Surat ha mga Taga-Roma 12:1-21

  • Lawas ipresentar sugad nga halad nga buhi (1, 2)

  • Iba-iba nga regalo, usa la nga lawas (3-8)

  • Sagdon mahitungod han tinuod nga Kristiano nga pagkinabuhi (9-21)

12  Salit mga kabugtoan, ginhahangyo ko kamo pinaagi han kalooy han Dios, nga ipresentar an iyo lawas+ sugad nga halad nga buhi, baraan+ ngan kinakarawat han Dios, usa nga sagrado nga pag-alagad nga ginagamit an iyo abilidad ha pangatadongan.+  Ngan ayaw na kamo pagpamolde hini nga sistema han mga butang,* kondi magbag-o kamo pinaagi ha pagbag-o han iyo panhunahuna,+ basi mapamatud-an niyo ha iyo kalugaringon+ an maopay ngan kinakarawat ngan hingpit nga kaburut-on han Dios.  Kay pinaagi han diri matupngan nga pagkabuotan nga iginhatag ha akon, ginsusumatan ko an kada tagsa dida ha iyo nga diri maghunahuna mahitungod ha iya kalugaringon hin labaw kay ha angay niya hunahunaon,+ lugod ipakita niyo nga may-ada kamo maopay nga panhunahuna uyon ha pagtoo nga iginhatag* han Dios+ ha kada tagsa ha iyo.  Kay sugad la nga may-ada kita ha usa nga lawas damu nga parte,+ pero diri parapriho an buruhaton han mga parte,  sugad man kita, bisan kon damu, uusa la nga lawas nga kahiusa han Kristo, pero sugad nga indibiduwal mga parte kita nga nakadepende ha usa kag usa.+  Salit, tungod kay may mga regalo kita nga nagkakaiba-iba uyon ha diri matupngan nga pagkabuotan nga iginhatag ha aton,+ kon ha pagtagna ito, magtagna kita uyon ha pagtoo nga iginhatag ha aton;  o kon ministeryo* ito, tumanon naton ito nga ministeryo; o hiya nga nagtututdo, manutdo hiya;+  o hiya nga nagdadasig,* maghatag hiya hin pagdasig;*+ hiya nga naghahatag,* maghatag hiya hin kinaburut-on;+ hiya nga nagdudumara,* maduruto* nga buhaton niya ito;+ hiya nga nagpapakita hin kalooy, malipayon nga buhaton niya ito.+  An iyo gugma sadang magin diri hipokrito.+ Kangalasi an maraot;+ kupkop ha maopay. 10  Ha minagburugto nga gugma, malumo nga palanggaon niyo an usa kag usa. Manguna kamo ha pagpasidungog ha usa kag usa.+ 11  Magin mauyatom* kamo, diri maghinubya.*+ Magin madasigon gud kamo pinaagi han espiritu.+ Magpauripon kamo kan Jehova.*+ 12  Magrayhak kamo tungod han iyo paglaom. Magpailob ha kasakitan.+ Magpadayon ha pag-ampo.+ 13  Paghatag kamo ha mga baraan uyon ha ira mga panginahanglan.+ Magin maabiabihon pirme.+ 14  Padayon nga bendisyoni an mga nagtitimaraot;+ pagbendisyon ngan ayaw panhimaraot.+ 15  Pagrayhak kamo upod han mga nagrarayhak; pagtangis upod han mga nagtatangis. 16  Tagda an iba sugad han pagtagad niyo ha iyo kalugaringon; ayaw paghunahuna hin higtaas nga mga butang,* lugod tinguhaa an ubos nga mga butang.+ Ayaw kamo pagpakamaaram ha iyo kalugaringon.+ 17  Ayaw pagbulos hin maraot ha maraot ha bisan hin-o.+ Hunahunaa kon ano an maopay uyon ha panlantaw han* ngatanan nga tawo. 18  Kon posible, buhata an iyo gimaopayi ha pakigmurayaw ha ngatanan nga tawo.+ 19  Mga hinigugma, ayaw kamo pagbulos, lugod tagi hin lugar an kapungot;*+ kay nahisurat na: “‘Akon an pagbulos; ako an mabulos,’ nasiring hi Jehova.”*+ 20  Pero “kon ginugutom an imo kaaway, pakaona hiya; kon gin-uuhaw hiya, tagi hiya hin maiinom; kay ha pagbuhat hini tatambakan mo hin naglalaga nga mga bága an iya ulo.”*+ 21  Ayaw pagpadaog ha maraot, lugod padayon nga daoga an maraot pinaagi han maopay.+

Mga footnote

O “hini nga panahon.” Kitaa an Glossary.
O “ginbahin-bahin; gin-alotaga.”
Kitaa an Glossary.
O “nagsasagdon.”
O “sagdon.”
O “nag-aamot.”
O “nangunguna.”
O “sinsero.”
O “maduruto; madasigon.”
O “Ayaw paglangaylangay ha iyo buruhaton.”
Kitaa an Ap. A5.
O “pagkultibar hin higtaas nga mga ideya.”
O “ha pagkita han.”
Karuyag sidngon, an kapungot han Dios.
Kitaa an Ap. A5.
Karuyag sidngon, basi pahumukon an kasingkasing han tawo ngan tunawon an iya pagin matig-a.