Surat ha mga Taga-Roma 10:1-21
10 Mga kabugtoan, an maopay nga kaburut-on han akon kasingkasing ngan an akon pangamuyo ha Dios para ha ira, ha pagkamatuod, para ha ira katalwasan.+
2 Kay makakapamatuod ako nga may kadasig hira para ha Dios,+ pero diri uyon ha husto nga kahibaro.
3 Tungod kay diri hira maaram han katadongan han Dios,+ lugod nangangalimbasog ha pag-establisar han ira kalugaringon nga paagi,+ waray hira magpasakop ha katadongan han Dios.+
4 Kay ha Kristo natapos an Balaud,+ basi an ngatanan nga nagpapakita hin pagtoo magkaada hin katadongan.+
5 Kay hi Moises nagsurat mahitungod han katadongan pinaagi han Balaud: “An tawo nga nagbubuhat hini nga mga butang mabubuhi pinaagi hito.”+
6 Pero mahitungod han katadongan nga resulta han pagtoo, ini an iginsurat: “Ayaw pagsiring ha imo kasingkasing,+ ‘Hin-o an masaka ha langit?’+ karuyag sidngon, basi ilusad an Kristo,
7 o ‘Hin-o an malusad ha kahiladman?’+ karuyag sidngon, basi kuhaon an Kristo tikang ha mga patay.”
8 Pero ano an ginsisiring han Kasuratan? “An pulong hirani ha imo, aada ha imo mismo baba ngan ha imo mismo kasingkasing”;+ karuyag sidngon, “an pulong” han pagtoo, nga aton iginsasangyaw.
9 Kay kon ipapasamwak mo ha publiko pinaagi han imo baba nga Ginoo hi Jesus,+ ngan ha imo kasingkasing magpakita ka hin pagtoo nga ginbuhi hiya han Dios tikang ha mga patay, matatalwas ka.
10 Kay pinaagi han kasingkasing an usa nagpapakita hin pagtoo para ha katadongan, kondi pinaagi han baba an usa nagpapasamwak ha publiko+ para ha katalwasan.
11 Kay an kasuratan nasiring: “Waray bisan hin-o nga may pagtoo ha iya an mapapakyas.”+
12 Kay waray kaibahan butnga han Judio ngan Griego.+ Uusa la an Ginoo han ngatanan, nga nahatag hin damu nga bendisyon* ha ngatanan nga natawag ha iya.
13 Kay “an bisan hin-o nga natawag ha ngaran ni Jehova* matatalwas.”+
14 Pero paonan-o hira matawag ha iya kon diri hira natoo ha iya? Ngan paonan-o hira matoo ha iya kon waray hira makabati mahitungod ha iya? Ngan paonan-o hira makakabati kon waray magsasangyaw?
15 Ngan paonan-o hira magsasangyaw kon waray hira sugoa?+ Sugad la han nahisurat: “Maopay gud pagkit-on an mga tiil han mga nagpapasamwak han maopay nga sumat mahitungod han mag-opay nga mga butang!”+
16 Bisan pa hito, diri ngatanan ha ira sinugot han maopay nga sumat. Kay hi Isaias nasiring: “Jehova,* hin-o an tinoo ha butang nga hinbatian tikang ha amon?”*+
17 Salit nagkakaada la hin pagtoo katapos mabatian an butang.+ Ngan an nabatian, pinaagi han pulong mahitungod han Kristo.
18 Kondi mapakiana ako, Nakabati hira, diri ba? Ha pagkamatuod, “nakaabot ha bug-os nga tuna an ira tunog, ngan an ira mensahe ngadto ha mga sidsid han inuukyan nga tuna.”+
19 Kondi mapakiana ako, Maaram an Israel, diri ba?+ Siyahan, hi Moises nasiring: “Aaghaton ko kamo nga mangabugho pinaagi hito nga diri usa nga nasud; aaghaton ko kamo nga masina gud pinaagi hin lurong nga nasud.”+
20 Pero hi Isaias nagin maisugon gud ngan siniring: “Hin-agian ako hadton diri namimiling ha akon;+ nakakilala ha akon an mga diri nagpapakiana mahitungod ha akon.”+
21 Pero mahitungod han Israel, hiya nasiring: “Ha bug-os nga adlaw igin-unat ko an akon mga kamot ngadto ha katawohan nga diri masinugtanon ngan matig-a an ulo.”+
