛstɛɛ trali bla onga’m be kwlaa. I wun yoli i fɛ yɛ i klun jɔli i wun* trali talua onga mɔ be nin-a siman bian’n be kwlaa. Ɔ maan ɔ fali famiɛn kle’n* wlɛli i ti, yɛ ɔ fɛ i yoli i yi,+ Vasti i osu.+
18 Ɔ maan famiɛn’n yoli maan i sran dandan’m be kwlaa, nin i sufuɛ mun be dili cɛn dan kpa, be dili Ɛstɛɛ i ti cɛn. I sin’n, ɔ yoli i nvle nunfuɛ’m be kwlaa be ye. Ɔ cɛli sran’m be like. Nga famiɛn’n kwla man’n, ɔ mannin.
19 I kpɛ nɲɔn su nga bé yía talua mun’n,*+ nn Maadose ti famiɛn’n i anuan’n i ɲrun lɛ.
20 Ɛstɛɛ w’a kɛnmɛn i osufuɛ mun nin i nvlefuɛ’m+ be su ndɛ fi, kɛ nga Maadose kan kleli i’n sa. Ɛstɛɛ nantili ndɛ nga Maadose kan kleli i’n su titi kɛ blɛ m’ɔ te o i sa nun’n sa.+
21 Blɛ sɔ’n nun mɔ Maadose ti famiɛn’n i anuan’n i ɲrun lɛ’n, famiɛn’n i awlo lɔ junman difuɛ nɲɔn, Bigtan nin Terɛsi, mɔ be ti anuan sunianfuɛ’n be fali ya, yɛ be cicili Famiɛn Asierisi i wun ndɛ kɛ bé kún i.*
22 Kpɛkun Maadose tili ndɛ sɔ’n nun, ɔ ka lɛ boli su kleli famiɛn’n i yi Ɛstɛɛ, naan i kusu w’a kan kle famiɛn’n Maadose i dunman nun.
23 Be usausali ndɛ’n nun yɛ be wunnin kɛ ndɛ’n ti nanwlɛ. Ɔ maan be sendeli be nɲɔn’n waka kun su. Yɛ be klɛli sa sɔ’n fluwa kun nun famiɛn’n i ɲrun lɛ. Fluwa sɔ’n nun yɛ be klɛ sa nga be ju’n niɔn.+
Ja ngua lɔ ndɛ mun
^ Annzɛ “famiɛn sua’n”, “sua fleiin’n.”
^ Ebr., “Eniki.” Nian Ndɛ’m be bo tulɛ lika’n nun lɔ.
^ Annzɛ “maan be kpakpa be.”
^ Ebr., “famiɛn bla.”
^ Annzɛ “famiɛn sua’n”, “sua fleiin’n.”
^ I bo’n yɛ: “Miiti.”
^ Annzɛ “i lika nianfuɛ.”
^ Annzɛ “famiɛn sua’n”, “sua fleiin’n.”
^ Annzɛ “be kpɛkpɛ i.”
^ Annzɛ “ɔ kleli kɛ ɔ klo i dan.”
^ Annzɛ “be kpakpa be.”
^ Ebr., “Eniki.” Nian Ndɛ’m be bo tulɛ lika’n nun lɔ.
^ Annzɛ “ɔ kleli kɛ ɔ klo i dan.”
^ Annzɛ “tannin tanmue nga be fa cici be ti’n.”
^ Ebr., “talua mɔ be nin-a siman bian’n.”
^ Ebr., “bé fá be sa bé síe i su.”
